ប្រធានាធិបតីចិន ស៊ី ជីនពីងបានប្រាប់ប្រធានាធិបតីអាមេរិច ដូណាល់ ត្រាំ តាមកិច្ចសន្ទនាតាមទូរស័ព្ទថា គាត់សង្ឃឹមថា អាមេរិចនឹងចាត់វិធានការសំខាន់ៗ ដើម្បបង្កើនចំណងមិត្តភាពទ្វេរភាគី នៃប្រទេសទាំងពីរ។ នេះបើតាមការបញ្ជាក់របស់ក្រសួងការបរទេសចិន។
លោក ស៊ី ក៏បានប្រាប់លោក ត្រាំដែរថា កិច្ចសហប្រតិបត្តិការ រវាងប្រទេសទាំងពីរ គឺជាវិធីដ៏ត្រឹមត្រូវតែមួយគត់ ហើយចិនមានឆន្ទៈគាំទ្រអាមេរិច ក្នុងការដោះស្រាយបញ្ហាវីរុសកូរ៉ូណា។
ការលើកឡើងរបស់ចិននេះ កើតឡើងក្រោយពេលមានសង្គ្រាមពាក្យពេចន៍ រវាងទីក្រុងប៉េកាំង និងវ៉ាស៊ីនតោន លើបញ្ហាជាច្រើនដូចជា ការរាតត្បាតនៃវីរុសកូរ៉ូណា ដែលបានផ្ទុះឡើងនៅប្រទេសចិន កាលពីចុងឆ្នាំមុន ហើយរហូតមកដល់ពេលនេះ បានរាតត្បាតទូទាំងពិភពលោក។
លោក ត្រាំ និងមន្ត្រីជាន់ខ្ពស់អាមេរិចជាច្រើន បានចោទប្រកាន់ចិនថា គ្មានតម្លាភាពលើបញ្ហាវីរុស ដែលបានសម្លាប់មនុស្សជាង ២៤.០០០នាក់ ដែលការចោទនោះធ្វើឲ្យចិនខឹងយ៉ាងខ្លាំង។
នៅក្នុងការសន្ទនាតាមទូរស័ព្ទ លោក ស៊ី ជីនពីង បានបញ្ជាក់សាជាថ្មីប្រាប់លោក ត្រាំថា ចិនតែងបើកចំហរ និងមានតម្លាភាព ពីការរាតត្បាតនៃវីរុសនោះ។
លោក ស៊ី ក៏បានផ្តល់ការគាំទ្រដល់អាមេរិចផងដែរ ដែលពេលនេះមានអ្នកឆ្លងវីរុសកូរ៉ូណាច្រើនបំផុតក្នុងលោក។
លោក ត្រាំ បាននិយាយនៅក្នុងបណ្តាញសង្គម Twitter ថា លោកបានពិភាក្សាលម្អិតពីការផ្ទុះវីរុស ជាមួយនឹងលោកស៊ី។
លោក ត្រាំបានសរសើរចិនថា “ចិនបានឆ្លងកាត់យ៉ាងច្រើន និងអភិវឌ្ឍន៍ការយល់ដឹងយ៉ាងខ្លាំងពីវីរុស”។ “ពួកយើងកំពុងធ្វើការងារយ៉ាងជិតស្និទ្ធជាមួយគ្នា ដោយការគោរពយ៉ាងខ្លាំង”។
សូមបញ្ជាក់ថា នៅថ្ងៃសុក្រនេះ អាមេរិចបានឡើងមកកំពូលតារាង ដែលមានអ្នកឆ្លងវីរុសកូរ៉ូណាច្រើនបំផុត ក្នុងពិភពលោក ដោយប្រទេសមហាអំណាចយោធា និងសេដ្ឋកិច្ចនេះ មានអ្នកឆ្លងជាង ៨៥.០០០នាក់ និងមានអ្នកស្លាប់ជាង ១.២០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia