ភ្នំពេញ៖ ការផ្ទុះឡើងនៃវីរុស Covid-19 ផ្តើមចេញពីក្នុងខេត្ត Wuhan ប្រទេសចិន គឺបានរីករាលដាលយ៉ាងលឿន ទៅដល់បណ្តាប្រទេសជាច្រើន នៅលើពិភពលោក ក្នុងនោះកម្ពុជា ក៏ទទួលរងឥទ្ធិពល ពីជំងឺឆ្លងផ្លូវដណ្តើម ដ៏កាចសាហាវនេះ ។
ជាការពិតណាស់ ស្របពេលដែលមនុស្ស កំពុងមានការព្រួយបារម្ភ ពីការឆ្លងជំងឺនេះបំផុតនោះ ជាហេតុធ្វើឲ្យឱសថស្ថាន រួមនឹងអាជីវករលក់រាយ ជាច្រើន បានឆ្លៀតកេងចំណេញហួសហេតុ ពីឱកាសនេះ លក់ម៉ាស់ ឬ ទឹកអាល់កុល មេតាណុល ជេល ដំឡើងថ្លៃដ៏ហួសប្រមាណតែម្តង ។ ជាក់ស្តែង ជាមួយទង្វើដ៏ជ្រុលហួសហេតុនេះ នៅក្នុងប្រទេសថៃ អ្នកលក់ម៉ាស់ខិលខូចចំនួន ៧ នាក់ ត្រូវបានសមត្ថកិច្ចចាប់ខ្លួនរួចហើយ ដើម្បីទុកជាការព្រមានដល់អ្នកដទៃ។
ទាក់ទិនបញ្ហាខាងលើនេះ សម្តេចតេជោ ហ៊ុន សែន ក៏បានប្រកាសនឹងចុះចាប់កន្លែងលក់ម៉ាស់ឡើងថ្លៃ ហួសហេតុនៅទូទាំងប្រទេស ដោយរឹបអូសម៉ាស់ទាំងអស់ និងព្រមទាំងបិទអាជីវកម្មនោះ មិនឱ្យលក់ដូរអស់មួយជីវិតតែម្តង។
សម្តេចតេជោ ហ៊ុន សែន នាយករដ្ឋមន្ត្រី បានធ្វើការព្រមានធ្ងន់ៗបែបនេះ គឺនៅក្នុងឱកាសសម្តេចអញ្ជើញ ជួបសំណេះសំណាល ក៏ដូចផ្តល់ជាកម្លាំងចិត្ត ដល់ក្រុមគ្រូពេទ្យស្ម័គ្រចិត្តចំនួន ៤២២ នាក់ ក្នុងនោះមានគ្រូពេទ្យខ្មែរឥស្លាម ៣០នាក់ ដែលនឹងចេញទៅបំពេញបេសកកម្ម ជាមួយក្រសួងសុខាភិបាល ដើម្បីប្រយុទ្ធជាមួយជំងឺកូវីដ ១៩ នៅព្រឹកថ្ងៃទី២៥ ខែមីនា ឆ្នាំ២០២០ នេះ ៕ ដោយ៖ លឹម ហុង
