ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី បានណែនាំដល់ក្រុមហ៊ុនទូរស័ព្ទចល័តទាំង៤ត្រូវបញ្ចូលសារអប់រំ ពីការការពារជំងឺកូវីដ១៩នេះ ទៅក្នុងខលធូន គឺនៅពេលដែលទូរស័ព្ទរោទិ៍ ឲ្យអ្នកកំពុងរង់ចាំស្តាប់បានឮសំឡេង បុរស ឬស្ត្រីនិយាយថា ” យើងរួមគ្នា ដើម្បីប្រយុទ្ធប្រឆាំងជាមួយនឹងជំងឺកូវីដ១៩”។
នៅថ្ងៃទី ២៥ មីនា ព្រឹកមិញ ពីវិមានសន្តិភាព សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា បានស្នើដល់ប្រព័ន្ធផ្សព្វផ្សាយទាំងអស់ រួមទាំងក្រុមហ៊ុនទូរស័ព្ទចល័តទាំង៤ ត្រូវចូលរួមផ្សព្វផ្សាយព័ត៌មាន ឱ្យបានទូលំទូលាយ អំពីសារអប់រំស្តីពីការការពារជំងឺឆ្លងកូវីដ-១៩ ដែលក្នុងពេលបច្ចុប្បន្ននេះ កំពុងតែរីករាលដាល នៅក្នុងប្រទេសកម្ពុជា។
សម្តេចតេជោ ហ៊ុន សែន មានប្រសាសន៍ថា “វិទ្យុ ទូរទស្សន៍ និងបណ្តាញឃោសនាទាំងអស់ ត្រូវជួយផ្សព្វផ្សាយ ឱ្យបានទូលំទូលាយ នឹងឱ្យបានញឹកញាប់។ ទន្ទឹមនឹងនេះ ក្រសួងសុខាភិបាល ត្រូវបន្តផលិតឯកសារ អប់រំផ្សព្វផ្សាយឲ្យបានច្រើនសម្រាប់វិទ្យុ និងទូរទស្សន៍ និងផលិតសម្រាប់យកទៅផ្សព្វផ្សាយ តាមសារព័ត៌មាននានា និងតាម Facebook, Online ព្រមទាំងតាមកាសែត ជាដើម”។
ទន្ទឹមនឹងនេះដែរ សម្តេចតេជោ ហ៊ុន សែន នាយករដ្ឋមន្ត្រី បានណែនាំដល់ក្រុមហ៊ុនទូរស័ព្ទចល័តទាំង៤គឺ Cellcard, Smart, Metfone និង SeaTel ត្រូវបញ្ចូលសារអប់រំ ពីការការពារជំងឺកូវីដ១៩នេះ ទៅក្នុងខលធូន (Call Tune) គឺនៅពេលដែលទូរស័ព្ទរោទិ៍ ឲ្យអ្នកកំពុងរង់ចាំស្តាប់បានឮសំឡេង បុរស ឬស្ត្រីនិយាយថា ” យើងរួមគ្នា ដើម្បីប្រយុទ្ធប្រឆាំងជាមួយនឹងជំងឺកូវីដ១៩” តាមការណែនាំរបស់ក្រសួងសុខាភិបាល។
សម្តេចតេជោ ហ៊ុន សែន នាយករដ្ឋមន្ត្រី បានអំពាវនាវដល់បងប្អូនប្រជាពលរដ្ឋ សូមមេត្តាកុំធុញនឹងសារសំឡេង ពាក់ព័ន្ធនឹងខ្លឹមសារអប់រំ អំពីការទប់ស្កាត់នៃការរីករាលដាលជំងឺឆ្លងកូវីដ-១៩ (COVID-19) នេះឱ្យសោះ ។ ទន្ទឹមនឹងនេះ គឺសូមបងប្អូនប្រជាពលរដ្ឋខ្មែរទាំងអស់ រួមគ្នាប្រយុទ្ធប្រឆាំងនឹងជំងឺឆ្លងកូវីដ-១៩ (COVID-19) ទាំងអស់គ្នា តាមការណែនាំរបស់ក្រសួងសុខាភិបាល៕ដោយ៖កូឡាប