ភ្នំពេញ៖ សម្តេចតេជោ ស្នើសូមប្រជាពលរដ្ឋ មានការប្រុងប្រយ័ត្នខ្ពស់ អំពីសុខភាពផ្ទាល់ខ្លួន និងក្នុងក្រុមគ្រួសារ ជាពិសេសរាជរដ្ឋាភិបាលកម្ពុជា មិនបានហាមឃាត់ មិនឲ្យប្រជាជពលរដ្ឋកម្ពុជាធ្វើដំណើរ ហើយក៏មិនបានហាមឃាត់ មិនឲ្យប្រជាពលរដ្ឋយើង ធ្វើពិធីសែនឆេង ម៉េងនោះទេ ប៉ុន្តែពិធីសែន ឆេង ម៉េង នៅពេលខាងមុខនេះ ក៏យើងអាចធ្វើពីផ្ទះបាន។
សារជាផ្លូវការរបស់ សម្តេចអគ្គមហាសេនាតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចកក្រកម្ពុជា ថ្លែងពីវិមានសន្តិភាព នៅព្រឹកមិញ ថ្ងៃទី ២៥ ខែមីនា គឺបានអំពាវនាវ ដល់ប្រពលរដ្ឋកម្ពុជាទូទាំងប្រទេស ត្រូវចូលរួមទប់ស្កាត់ ការរីករាលដាលជំងឺឆ្លងកូវីដ-១៩ (Covid-19) ទាំងអស់គ្នា គឺសូមបងប្អូនកុំចេញពីផ្ទះ បើគ្មានការចាំបាច់អ្វីមួយនោះទេ ព្រោះមេរោគកូវីដ-១៩ នេះ គឺងាយឆ្លងពីមនុស្សម្នាក់ ទៅម្នាក់បានយ៉ាងងាយ។
សម្តេចតេជោ នាយករដ្ឋមន្ត្រី បានថ្លែងថា ពិតណាស់ ការស្នាក់នៅផ្ទះ គឺយើងអាចការពារ ការឆ្លងរាលដាលជំងឺកូវីដ-១៩ បានផង និងចំណេញពេលវេលាផង ហើយចំណេញទាំងសាំងឡាន និងសាំងម៉ូតូផងដែរ។ ម្យ៉ាងវិញទៀត គឺបងប្អូនមានឱកាសច្រើន បានរស់នៅជួបជុំបង្កភាពសប្បាយរីករាយ ដល់ក្រុមគ្រួសារផងដែរ។ ចំពោះពិធីសែន ឆេង ម៉េង នៅពេលខាងមុខនេះ ក៏យើងអាចធ្វើពីផ្ទះបាន។
សម្តេចតេជោ ហ៊ុន សែន នាយករដ្ឋមន្ត្រី បានបញ្ជាក់ផងដែរថា វិធានការខាងលើ គឺដើម្បីទប់ស្កាត់ការឆ្លងមេរោគកូវីដ-១៩ ពីមនុស្សម្នាក់ទៅមនុស្សម្នាក់បាន។ ប៉ុន្តែ រាជរដ្ឋាភិបាលកម្ពុជា មិនបានហាមឃាត់ មិនឲ្យប្រជាជពលរដ្ឋកម្ពុជាធ្វើដំណើរ ហើយក៏មិនបានហាមឃាត់ មិនឲ្យប្រជាពលរដ្ឋយើង ធ្វើពិធីសែនឆេង ម៉េងនោះដែរ៕ដោយ៖កូឡាប
