ភ្នំពេញ ៖ មន្ត្រីជំនាញ នៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និង បង្ក្រាបការក្លែងបន្លំ នៅព្រឹកថ្ងៃទី២៦ ខែមីនា ឆ្នាំ២០២០ បានចុះប្រតិបត្តិការឆែកឆេរ ទីតាំងលក់អាល់កុលចំនួន២ទីតាំង នៅម្តុំផ្សារអូឡាំពិក សង្កាត់អូរឡាំពិច និងនិងហាងលក់កុំព្យូទ័របង់រំលស់ យីហោ “ធារុណ” ខណ្ឌបឹងកេងកង ដោយរកឃើញថា គ្មានច្បាប់អនុញ្ញាត និងក្លែងក្លាយ លក់ក្នុងតម្លៃថ្លៃជូនដល់ប្រជាពលរដ្ឋ ឆ្លៀតឱកាសដែលវីរុសកូវីត១៩ (COVID19)កំពុងរីករាលដាល ។
ការចុះប្រតិបត្តិការត្រួតពិនិត្យនេះ មន្ត្រីជំនាញ បាននាំយកនូវអាល់កុលមួយចំនួន មកធ្វើការពិសោធន៍ និងបានធ្វើការណែនាំឲ្យម្ចាស់ទីតាំងចូលរួមសហការ ជាមួយមន្ត្រីជំនាញ តាមរយៈការលក់នៅផលិតផលដែលមានគុណភាព និងមានយីហោច្បាស់លាស់ជាមួយនិងការរក្សាតម្លៃឲ្យបានសមរម្យ ដើម្បីជាការចូលរួមចំណែកជួយដល់ប្រជាពលរដ្ឋ ប្រយុទ្ធប្រឆាំង បង្ការ ទប់ស្កាត់ នូវវីរុសកូវីដដែលកំពុងរីករាលដាលនៅកម្ពុជា ។
មន្ត្រីជំនាញ នៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាប់ការក្លែងបន្លំសាខារាជធានីភ្នំពេញ បានឲ្យដឹងថា នៅក្នុងប្រតិបត្កិការក្រុមការងាររបស់លោក បានធ្វើការឆែកឆេរ និងត្រួតពិនិត្យទីតាំងចំនួន២កន្លែងនៅជុំវិញផ្សារអូឡាំពិច បានដកហូតអាល់កុល សម្រាប់លាងដៃ និង ប្រដាប់លាងខ្លួនចំនួន ២៤០លីត្រ និងសួរនាំម្ចាស់នោះថាទិញពីហាងលក់ “ធារុណ”លក់កំព្យូទ័របង់រំលស់នៅរសៀលថ្ងៃខែដដែល និងក៏កម្លាំងជំនាញដោយមានការដឹកនាំលោកព្រះរាជអាជ្ញារងអមសាលាដំបូងរាជធានីភ្នំពេញ ចុះមកពិនិត្យមានចំនួន២ប្រភេទ ប្រភេទទី១ អាល់កុល និងទឹកបាញ់ខ្លួនកម្ចាត់មេរោគ ហើយក៏មានរថយន្តមន្ទីរពិសោធន៍ ចល័តពិនិត្យជាក់ស្ដែងតែម្ដង ដើម្បីឲ្យដឹងថា មានផលប៉ះពាល់សុខភាពប្រជាពលរដ្ឋដែរឬទេ ដោយមានគេទិញពីហាងនិងគឺក្លែងក្លាយ ។ ទីតាំងលក់ធារុណ លក់កំព្យូទ័រនៅផ្លូវ១៤៣ កែង៣២០ សង្កាត់បឹងកេងកងទី៣ ខណ្ឌបឹងកេងកង ។
មន្ត្រីជំនាញ ក៏បានសំណូមពរ ដល់អាជីវករលក់អាល់កុល សម្រាប់លាងសម្អាតដៃ សូមមេត្តាកុំលក់មានតម្លៃ ហួសប្រមាណ ហើយក៏សូមអំពាវនាវ ដល់ប្រជាពលរដ្ឋ សូមកុំទិញផលិតផល អាល់កុលណា ដែលគ្មានស្លាកសញ្ញា និងមិនមានការបញ្ជាក់ ពីប្រភពច្បាស់លាស់ ដើម្បីប្រើប្រាស់សម្រាប់ការលាង សម្អាត កំចាត់មេរោគ ឬបង្ការវីរុស Covid-19។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ CCF បានឲ្យដឹងថា អាល់កុលក្លែងក្លាយចំនួន៣៦ប៊ីដុង ស្មើនឹង ១០៨០ លីត្រ ត្រូវបានអ្នកប្រើប្រាស់ នាំយកមកប្រគល់ជូន អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បន្ទាប់ពីមន្ទីរពិសោធន៍របស់អគ្គនាយកដ្ឋាន ធ្វើវិភាគឃើញថា ជាសារធាតុមេតាណុល ដែលជាសារធាតុពុល មិនអាចយកទៅប្រើសម្រាប់លាងដៃសម្លាប់មេរោគបានទេ។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ សូមអំពាវនាវដល់សាធារណជនជាពិសេសអាជីវករទាំងអស់ មេត្តាចូលរួមសហការ និងស្វែងយល់អំពីការប្រកបអាជីវកម្មដោយការទទួលខុសត្រូវជៀសវាងធ្វើឲ្យប៉ះពាល់ដល់ សុខភាពអ្នកប្រើប្រាស់ ។ ជាមួយគ្នានេះដែរ អគ្គនាយកដ្ឋាន សូមណែនាំដល់អាជីវករលក់ដុំ និងលក់រាយទាំងអស់ នៅពេលទទួលទំនិញយកមកលក់បន្ត សូមសួររកឯកសារនៃការទិញលក់ ដូចជាវិក្ក័យប័ត្រជាដើម ដើម្បីងាយស្រួលដល់សមត្ថកិច្ចតាមរកអ្នកផ្គត់ផ្គងផលិតផលទាំងនោះ (Trace back)៕ដោយ៖បញ្ញាស័ក្តិ