ព្រះសីហនុ-កំពត៖នៅចាំបានទេ ក្នុងឱកាសសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អញ្ជើញជួបសំណេះសំណាលជាមួយគ្រូពេទ្យស្ម័គ្រចិត្តប្រមាណជា ៤២២នាក់ មុននឹងពួកគេចេញបេសកកម្មជាមួយក្រសួងសុខាភិបាល ដើម្បីប្រយុទ្ធជាមួយជំងឺកូវីដ-១៩ (COVID-19) ក្នុងនោះសម្តេចបានមានប្រសាសន៍អំពាវនាវដល់ជនរួមជាតិ សូមបញ្ឈប់ចំពោះការរើសអើងជាតិសាសន៍ សម្រាប់ពេលនេះ ព្រោះថា គ្មានជាតិសាសន៍ណា ដែលចង់ឲ្យខ្លួនរបស់ពួកគេកើតមានជំងឺកូវីដ-១៩ នេះទេ ពួកគេក៏ចេះចង់រស់រានមានជីវិតដូចដែលយើងគ្រប់គ្នាផងដែរ ។
ទោះយ៉ាងណា ជំងឺនៃការរើសអើងរបស់មនុស្សមួយចំនួន នៅតែកើតមានដដែល ដោយសារតែជំងឺភ័យខ្លាចកូវីដ-១៩ ជ្រុលហួសហេតុ ធ្វើឲ្យពួកគេបាត់បង់នូវគុណធម៌ជាមនុស្ស ។ ជាក់ស្តែងថ្មីៗនេះ ជនបរទេសចំនួន ៣ នាក់ ត្រូវបានអ្នកលក់ម្ហូបអាហារនៅចំណុចផ្លូវបំបែកក្រុងព្រះសីហនុ-កំពត រើសអើងដល់ថ្នាក់អត់លក់បាយឲ្យពួកគាត់ ដែលធ្វើឲ្យពួកគាត់ដាច់បាយដាច់ទឹកគួរឲ្យអាសូរ ជាពន់ពេក។
ក្រោយទទួលដំណឹងដ៏ខ្លោចចិត្តនេះ ឯកឧត្តម វិល្លាម ប្រធានគណបក្សខ្មែរក្រោក ក៏បានចុះទៅផ្ទាល់ ដើម្បីជួយសម្រួលការហូបចុកដល់ពួកគាត់ ក្នុងនោះ ឯកឧត្តមក៏បានផ្តល់បាយ និងផ្លែឈើបន្តិចបន្តួច ដល់ពួកគាត់អាចដោះស្រាយបានមួយពេលផងដែរ ៕ ដោយ៖ លឹម ហុង