បរទេស៖ កាលពីពេលថ្មីៗនេះ អ្នកចិត្តសឿងម្នាក់ដែលមានឈ្មោះនៅលើបណ្តាញសង្គមថា GayShawnMendes និងក៏ត្រូវបានគេស្គាល់ថាជា Larz បានចូលរួមក្នុងល្បែងលេងសើច ‘Coronavirus challenge’ ដោយលិឍគែមចានបង្គន់សាធារណៈ ដើម្បីចំអកដល់ការផ្ទុះឡើងនៃវីរុសកូវីដ-១៩ ។ ទោះយ៉ាងណា ប៉ុន្មានថ្ងៃក្រោយមក បុរសរូបនេះបានប្រាប់គ្រប់គ្នានៅលើ Twitter ឲ្យដឹងថា រូបគេត្រូវបានតេស្តវិជ្ជមានវីរុសនេះដែរហើយ ។
ពិតណាស់ ការលេងល្បែងឆ្កួតៗនេះ នៅលើបណ្តាញសង្គមដ៏ល្បីរបស់ចិន Tik Tok ត្រូវបានបំផុសឡើងគ្រាន់តែជាវិធីមួយ សម្រាប់អ្នកប្រើប្រាស់បណ្តាញសង្គម នាំគ្នាលេងសើចទៅនឹងជំងឺនេះប៉ុណ្ណោះ ដោយបង្ហាញថាវាមិនទៅងាយអី នឹងឆ្លងស្រួលៗ ដូចដែលមនុស្សគ្រប់គ្នា អះអាងនោះឡើយ ។
ទោះយ៉ាងណា វាជាទង្វើដ៏គួរឲ្យព្រួយបារម្ភ ដែលមិនគួរមានមនុស្សមួយចំនួន នៅតែគិតធ្វើតាមវិធីនេះ ដោយមិនយល់ដឹងថា Covid-19 ពេលនេះត្រូវបានគេបង្ហាញថា វាអាចស្ថិតនៅលើភាគល្អិតអាកាសជាច្រើនម៉ោង ហើយបានសម្លាប់មនុស្សនៅលើពិភពលោកជាង ២០.០០០ នាក់ រួចទៅហើយ ។
អ្នកលេង Tik Tok រូបនេះ បានផុសប្រាប់គ្រប់គ្នានៅលើ Twitter ឲ្យដឹងថា៖ “ខ្ញុំតេស្តវិជ្ជមានវីរុសកូរ៉ូណា បន្ទាប់ពីចូលរួមលេងល្បែងនេះ ប៉ុន្មានថ្ងៃប៉ុណ្ណោះ ហើយឥឡូវនេះ ខ្ញុំកំពុងនៅលើគ្រែមន្ទីរពេទ្យ” ។
គួរបញ្ជាក់ថា Larz គឺជាបុគ្គលដ៏ល្បីម្នាក់ បន្ទាប់ពីបានចងក្រងវីដេអូ លិឍការ៉េមនៅក្នុងហាងលក់គ្រឿងទេសមួយ ដែលជាផ្នែកមួយ នៃវិធីប្រកួតដទៃទៀត នៅលើបណ្តាញសង្គម ក្នុងនោះដូចជាធ្វើឡើងជាមួយផលិផលគ្រឿងទេស និងចានបង្គន់ជាដើម ៕
ប្រែសម្រួល៖ លឹម ហុង (ប្រភព៖ worldofbuzz)