ភ្នំពេញ៖ គណបក្សប្រជាជនកម្ពុជា អំពាវនាវឲ្យមានការពង្រឹងភាពជាដៃគូជាសកល និងកិច្ចខិតខំប្រឹងប្រែង អន្តរជាតិរួមគ្នា ដើម្បីប្រមូលធនធាន ការគាំទ្រគ្នានិងជំនួយឲ្យគ្នាទៅវិញទៅមក និងចែករំលែកឧត្តមានុវត្តន៍។
គណបក្សលើកទឹកចិត្តឲ្យបណ្តាប្រទេសលើពិភពលោក ធ្វើសកម្មភាពឲ្យបានរហ័សនិងពេញលេញ ប្រកបដោយគណនេយ្យភាព និងការទទួលខុសត្រូវ ដោយផ្អែកលើមធ្យោបាយ វិទ្យាសាស្ត្រ សាមគ្គីភាព និងស្មារតីមនុស្សធម៌ដើម្បីបញ្ចប់ការរាតត្បាតនិងដើម្បីកសាងប្រព័ន្ធ ដែលមានការត្រៀមខ្លួនរួចរាល់ និងមានសមត្ថភាពឆ្លើយតប និងទប់ទល់និងការរីករាលនៃការផ្ទុះឡើងនៃជំងឺ និងការរាតត្បាតដែលកំពុងតែកើតមាន និងដែលអាចកើតឡើងសារជាថ្មី។
គណបក្សប្រជាជនកម្ពុជា នៅថ្ងៃទី២៦ ខែមីនា ឆ្នាំ២០២០នេះ បានចេញសេចក្តីថ្លែងការណ៍ អំពាវនាវប្រទេសទាំងអស់មានការពង្រឹងភាពជាដៃគូ និងសាមគ្គីភាពជាសកល ដើម្បីប្រយុទ្ធនឹងជំងឺកូវីដ១៩ ដែលកំពុងគំរាមកំហែងដល់ប្រជាជននៅលើពិភពលោក។
គណបក្សប្រជាជនកម្ពុជា សូមចូលរួមរំលែកទុក្ខយ៉ាងក្រៀមក្រំចំពោះក្រុមគ្រួសារនៃអ្នកដែលបានបាត់បង់ជីវិតដោយសារជំងីកូវីដ១៩ថ្មីនេះ និងសូមសម្តែងសេចក្តីអាណិតអាសូរចំពោះអ្នកដែលបានឆ្លងវីរុសនេះ។ គណកប្សសូមកោតសរសើរបុគ្គលិកពេទ្យជួរមុខ នៅជុំវិញពិភពលោក ដែលកំពុងប្រថុយជីវិតរបស់ខ្លួនដើម្បីជួយសង្គ្រោះជីវិតអ្នកដទៃ។ ជំងឺរាតត្បាតដ៏អាក្រក់នេះដែលមិនស្គាល់ជាតិសាសន៍ ព្រំដែន ឬមនោគមន៍វិជ្ជានយោបាយ គឺជាការសាកល្បងមួយ សម្រាប់មនុស្សជាតិ និងអភិបាលកិច្ចពិភពលោករបស់យើង។
គណបក្សប្រជាជនកម្ពុជា សូមស្ញប់ស្ញែងចំពោះជោគជ័យរបស់ប្រទេសចិន កូរ៉េខាងត្បូង និងជប៉ុន ក្នុងការទប់ស្កាត់ការរីករាលដាល់នៃវីរុសក៏មានប្រសិទ្ធភាព ដែលនាំឲ្យមានការធ្លាក់ចុះនៃចំនួនអ្នកឆ្លង។
គណបក្សសូមថ្លែងអំណរគុណយ៉ាងជ្រាលជ្រៅ ចំពោះប្រជាជនចិន ដែលបានផ្តល់នូវបុគ្គលិកពេទ្យ និងការផ្គត់ផ្គង់ផ្នែកវេជ្ជសាស្ត្រ និងប្រទេសជប៉ុន ដែលបានផ្តល់សម្ភារការពារវេជ្ជសាស្ត្រ ដល់ប្រទេសកម្ពុជា និងប្រទេសដទៃទៀត ដើម្បីប្រយុទ្ធប្រឆាំងនឹងវីរុសរួមគ្នានៅពេលដ៏ចាំបាច់នេះ៕ដោយ៖កូឡាប
