ក្នុងរយៈពេលត្រឹម ២៤ម៉ោងនៅក្នុងប្រទេសអ៊ីតាលី មានអ្នកស្លាប់ដោយសារវីរុសកូរ៉ូណាចំនួន ៦៨៣នាក់បន្ថែម ហើយអ៊ីតាលីមានការព្រួយបារម្ភខ្លាំងថា វីរុសដ៏កាចសាហាវនេះ កំពុងតែរាតត្បាតទៅកាន់ភាគខាងត្បូងប្រទេស។
ទោះមានអ្នកស្លាប់រហូតដល់ ៦៨៣នាក់នៅថ្ងៃពុធ វាគឺជាចំនួនតិច បើធៀបទៅនឹងថ្ងៃអង្គារ ដែលមានអ្នកស្លាប់រហូតដល់ ៧៤៣នាក់។
អ៊ីតាលីមានអ្នកស្លាប់ច្រើនជាងប្រទេសណាៗទាំងអស់ ហើយតួលេខសរុបមកដល់ពេលនេះមានចំនួន ៧.៥០៣នាក់។
សូមបញ្ជាក់ថា ក្នុងរយៈពេលត្រឹមមួយខែ វីរុសកូរ៉ូណា ឬ COVID-19 មានការរាតត្បាតយ៉ាងខ្លាំងនៅក្នុងប្រទេសអ៊ីតាលី ដោយវាបានផ្តាច់ជីវិតមនុស្សជាង ៧.៥០០នាក់ និងបានធ្វើឲ្យអ៊ីតាលី ក្លាយវ៉ាដាច់ប្រទេសចិន ក្លាយជាប្រទេសដែលមានអ្នកស្លាប់ច្រើនបំផុត។
ចំណែកការឆ្លងកើនជិតដល់ ៧៥.០០០ករណី៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia