មណ្ឌលគិរី៖ ទេសភាពទាំនេះ គឺស្ថិតតាមបណ្តោយទន្លេស្រែពក ភាគខាងលើ ក្នុងដែនជំរកសត្វព្រៃស្រែពក ក្នុងខេត្តមណ្ឌលគិរី។ នេះបើតាមការផ្សាយរបស់ក្រសួងបរិស្ថាន នៅថ្ងៃទី២៧ ខែមីនា ឆ្នាំ២០២០នេះ។
នៅក្នុងការចុះល្បាត កាលពីពេលថ្មីៗកន្លងទៅនេះ មន្ត្រីឧទ្យានុរក្ស នៃមន្ទីរបរិស្ថានខេត្តមណ្ឌលគិរី បានផ្តិតរូបភាពនៅតាមទីតាំងនេះ ដែលជាទីជម្រករបស់សត្វកម្រមួយចំនួនផងដែរ ដូចជា ក្រពើភ្នំ ភេ អន្លុងត្រីត្រសក់ ជាពិសេសតាមដងទន្លេដុះដោយដើមឈើទាលធំៗ។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរី បានឲ្យដឹងថា នៅរដូវនេះធនធានធម្មជាតិ មានភាពស្រស់ត្រកាល បង្ហាញនូវសុខភាពរបស់ព្រៃនៅតំបន់នោះផងដែរ ក្រៅពីនោះ យើងសង្កេតឃើញវត្តមានប្រភេទពានរ(ស្វា)មួយចំនួន ដូចជាស្វាព្រាម ស្វាស្រូវ និងសត្វស្លាប កេងកង តូច ស្មោញ និងក្អែកទឹកជាដើម ។ ដោយឡែក តាមការសិក្សាក្រពើភ្នំមានវត្តមាន នៅក្នុងតំបន់នោះប្រហែល២០ ទៅ២៥ក្បាល ។ តាមការសិក្សាក្រពើភ្នំ មានវត្តមាននៅក្នុងតំបន់នោះ ប្រហែល២០ ទៅ២៥ក្បាល ។
សូមបញ្ជាក់ថា ដែនជម្រកសត្វព្រៃស្រែពក នៅខេត្តមណ្ឌលគិរី ត្រូវបានបែងចែកជាបួនតំបន់។ ក្នុងនេះមាន តំបន់ស្នូល តំបន់អភិរក្ស តំបន់ប្រើប្រាស់ដោយចីរភាព និងតំបន់សម្រាប់បម្រើដល់ការងារគ្រប់គ្រងថែរក្សា អភិរក្ស និងអភិវឌ្ឍន៍សេដ្ឋកិច្ច សង្គម ប្រកបដោយនិរន្តរភាព។ នេះបើយោងតាមអនុក្រឹត្យ របស់រាជរដ្ឋាភិបាល ចុះថ្ងៃទី១ ខែកុម្ភៈ ឆ្នាំ២០១៩។ ការបែងចែកតំបន់គ្រប់គ្រងដែនជម្រកសត្វព្រៃស្រែពក រៀបចំឡើង ដើម្បីធានាប្រសិទ្ធភាព និងប្រសិទ្ធផល នៃការគ្រប់គ្រងធនធានធម្មជាតិ និងជីវចម្រុះនៅក្នុងដែនជម្រកសត្វព្រៃស្រែពក ក៏ដូចជាការលើកកម្ពស់ ចូលរួមរបស់សហគមន៍មូលដ្ឋាន ក៏ដូចជាសាធារណជន ក្នុងការរួមចំណែកដល់ការគ្រប់គ្រង ការការពារ និងការអភិរក្សជីវចម្រុះ និងធនធានធម្មជាតិក្នុងតំបន់ ព្រមទាំងធានាឱ្យមានការថែទាំសត្វព្រៃ និងប្រព័ន្ធអេកូឡូស៊ី៕ដោយ៖កូឡាប
