ភ្នំពេញ៖ ឯកឧត្តម ហ៊ុន ម៉ានីប្រធានគណៈកម្មការទី៧នៃរដ្ឋសភានិងជាប្រធានសហភាពសហព័ន្ធយុវជនកម្ពុជានិងឯកឧត្តម
ឃួង ស្រេង អភិបាលនៃគណៈអភិបាលរាជធានីភ្នំពេញ នាល្ងាចថ្ងៃទី២៧ ខែមីនានេះ បានរួមគ្នា ប្រកាសបើកយុទ្ធនាការផ្សព្វផ្សាយ វិធានការបង្ការនិងទប់ស្កាត់ការរីករាលដាលវីរុសកូរ៉ូណា១៩ (COVID-19) នៅសាលារាជធានីភ្នំពេញ។ ឧបករណ៍ដែលត្រូវប្រគល់ជូននេះ រួមមាន អាកុល ទែម៉ូម៉ែត្រ សាប៊ូ ខិត្តប័ណ្ណនិងម៉ាស់ ដោយផ្ដល់ជូនទៅ
ខណ្ឌចំនួន៥ គឺខណ្ឌចំការមន ខណ្ឌដូនពេញ ខណ្ឌ៧ មករា ខណ្ឌទួលគោក ខណ្ឌបឹងកេងកង និងមន្ទីរសុខាភិបាលរាជធានី។
អភិបាលនៃគណៈអភិបាលរាជធានីភ្នំពេញ ឯកឧត្តម ឃួង ស្រេង បានមានប្រសាសន៍ថា អំណោយដែលជាឧបករណ៍សម្រាប់
ទប់ស្កាត់ វីរុសកូរ៉ូណា១៩ (COVID-19)នេះបានមកពីការជួយឧបត្ថម្ភ ពីវិស័យឯកជននៅក្នុងរាជធានីភ្នំពេញ
ប្រគល់ជូនទៅតាមបណ្តាសង្កាត់ទាំងអស់ នៅក្នុងរាជធានីភ្នំពេញ ដើម្បីបង្ការនិងទប់ស្កាត់នូវជំងឺ វីរុសកូរ៉ូណា១៩ (COVID-19)។
ឯកឧត្តម អភិបាល បានលើកឡើងទៀតថា នេះជាការរួមចំណែក របស់វិស័យឯកជន ដើម្បីចូលរួមទប់ស្កាត់នូវ
វីរុសកូរ៉ូណា១៩ (COVID-19)នេះ ទៅតាមការណែនាំ របស់សម្ដេចអគ្គមហាសេនាបតីតេជោហ៊ុន សែននាយករដ្ឋមន្ត្រីកម្ពុជា។ កិច្ចការងារ មនុស្សធម៌នេះ កម្ពុជាបានធ្វើឡើងយូរហើយ។ ចំពោះកិច្ចការមនុស្សធម៌ ក្នុងកិច្ចការពារនិងទប់ស្កាត់ វីរុសកូរ៉ូណា១៩ (COVID 19)នេះ ត្រឹមតែរយៈខ្លីពេលខ្លីសោះ វិស័យឯកជន ក៏ដូចជាស្ថាប័នរដ្ឋបាន ជួយឧបត្ថមគាំទ្រ ដែលមានទឹកប្រាក់ជួយឧបត្ថម្ភ ប្រមាណ១៤លានដុល្លារហើយ។
អភិបាលរាជធានីភ្នំពេញ ក៏អំពាវនាវឲ្យបងប្អូនប្រជាពលរដ្ឋទាំងអស់ ត្រូវប្រកាន់ខ្ជាប់នូវការងារបី គឺហូបស្អាត ផឹកស្អាត និងរស់នៅស្អាត ដើម្បីជៀសវាងនូវការឆ្លង និងការរីករាលដាលនៃ វីរុសកូរ៉ូណា១៩ (COVID-19)នេះ។
ក្នុងឱកាសនោះដែរ ឯកឧត្តម ហ៊ុន ម៉ានី បានមានប្រសាសន៍ថា ការកើតឡើងនូវវីរុសកូរ៉ូណា១៩ (COVID-19)នេះ មិនមែនតែនៅកម្ពុជានោះទេ វាជារឿងដែលកើតឡើង លើពិភពលោក ដោយមកដល់ពេលនេះ បើគិតតាមអត្រា នៃការឆ្លងរីករាលដាលនៃជំងឺវីរុសកូរ៉ូណា១៩ (COVID-19)នេះ
នៅលើពិភពលោកទាំងមូល មានអ្នកឆ្លងចំនួនរហូត ដល់កន្លះលាននាក់ ក្នុងនោះ២ម៉ឺន៤ពាន់នាក់ បានបាត់បង់ជីវិត ។ ចំណែកឯកម្ពុជាវិញ មានអ្នកដែលឆ្លងជំងឺនេះ មានចំនួន៩៨នាក់ ហើយការងារនេះ យើងបាននិងកំពុងរួមគ្នា ដើម្បីបង្ការទប់ស្កាត់កុំឲ្យបន្តការរីករាលដាលធំជាងនេះទៀត ប៉ុន្ដែទោះបីជាយ៉ាងណា ឯកឧត្តមហ៊ុន ម៉ានី ក៏បានជំរុញឱ្យអាជ្ញាធរភ្នំពេញ អាជ្ញាធរខណ្ឌ សង្កាត់ ក្រៅពីបើកការទប់ស្កាត់ នូវជំងឺដ៏កាចសាហាវនេះហើយ ឯកឧត្តមបានជំរុញឲ្យមានការយកចិត្តទុកដាក់ លើកិច្ចការពារសន្តិសុខ សុវត្ថិភាព ជូនប្រជាពលរដ្ឋឲ្យបានល្អប្រសើរ៕ដោយ៖កូឡាប
