ភ្នំពេញ៖ នគរបាលខណ្ឌដង្កោ បាននិយាយថា តុលាការសាលាដំបូងរាជធានីភ្នំពេញបានចេញដីការឃុំខ្លួនបណ្ដោះអាសន្តហើយតាមពាក្យបណ្ដឹងរបស់ជនរងគ្រោះម្ចាស់រថយន្តចំពោះករណី ប្អូនប្រុសបង្កើតលួចរថយន្ត Lexus RX330 របស់បងប្រុសហើយបើករត់មកបុកម៉ូតូដឹកសាំងបណ្តាលឲ្យឆេះនេះ។ គួររំលឹកថាករណីប្អូនប្រុសបង្កើតលួចរថយន្តបងប្រុសខ្លួនឯង កាលពីថ្ងៃទី៥ ខែកញ្ញា ឆ្នាំ២០១៧ វេលាម៉ោង៨ព្រឹកត្រង់ចំណុចផ្ទះលេខ៤ ផ្លូវលេខ៣ បុរីពិភពថ្មី ស្ថិតនៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។
ជនរងគ្រោះឈ្មោះ គឹម រដ្ឋា ភេទប្រុស អាយុ៥៣ឆ្នាំ មុខរបរមន្ត្រីរាជការ ទីលំនៅផ្ទះលេខ៤ ផ្លូវលេខ៣ បុរីពិភពថ្មី ស្ថិតនៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ (ត្រូវជាបងប្រុសបង្កើតរបស់ ជនសង្ស័យឈ្មោះ គឹម រតនា) ។សមត្ថកិច្ចនគរបាល ឃាត់ខ្លួនជនសង្ស័យចំនួន១នាក់ឈ្មោះ គឹម រតនា ភេទប្រុស អាយុ៣៨ឆ្នាំ មុខរបរមិនពិតប្រាកដ ជនជាតិខ្មែរ ទីលំនៅផ្ទះលេខ15 ភូមិក្បាលទំនប់ សង្កាត់បឹងទំពុន ខណ្ឌមានជ័យ រាជធានីភ្នំពេញ (ត្រូវជាប្អូនប្រុសបង្កើតរបស់ជនរងគ្រោះឈ្មោះ គឹម រដ្ឋា) ។
វត្ថុតាងចាប់យក រថយន្ត១គ្រឿងម៉ាក Lexus RX330 ពណ៌ស ពាក់ស្លាកលេខភ្នំពេញ2AK-2331 មានលេខតួ2T2GA31U35C027667 នួន០១គ្រឿង ។
នគរបាលបានរៀបរាប់អំពីហេតុការណ៍នេះថា ៖ កាលពីថ្ងៃទី៥ ខែតុលា ឆ្នាំ២០១៧ វេលាម៉ោង៨ ជនសង្ស័យឈ្មោះ គឹម រតនា ភេទប្រុស អាយុ៣៨ឆ្នាំ (ត្រូវជាប្អូនប្រុសបង្កើតរបស់ជនរងគ្រោះ) បានជិះម៉ូតូឌុបចេញពីផ្ទះលេខ15 ស្ថិតនៅភូមិក្បាលទំនប់ សង្កាត់បឹងទំពុន ខណ្ឌមានជ័យ រាជធានីភ្នំពេញ មកដល់ផ្ទះរបស់ជនរងគ្រោះឈ្មោះ គឹម រដ្ឋា ភេទប្រុស អាយុ៥៣ឆ្នាំ មុខរបរមន្ត្រីរាជការ (ត្រូវជាបងប្រុសបង្កើតរបស់ជនសង្ស័យ) ស្ថិតនៅបុរី ពិភពថ្មី ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។ ពេលនោះជនសង្ស័យក៏បានគោះទ្វារ ឲ្យអ្នកបម្រើក្នុងផ្ទះ ឈ្មោះ កយ គៀង ហៅ សុខគា ភេទស្រី អាយុ២៣ឆ្នាំ ស្នាក់នៅក្នុងផ្ទះកើតហេតុខាងលើ បើកទ្វារ រួចជនសង្ស័យក៏បានដើរចូលទៅក្នុងផ្ទះ យកកូនសោ រថយន្តម៉ាក Lexus RX330 ពណ៌ស ពាក់ស្លាក លេខភ្នំពេញ2AK-2331 មានលេខតួ2T2GA31U35C027667 ដែលជនរងគ្រោះបានចតទុកនៅក្នុងរបងដីឡូតិ៍ខាងមុខផ្ទះ ។ ហើយជនសង្ស័យបានឡើងបើករថយន្តម៉ាកខាងលើជិះចេញពីក្នុងរបង ជិះគេចខ្លួនទៅបាត់ រួចឈ្មោះ កយ គៀង ហៅ សុខគា ក៏បានស្រែកប្រាប់ជនរងគ្រោះដែលកំពុងនៅលើផ្ទះជាន់ទី៣ ឲ្យបានដឹង ហើយជនរងគ្រោះជិះរថយន្ត១គ្រឿងផ្សេងទៀត ម៉ាកហាយឡេនឌ័រ ពណ៌ទឹកប្រាក់ ពាក់ស្លាកលេខភ្នំពេញ2Q-7971 លេខតួ លេខម៉ាស៊ីនមិនចាំ ជិះដេញតាម ពីក្រោយដល់ចំណុចក្រុមហ៊ុនស៊ិនទ្រី ស្ថិតនៅភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ រកមិនឃើញក៏ត្រឡប់មកវិញ ។ ហើយជនរងគ្រោះក៏បានទូរស័ព្ទទៅវិទ្យុអេប៊ីស៊ី និងរាយការណ៍ប្រាប់ សមត្ថកិច្ចជួយអន្តរាគមន៍តាមរកជនសង្ស័យ រួចសមត្ថកិច្ច យើងដែលកំពុងជិះល្បាតតាមផ្លូវ និងពូនស្ទាក់តាមគោលដៅ បានសហការគ្នាស្រាវជ្រាវរករថយន្ត ម៉ាកខាងលើ និងជនសង្ស័យ រហូតដល់វេលាម៉ោង១០ ថ្ងៃខែឆ្នាំដដែល ក៏បានឃើញ ជនសង្ស័យកំពុងជិះរថយន្តម៉ាកខាងលើ នៅលើផ្លូវ៣៧១ ត្រង់ចំណុច ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ហើយបានជិះម៉ូតូដេញ តាមពីក្រោយ ដល់ចំណុចក្បែរ បឹងតាម៉ាត ស្ថិតនៅភូមិម័លខាងលើ ជនសង្ស័យក៏បាន បើករថយន្ត ទៅបុកនិងម៉ូតូរ៉ឺម៉កកង់បី បណ្តាលឲ្យឆេះរថយន្តទៅមុខលែងរួច ហើយសមត្ថកិច្ចយើងក៏បាន ឃាត់ខ្លួនជនសង្ស័យ និងហៅរថយន្តពន្លត់អគ្គីភ័យ របស់ស្នងការដ្ឋាននគរបាលរាជធានីភ្នំពេញ ដែលប្រចាំការនៅសាលាខណ្ឌដង្កោ ជួយអន្តគមន៍ពន្លត់ ភ្លើងអស់ចំនួន១រថយន្ត ទើបរលត់ ។ បន្ទាប់មក សមត្ថកិច្ចយើងក៏បាននាំជនសង្ស័យ រួមនិងវត្ថុតាង រថយន្តម៉ាក Lexus RX330 ពណ៌ស ពាក់ស្លាក លេខភ្នំពេញ2AK-2331 មានលេខតួ2T2GA31U35C027667 ដែលត្រូវភ្លើងឆេះអស់ទាំងស្រុង យកមក ធ្វើការសាកសួរនៅអធិការដ្ឋាននគរបាលខណ្ឌដង្កោ ហើយជនរងគ្រោះក៏បានមកដាក់ពាក្យបណ្តឹង ចំឈ្មោះជនសង្ស័យដើម្បីឲ្យសមត្ថកិច្ចចាត់ការតាមផ្លូវច្បាប់តែម្តង ៕ដោយ៖ជាលី
