ប្រទេសថៃ៖ សេះចំនួន ៣០ ក្បាល បានងាប់យ៉ាងអាថ៌កំបាំង ស្ថិតនៅភាគឦសាននៃប្រទេសថៃ កាលពីថ្ងៃទី២៧ខែមីនា ម្សិលមិញ។ ទាក់ទងនឹងករណីនេះ សហព័ន្ធជិះសេះនៅប្រទេសថៃ បាននិងកំពុងជំរុញឱ្យអ្នកលេងល្បែងជិះសេះ មិនត្រូវដឹកសត្វណាមួយ រហូតដល់មានមូលហេតុចំពោះរឿងដ៏ចម្លែកនេះត្រូវបានបញ្ជាក់ច្បាស់លាស់។ វាមិនទំនងថាស្ថានភាពមានអ្វីៗអាចជាប់ពាក់ព័ន្ធជាមួយការផ្ទុះឡើងនៃជំងឺវីរុស Covid-19 ។
សេះចំនួន ១០ ក្បាល មានអាការប្រកាច់យ៉ាងខ្លាំង មុនពេលងាប់ និង ២០ ក្បាលទៀត ត្រូវបានគេរាយការណ៍ បានហក់លោតយ៉ាងអន្ទះអន្ទែង មុនពេលពួកវាដួលប្រកាច់ងាប់។
នៅពេលនេះ ខាងពេទ្យសត្វកំពុងធ្វើកោសល្យវិច័យ ដើម្បីព្យាយាមរកឱ្យឃើញនូវអ្វីដែលបានកើតឡើង។
សហព័ន្ធមានការព្រួយបារម្ភថា ជំងឺរួមគ្នាអាចជាបុព្វហេតុបង្កឲ្យកើតមានករណីនេះ ហើយបានស្នើសុំឱ្យនាយកដ្ឋានអភិវឌ្ឍន៍បសុសត្វ និងទីភ្នាក់ងាររដ្ឋាភិបាលដទៃទៀត ធ្វើការស៊ើបអង្កេតលើបញ្ហានេះជាបន្ទាន់៕
ប្រែសម្រួល៖ លឹម ហុង (ប្រភព៖ The Nation)