ភ្នំពេញ៖ រាជរដ្ឋាភិបាល ស្នើទៅសម្តេចហេង សំរិន ប្រធានរដ្ឋសភា ផ្លាស់ប្ដូររដ្ឋមន្ត្រីចំនួន៥ ក្រសួង គឺក្រសួងយុត្តិធម៌
ក្រសួងប្រៃសណីយ៍និងទូគមនាគមន៍ ក្រសួងធម្មការនិងសាសនា ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រសួងមុខងារសាធារណៈ ។ នេះបើយោងតាមលិខិតរបស់រាជរដ្ឋាភិបាល ដែលលោកខៀវ កាញារីទ្ធរដ្ឋមន្ត្រីក្រសួងព័ត៌មាន បង្ហោះលើបណ្តាញសង្គមហ្វេសប៊ុកផ្លូវការនៅយប់ថ្ងៃទី២៧ខែមីនាឆ្នាំ២០២០។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានបញ្ជាក់ថា យោងតាមព្រះរាជក្រឹត្យ ស្តីពីការតែតាំងរាជរដ្ឋាភិបាល កម្ពុជា និងដោយយោងតាមតម្រូវការចាំបាច់ក្នុងការបង្កើនប្រសិទ្ធភាពការងាររបស់រាជរដ្ឋាភិបាល ក្នុងនាមជានាយករដ្ឋមន្ត្រីកម្ពុជា ខ្ញុំសូមស្នើសម្តេចប្រធានរដ្ឋសភា មេត្តាអនុញ្ញាតរៀបចំការបោះឆ្នោតផ្តល់សេចក្តីទុកចិត្តរបស់រដ្ឋភាព លើការតែងតាំង និងកែសម្រួល សមាសភាពនៃរាជរដ្ឋាភិបាល ដូចជាមានរាយនាមខាងក្រោម៖
១)តែងតាំងទេសរដ្ឋមន្ត្រី គឺ១)ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ជាទេសរដ្ឋមន្ត្រី ២)ឯកឧត្តមហ៊ឹម ឆែម ជាទេសរដ្ឋមន្ត្រី ទទួលបន្ទុកបេសកកម្មពិសេស ៣) ឯកឧត្តម អង្គ វង្សវឌ្ឍនាជាទេសរដ្ឋមន្ត្រី ទទួលបន្ទុកបេសកកម្មពិសេស ៤) ឯកឧត្តមត្រាំ អ៊ីវតឹក ជាទេសរដ្ឋមន្ត្រី ទទួលបន្ទុកបេសកកម្មពិសេស ៥)ឯកឧត្តម ពេជ្រ ប៊ុនធិន ជាទេសរដ្ឋមន្ត្រី ទទួលបន្ទុកបេសកកម្មពិសេស។
២)កែសម្រួល និងតែងតាំងសមាសភាពរដ្ឋមន្ត្រី គឺ១) ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ជារដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ២)ឯកឧត្តម កើត រិទ្ធ ជារដ្ឋមន្ត្រីក្រសួងយុត្តិធម៌ ៣)ឯកឧត្តមជា វ៉ាន់ដេត ជារដ្ឋមន្ត្រីក្រសួងប្រៃសណីយ៍និងទូរគមនាគមន៍ ៤)ឯកឧត្តម ឈិត សុខុន ជារដ្ឋមន្ត្រីក្រសួងធម្មការនិងសាសនា ៥) ឯកឧត្តម ព្រុំ សុខា ជារដ្ឋមន្ត្រីក្រសួងមុខងារសាធារណៈ។
ប្រមុខរាជរដ្ឋាភិបាលកម្ពុជា បានជម្រាបជូនសម្តេចប្រធានរដ្ឋសភា មេត្តាពិនិត្យលើសេចក្តីស្នើសុំនេះ ដោយក្តីអនុគ្រោះ៕ដោយ៖កូឡាប