ប្រទេសថៃ ៖ ការជ្រួលច្របល់ ភ័យខ្លាចដ៏ហួសហេតុពេក ដោយសារការផ្ទុះឡើងនៃវីរុសកូវីដ-១៩ បានធ្វើឲ្យកន្លែងលក់ដូរជាច្រើន បានដៃឆ្លៀតដំឡើងថ្លៃដ៏ជ្រុលហួសប្រមាណតែម្តង ។ ជាក់ស្តែង នៅក្នុងប្រទេសថៃ សូម្បីតែតម្លៃស៊ុត ក៏ត្រូវបានជំរុញឲ្យក្រសួងពាណិជ្ជកម្មប្រទេសនេះ គំរាមចាត់វិធានការផ្លូវច្បាប់ ចំពោះអ្នកលក់កេងចំណេញផងដែរ ។
លោក Manote Chuthapthim ប្រធានសមាគមមាន់ចិញ្ចឹមដាក់ជាស្រទាប់ៗ (Layer Chickens) បានបញ្ជាក់ប្រាប់ឲ្យដឹងថា តម្រូវការពងមាន់ក្នុងរយៈពេល ១០ ថ្ងៃ កន្លងមកនេះ ត្រូវបានសង្កេតឃើញថា គឺមានការបានកើនឡើងថ្លៃគួរឲ្យកត់សម្គាល់ ដោយផ្អែកលើការភ័យខ្លាច នៃការរីករាលដាលនៃ Covid-19 និងការប្រកាសអំពីកម្រិតគ្រាអាសន្ន។
ពិតណាស់ ប្រជាជនជាមានការព្រួយបារម្ភ ចំពោះផលវិបាក ក្នុងការទិញរបស់របរហូបចុកប្រចាំថ្ងៃ បន្ទាប់ពីចេះតែនាំគ្នាគិតថា ពួកគេនឹងត្រូវបានហាមឃាត់មិនឲ្យចាកចេញពីផ្ទះ ដើម្បីទប់ស្កាត់ការរីករាលដាលនៃជំងឺកូវីដ-១៩ ។ ដោយមើលឃើញស្ថានភាពបែបនេះ ហើយមនុស្សចាប់ផ្តើមសម្រុករកទិញពងមាន់ យ៉ាងច្រើនដើម្បីស្តុកទុក ជាហេតុធ្វើឲ្យកន្លែងលក់រាយជាច្រើន បានឱកាសឡើងថ្លៃតែម្តង ។
ដើម្បីជាការឆ្លើយតបទៅនឹងការត្អូញត្អែរ របស់ប្រជាពលរដ្ឋ ចំពោះការលក់ដំឡើងថ្លៃនេះ ក្រសួងពាណិជ្ជកម្មថៃ បានព្រមានថា ម្ចាស់ហាងណា ដែលលក់ស៊ុតកាប់ថ្លៃហួសហេតុ អាចត្រូវជាប់គុករហូតដល់ ៧ ឆ្នាំ ឬ ពិន័យជាប្រាក់រហូតដល់ ១៤០.០០០ បាត (ស្នើនឹង ៤៣២២ ដុល្លារ)៕
ប្រែសម្រួល៖ លឹម ហុង (ប្រភព៖ bangkokpost)