ចំនួនអ្នកស្លាប់ដោយសារវីរុសកូរ៉ូណា នៅក្នុងប្រទេសអេស្ប៉ាញបានវ៉ាដាច់ចិន កាលពីថ្ងៃពុធដោយអ្នកស្លាប់កើនដល់ចំនួន ៣.៤៣៤នាក់ ក្រោយពេលមានអ្នកស្លាប់ថ្មីចំនួន ៧៣៨នាក់ទៀត ក្នុងរយៈពេល ២៤ម៉ោងចុងក្រោយនេះ។ នេះបើតាមការបញ្ជាក់របស់រដ្ឋាភិបាល។
ចំនួនអ្នកស្លាប់ដ៏ច្រើនបែបនេះកើតឡើង ខណៈពេលដែលការប្រកាសបិទប្រទេសរបស់អេស្ប៉ាញបានឈានចូលថ្ងៃទី ១១ ដើម្បីទប់ស្កាត់ការរីករាលដាលវីរុសមរណៈនេះ។
បើតាមក្រសួងសុខាភិបាលបានឲ្យដឹងថា អ្នកឆ្លងសរុបនៅក្នុងប្រទេសបានកើនដល់ ៤៧.០០០ករណី។
កាលពីថ្ងៃអង្គារកន្លងទៅនេះ កងកម្លាំងរបស់អេស្ប៉ាញ បានស្នើសុំជំនួយមនុស្សធម៌ពីអង្គការណាតូ (NATO) ដើម្បីប្រយុទ្ធប្រឆាំងនឹងវីរុសមរណៈ។
សូមបញ្ជាក់ថា បច្ចុប្បន្ន ប្រទេសអេស្ប៉ាញកំពុងមានការខ្វះខាតបរិក្ខារពេទ្យសម្រាប់ធ្វើតេស្ត ព្យាបាល និងការពារបុគ្គលិកជួរមុខ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia