អ្នកប្រដាល់ជើងខ្លាំងលំដាប់ពិពលោក និងជាសមាជិកព្រឹទ្ធសភាហ្វីលីពីន Manny Pacquiao បានចេញមុខប្រឈមនឹងមហាវីរុសកូរ៉ូណា (COVID-19) ខណៈករណីឆ្លងនៅក្នុងប្រទេសកំណើតរបស់លោកកំពុងតែបន្តកើនឡើង ។
កាលពីចុងសប្តាហ៍មុន លោក Pacquiao បាននិយាយថា គាត់មានឆន្ទៈប្រថុយប្រថាននឹងគ្រោះថ្នាក់ទាំងអស់ ដើម្បីគាត់អាចជួយអ្នកដែលរងផលប៉ះពាល់ធ្ងន់ធ្ងរពីជំងឺរាតត្បាតនេះ។
លោកបានបញ្ជាក់ឲ្យដឹងថា អ្វីដែលលោកខ្លាចបំផុតនោះ គឺសក្តានុពលសម្រាប់ប្រជាជនក្រីក្រ និងអ្នកដែល «រស់នៅតាមដងផ្លូវ» ដែលត្រូវរកលុយចិញ្ចឹមជីវិតប្រចាំថ្ងៃ អាចនឹងប្រព្រឹត្តអំពើមិនល្អផ្សេងៗ ប្រសិនបើពួកគេមិនទទួលបានការចិញ្ចឹម ឬផ្តល់អាហារហូបចុកគ្រប់គ្រាន់ នៅក្នុងប៉ុន្មានសប្តាហ៍ខាងមុខនេះ ។
ភ្ជាប់នឹងបញ្ហាខាងលើនេះ លោកបានបញ្ជាក់បន្ថែមថា៖ «នឹងមានភាពវឹកវរ។ ហើយនេះគឺជាអ្វីដែលខ្ញុំខ្លាចនឹងកើតឡើង» ។
មុននេះ Pacquiao បានបរិច្ចាគឡានក្រុងចំនួន ៥ គ្រឿងដល់រដ្ឋាភិបាល Duterte ដើម្បីឱ្យបុគ្គលិកសុខាភិបាល អាចត្រូវបានដឹកទៅកាន់ទីកន្លែងកំពុងប្រឈមនឹងវីរុសកូវីដ-១៩ នៅជុំវិញទីក្រុង Manila ។
Pacquiao ដែលបានបម្រើការជាសមាជិកព្រឹទ្ធសភាហ្វីលីពីនតាំងពីឆ្នាំ ២០១៦ ថ្មីៗនេះត្រូវបានគេមើលឃើញថា កំពុងធ្វើការជុំគ្នានៅផ្នែកជាច្រើន នៅក្នុងប្រទេស ដែលកំពុងរងផលប៉ះពាល់ដោយជំងឺនេះ។
លោកបាននិយាយថា លោកមិនមានចេតនាបន្ថយល្បឿនទេ សូម្បីតែការគំរាមកំហែងធ្ងន់ធ្ងរដល់សុខភាពរបស់គាត់ក៏ដោយព្រោះគាត់យល់ថាវាជាកាតព្វកិច្ចរបស់គាត់ក្នុងនាមជាអ្នកដឹកនាំដែលហ៊ានប្រថុយជីវិតរបស់គាត់។
អ្នកនយោបាយវ័យ ៤១ ឆ្នាំ រូបនេះ ត្រូវបានដកស្រង់សម្តីដោយនិយាយយ៉ាងដូច្នេះថា៖ “ប្រសិនបើអ្នកជាមេដឹកនាំ នោះអ្នកត្រូវតែធ្វើជាអ្នកនាំមុខគេ” ។
“អ្នកគឺជាអ្នកដឹកនាំ ដូច្នេះអ្នកត្រូវតែដឹកនាំ ហើយអោយគេដឹងថាអ្នកនៅជាមួយពួកគេ។ អ្នកមិនអាចលាក់ខ្លួនបាន ដោយសារតែអ្នកខ្លាចស្លាប់ទេ។ ខ្ញុំកើតចេញពីគ្រួសារក្រីក្រ ដូច្នេះខ្ញុំដឹងពីអារម្មណ៍របស់ពួកគេច្បាស់ណាស់” ។
លោកក៏បានប្តេជ្ញាចិត្តខ្ពស់ ក្នុងការដោះស្រាយវិបត្តិនេះ ដោយលោកសូម្បីសុខចិត្តលះបង់អាជីពប្រដាល់របស់លោកនៅពេលនេះទៀតផង។ ហេតុនេះលោកបានទូន្មានថា៖ «ចូរយើងទាំងអស់គ្នា ត្រូវតែផ្តោតការយកចិត្តទុកដាក់របស់យើងលើរឿងនេះជាមុនសិន»។
Pacquiao ក៏បានសហការជាមួយសហស្ថាបនិកក្រុមហ៊ុន Alibaba លោក Jack Ma ដើម្បីបរិច្ចាគម៉ាស់ចំនួន ៥០០,០០០ ដើម្បីជួយរដ្ឋាភិបាលហ្វីលីពីន ក្នុងការប្រយុទ្ធប្រឆាំងនឹង COVID-១៩ ។ ឥឡូវនេះគាត់កំពុងរង់ចាំការមកដល់នៃឧបករណ៍តេស្ត និងម៉ាស់ពីប្រទេសចិន ៕
ប្រែសម្រួល៖ លឹម ហុង (ប្រភព៖ nextshark)