ភ្នំពេញ៖ សម្តេចតេជោ ហ៊ុន សែន បានមានប្រសាសន៍បញ្ជាក់ឲ្យដឹងថា ការបិទមួយរយៈមិនមែនការកំណត់ ដើម្បីរង់ចាំស្ថានភាពកូវីដ-១៩ វិវឌ្ឍមកសភាពធូរស្បើយទាំងស្រុង គឺធ្វើឡើងតែសម្រាប់ដូចជា ហាងខារ៉ាអូខេច្រៀងជុំគ្នា និងក្លឹបកម្សាន្តជាដើមប៉ុណ្ណោះ ប៉ុន្តែ សម្រាប់ផ្សារ អាហារដ្ឋាន ហាងកាហ្វេ និងពិសេសរោងចក្រ មិនមែនការបិទទ្វារនោះឡើយ ។
ស្របពេលជាមួយគ្នានោះដែរ ជាមួយគ្នានេះ សម្តេចក៏បានបញ្ជាក់ថា ដើម្បីកុំឲ្យប្រទេសស្ងប់ស្ងាត់ពេក នោះការប្រគំតន្ត្រី និងសូម្បីជាការប្រដាល់ ក៏ត្រូវបានអនុញ្ញាតឲ្យដំណើរការជាធម្មតា ប៉ុន្តែ ត្រូវផ្សាយបន្តផ្ទាល់ពីស្ថានីយ ដោយមិនមែនមនុស្សមកចូលរួមណែនតាន់តាប់នោះទេ ។ ដោយឡែក ពិធីបុណ្យចូលឆ្នាំថ្មីវិញ ក៏ត្រូវបានអនុញ្ញាតឲ្យធ្វើជាធម្មតាដែរ ប៉ុន្តែ សម្តេចថាយកល្អគួរធ្វើសប្បាយជុំគ្នាគ្រួសារនៅឯផ្ទះទៅ ។
សូមបញ្ជាក់ថា សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជណាចក្រកម្ពុជា បានថ្លែងយ៉ាងដូច្នេះ នៅក្នុងឱកាសដែលសម្តេច បានអញ្ជើញជួបសំណេះសំណាលជាមួយក្រុមគ្រូពេទ្យស្ម័គ្រចិត្តប្រមាណជា ៤០០ នាក់ មុននឹងពួកគេចេញបេសកកម្មជាមួយក្រសួងសុខាភិបាល ដើម្បីប្រយុទ្ធប្រឆាំងនឹងជំងឺកូវីដ-១៩ កាលពីព្រឹកថ្ងៃទី២៥ ខែមីនា ឆ្នាំ២០២០ ម្សិលមិញនេះ ៕ ដោយ៖ លឹម ហុង
