កំពង់ឆ្នាំង ៖ ប៉ូលិស២នាក់ នៃស្នងការដ្ឋាននគរបាលខេត្តត្បូងឃ្មុំ បានផឹកស៊ីទាស់ពាក្យសម្តីនៅក្រៅអង្គភាព និងក្រៅម៉ោងការងារ ឈានទៅដល់ការប្រើប្រាស់អំពើហឹង្សាដាក់គ្នា បណ្តាលឲ្យរបួសរៀងៗខ្លួន ហើយក៏ទៅដេររបួស ដាក់ថ្នាំព្យាបាល នៅមន្ទីរពេទ្យ។
បើតាមការផ្សាយព័ត៌មានរបស់ផេកហ្វេសប៊ុក “វិសិទ្ធ ពត័មាន សំខាន់ថ្មីៗ” កាលពីថ្ងៃទី២៦ខែមីនាឆ្នាំ២០២០ បានឲ្យដឹងថា “សូមគោរពឯកឧត្តម ឧត្តមសេនីយ៍ទោ ប៉ែន រ័ត្ន ស្នងការនគរបាលខេត្តត្បូងឃ្មុំ ពីគ្រួសារខ្ញុំបាទ អ៊ឹម វិសិទ្ធ ជាទីគោរពដោយមានករណីជំលោះហិង្សា ដោយចេតនា មកលើប្អូនប្រុសខ្ញុំឈ្មោះ អ៊ឹម គឹមសែត កាលពីយប់នៅវេលាម៉ោង ៨និង៣០នាទី ថ្ងៃទី២៦ ខែមីនា ឆ្នាំ២០២០ បណ្តាលឲ្យបែកក្បាល់ រយះថ្ពាល់ រយះស្មា និងមានហូរឈាមយ៉ាងច្រើន ពីពេលយប់ រហូតដល់ព្រឹក ទើបបានជួបពេទ្យដេររួច ចំពោះករណីមួយនេះ (ទះដៃម្ខាងវាមិនឮទេ) តែគ្រួសារខ្ញុំបាទ សូមគោរពជូនលោកពូ ជួយរកយុត្តិធម៌ ដល់គ្រួសារខ្ញុំបាទផង។ ធ្វើយ៉ាងណាកុំឲ្យជនបង្កឈ្មោះ គ្រី ចាន់សី វាយធ្វើបាបមកលើបុគ្គលដទៃផ្សេងទៀត លើកក្រោយៗ ឬគាត់អាចអាងខ្នង អាងបក្ខ អាងពួក (តែពេលនេះ ខ្ញុំនិយាយចំពោះបុគ្គលគាត់ប៉ុណ្ណោះ) គ្រួសារខ្ញុំបាទសូមអរគុណលោកពូ ទុកជាមុន ចំពោះយុត្តិធម៌ ត្រូវតែមានសម្រាប់គ្រួសារខ្ញុំបាទ។ សូមគោរពលោកពូស្នងការ គួរពុំគួរសូមអភ័យទោស ដល់គ្រួសារខ្ញុំផងសម្រាប់ប្អូន អ៊ឹម គឹមសែត របួសស្នាម និងគ្រែពេទ្យរបស់គាត់ នឹងជាប់ដានតាមខ្លួនគាត់មួយជីវិត ហើយគាត់និងស្គាល់មិត្តច្បាស់នៅពេលមានទុក”។
ពាក់ព័ន្ធករណីខាងលើនេះ នៅថ្ងៃទី២៧ខែមីនានេះ ស្នងការដ្ឋាននគរបាលខេត្តត្បូងឃ្មុំ សូមជម្រាបជូន សាធារណជនទាំងអស់ ដែលបាននិងកំពុងធ្វើការ Like comment និង shae ចែកចាយបន្តគ្នា នូវព័ត៌មាននេះ ឲ្យបានជ្រាបថា “ករណីនេះផ្តើមចេញពីការផឹកស៊ីទាស់ពាក្យសំដី នៅក្រៅអង្គភាព និងក្រៅម៉ោងការងារ រវាងបុគ្គលទាំង២នាក់នេះ ឈានទៅដល់ការប្រើប្រាស់អំពើហឹង្សាដាក់គ្នា”។
ក្រោយពីទទួលបានព័ត៌មានភ្លាម លោកឧត្តមសេនីយ៍ទោ បែន រ័ត្ន ស្នងការនគរបាលខេត្ត បានបញ្ជាឲ្យកម្លាំងជំនាញព្រហ្មទណ្ឌខេត្ត ធ្វើការ ទទួលពាក្យបណ្តឹង ពីបុគ្គលជាជនរងគ្រោះភ្លាម នាវេលាម៉ោង១២និង២០នាទីរំលងអធ្រាត្រ ឈានចូលថ្ងៃទី២៧ ខែមីនា ឆ្នាំ២០២០នេះ និងធ្វើការកោះហៅអ្នកពាក់ព័ន្ធ ក្នុងវង់ផឹកស៊ីមកបំភ្លឺ នៅការិយាល័យព្រហ្មទណ្ឌខេត្ត ដើម្បីចងក្រងសំណុំរឿងចាត់ការតាមនីតិវីធីច្បាប់ ។ ព្រោះករណីនេះ គឺជារូបវន្តបុគ្គល ដែលត្រូវអនុវត្តច្បាប់ ដូចប្រជាពលរដ្ឋទូទៅដែរ៕ ដោយ៖កូឡាប
