កណ្តាល៖ បន្ទាប់ពីមានសារព័ត៌មានមួយចំនួនបានផ្សាយថា មានអ្នកផ្ទុកជំងឺកូវីដ១៩ ចំនួន២នាក់ ជាពលករទើបមកពីប្រទេសថៃ ស្នងការនគរបាលខេត្តកណ្តាល បានបញ្ជាក់ថា ពិតជាមានអ្នកផ្ទុកជំងឺកូវីដ១៩ ចំនួន២នាក់ ជាបងប្អូនខ្មែរឥស្លាមពិតប្រាកដមែន ប៉ុន្តែពួកគាត់មិនមែន ជាអ្នកនៅក្នុងចំណោមពលករ ដែលទើបមកពីប្រទេសថៃនោះទេ។
លោកឧត្ដមសេនីយ៍ត្រី ឈឿន សុចិត្ត ស្នងការដ្ឋាននគរបាលខេត្តកណ្តាល នៅថ្ងៃទី២៧ខែមីនាឆ្នាំ២០២០នេះ បានថ្លែងថា “យើងខ្ញុំសូមឆ្លើយបញ្ជាក់ថា ខេត្តកណ្តាល ពិតជាមានអ្នកផ្ទុកជំងឺកូវីដ១៩ ចំនួន២នាក់ពិតប្រាកដមែន ប៉ុន្តែពួកគាត់មិនមែន ជាអ្នកនៅក្នុងចំណោមពលករ ដែលទើបមកពីប្រទេសថៃនោះទេ “។ លោកស្នងការ បានថ្លែងបន្តថា ករណីទី1៖ ឈ្មោះ. ទ.ត្រ ប្រុស អាយុ ៦០ឆ្នាំ មកពីម៉ាឡេស៊ី 01/03/2020 បានធ្វើតេស្តដំបូង 16/03 វិជ្ជមាន តេស្តទី2 17/03 វិជ្ជមាន តេស្តទី3 21/03 អវិជ្ជមាន តេស្តទី4 22/03 វិជ្ជមាន តេស្តទី5 24/03 អវិជ្ជមាន និងតេស្តទី6 26/03 វិជ្ជមាន។ ករណីទី2៖ ឈ្មោះ ស្ល.យ ប្រុស59ឆ្នាំ គាត់មិនបានទៅម៉ាឡេស៊ីទេ តែគាត់ដើរធ្វើបុណ្យសាសនា ក្នុងស្រុកគ្រប់ទីកន្លែង ហើយគាត់មានការពាក់ព័ន្ធជាមួយ ករណីទី1 ខាងលើ និងគ្នាគាត់ 11នាក់ទៀត គឺតេស្តទី1 23/03 វិជ្ជមាន (ពេទ្យរុស្ស៊ី ទៅធ្វើតេស្តខ្លួនឯង ក្រោយពីលទ្ធផល វិជ្ជមាន ខាងពេទ្យរុស្ស៊ី បញ្ជូនគាត់មកឲ្យខាងមន្ទីរពេទ្យបង្អែកជ័យជំនះ ខេត្តកណ្តាល តាមដាន ធ្វើការព្យាបាល) និងតេស្តទី2 26/03 វិជ្ជមាន។
ពាក់ព័ន្ធនឹងករណីខាងលើនេះ លោកជំទាវ ឱ វណ្ណឌីន អ្នកនាំពាក្យក្រសួងសុខាភិបាល បានប្រកាសបដិសេធ ចំពោះការផ្សព្វផ្សាយមិនពិត បំពុលសង្គមថា “នៅខេត្តកណ្តាល មានករណីវិជ្ជមានវីរុស Covid-19 ចំនួន២ករណី ជាពលករមកពីប្រទេសថៃ “។ លោកជំទាវ “ក៏បានអំពាវនាវ ឱ្យសមត្ថកិច្ចចាត់វិធានការ តាមច្បាប់ចំពោះជនបំពុលទាំងនោះ”។
សូមបញ្ជាក់ថា នៅថ្ងៃទី២៥ ខែមីនា ឆ្នាំ២០២០ នេះ ស្នងការនគរបាលខេត្តកណ្តាល បានដឹកនាំសហការី ចូលរួមសហការជាមួយអាជ្ញាធរមូលដ្ឋាន គ្រប់លំដាប់ថ្នាក់ ទៅជួបផ្ទាល់ប្រជាពលរដ្ឋ ដែលទើបមកពីប្រទេសថៃ១៩នាក់ ស្មើនឹង៣គ្រួសារ។ ក្នុងនោះ ឆ្លងតាមព័ត៌មានរបស់មណ្ឌលសុខភាពត្រើយស្លា ថា រកឃើញអ្នកឡើងកំដៅចំនួន៤នាក់។
ទន្ទឹមនោះ លោកឧត្តមសេនីយ៍ស្នងការ សុំគោលការណ៍ ដឹកនាំផ្ទាល់ពីឯកឧត្តមអភិបាលខេត្តកណ្តាល ដើម្បីពន្យល់ណែនាំប្រជាពលរដ្ឋទាំង១៩នាក់នោះ ឲ្យយល់ពីផលប៉ះពាល់ និងការបង្ការទប់ស្កាត់ជំងឺកូវីដ១៩ និងដើម្បីអញ្ជើញពួកគាត់ មកស្នាក់នៅដាច់ដោយឡែក រយៈ១៤ថ្ងៃនៅវិទ្យាល័យ ហ៊ុនសែន តាខ្មៅ ដែលមានការតាមដាន ផ្នែកសុខភាព របស់មន្ទីរសុខាភិបាលខេត្ត៕ដោយ៖កូឡាប