ព្រឹទ្ធសភាអាមេរិច កាលពីថ្ងៃពុធ បានអនុម័តកញ្ចប់ថវិកាចំនួន ២លានលានដុល្លារ ដើម្បីបន្ធូរបន្ថយបញ្ហាសេដ្ឋកិច្ច ដែលបង្កឡើងដោយវីរុសកូរ៉ូណា។ ការអនុម័តនោះ កើតឡើងក្រោយពេលមានការចរចាជាច្រើនសារ រវាងបក្សប្រជាធិបតេយ្យ និងបក្សសាធារណរដ្ឋ។
សភាជាន់ខ្ពស់អាមេរិច បានអនុម័តកញ្ចប់ថវិកា ដ៏ច្រើនសន្ធឹកសន្ធាប់នោះ ដោយសំឡេង ៩៦ទល់នឹងសូន្យ។ ថវិកានោះ ត្រូវតែអនុម័តជាមុនសិន ដោយសភាតំណាងរាស្ត្រ មុនពេលវាត្រូវគេបញ្ជូនទៅឲ្យប្រធានាធិបតី ដូណាល់ ត្រាំ ដើម្បីធ្វើការចុះហត្ថលេខា។
ច្បាប់ថវិកានោះ ដែលមានគោលបំណង ទប់ទល់នឹងវិបត្តិសេដ្ឋកិច្ច ដោយសារវីរុស COVID-19 នឹងផ្តល់ប្រាក់កម្ចីបន្ទាន់សម្រាប់ អាជីវកម្មខ្នាតតូច ការសម្បទានពន្ធអាជីវកម្ម និងផ្តល់អត្ថប្រយោជន៍ផ្សេងៗ សម្រាប់ប្រជាជនអាមេរិច។
ប្រធានដឹកនាំភាគច្រើនៃព្រឹទ្ធសភា លោក Mitch McConnell បានហៅកញ្ចប់ថវិកាថា ជាជំនួយសង្គ្រោះបន្ទាន់ ហើយវានឹងជួយប្រជាជន ទូទាំងប្រទេសទាំងអស់៕
សូមបញ្ជាក់ថា រហូតមកដល់ពេលនេះ អាមេរិចមានអ្នកឆ្លងវីរុសកូរ៉ូណា ឬ COVID-19 ចំនួនជាង ៦៨.០០០នាក់ និងមានអ្នកស្លាប់ជាង ១.០០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Xinhua