ភ្នំពេញ៖ ភាគីចិននឹងបន្តផ្តល់រាល់ជំនួយ ទៅតាមលទ្ធភាពជូនដល់ភាគីកម្ពុជា ជួយជាកម្លាំងទាំងស្រុង ដល់ភាគីកម្ពុជាក្នុងការប្រយុទ្ធប្រឆាំង យកជម្នះជាមួយនឹងជំងឺវីរុសកូវីដ១៩ ។ ឯកអគ្គរដ្ឋទូតចិនប្រចាំកម្ពុជា បានប្រគល់សារធាតុតេស្តរកជំងឺវីរុសកូវីដ១៩ ចំនួន២០.០០០សម្រាប់ ដែលផ្តល់ដោយមូលនិធិJack Ma និងមូលនិធិAlibaba ជូនដល់កម្ពុជា។
ស្ថានទូតចិនប្រចាំកម្ពុជា បានចេញប្រកាសព័ត៌មានថា នាថ្ងៃទី២៨ ខែមីនា ឯកឧត្តម Wang Wentian ឯកអគ្គរដ្ឋទូតចិនប្រចាំកម្ពុជា បានប្រគល់ប្រអប់សារធាតុតេស្តរកជំងឺវីរុសCOVID-19(Detection Reagent)ចំនួន២០.០០០សម្រាប់ ដែលផ្តល់ដោយមូលនិធិJack Ma និងមូលនិធិAlibaba ជូនដល់ឯកឧត្តមសាស្ត្រាចារ្យវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជា។
ឯកឧត្តម ឯកអគ្គរដ្ឋទូត មានប្រសាសន៍ថា ចិន និងកម្ពុជា ជាសហគមន៍ជោគវាសនារួម ដែលរួមសុខរួមទុក្ខជាមួយគ្នា ក៏ជាបងប្អូនល្អដែលប្រៀបដូចដៃនិងជើង ហើយភាគីចិនបច្ចុប្បន្ននេះ ក៏មានអារម្មណ៍ដូចភាគីកម្ពុជាដែរ។ ដើម្បីជួយបង្កើនសមត្ថភាពពិនិត្យរកជំងឺវីរុសCOVID-19 ស្ថានទូតចិនប្រចាំកម្ពុជា បានសម្របសម្រួលជាមួយមូលនិធិJack Ma និងមូលនិធិAlibabaជាបន្ទាន់ ដើម្បីធ្វើការផ្តល់នូវសារធាតុតេស្តរកជំងឺវីរុសមួយចំនួនជូនដល់ភាគីកម្ពុជា សង្ឃឹមថា វាអាចជួយជាកម្លាំងគាំទ្រជូនដល់ភាគីកម្ពុជា ក្នុងការប្រយុទ្ធប្រឆាំងនឹងជំងឺវីរុសប្រភេទថ្មីមួយនេះ។ ភាគីចិននឹងបន្តផ្តល់រាល់ជំនួយ ទៅតាមលទ្ធភាពជូនដល់ភាគីកម្ពុជា ជួយជាកម្លាំងទាំងស្រុង ដល់ភាគីកម្ពុជាក្នុងការប្រយុទ្ធប្រឆាំង យកជម្នះជាមួយនឹងជំងឺវីរុសប្រភេទថ្មីនេះ។
ឯកឧត្តមសាស្ត្រចារ្យវេជ្ជបណ្ឌិត បានថ្លែងអំណរគុណយ៉ាងជ្រាលជ្រៅ ជូនដល់ឯកឧត្តម ឯកអគ្គរដ្ឋទូតចិន និងស្ថានទូតចិនប្រចាំកម្ពុជា ដែលបានសម្របសម្រួល ក្នុងជំនួយសារធាតុតេស្តរកជំងឺវីរុសលើកនេះ លោកមានប្រសាសន៍ថា ក្រោយពីកម្ពុជាមានការផ្ទុះឡើងនូវជំងឺវីរុសCOVID-19 ភាគីចិន បានជំនួយសម្ភារប្រយុទ្ធប្រឆាំងនឹងជំងឺវីរុសជាច្រើន និងបានចាត់ក្រុមអ្នកជំនាញវេជ្ជសាស្ត្រចិន នេះបានជួយបង្កើនជំនឿចិត្ត ក្នុងការប្រយុទ្ធប្រឆាំងនឹងជំងឺវីរុសជូនដល់កម្ពុជា។ ភាគីកម្ពុជានឹងចងចាំរាល់ការជួយរបស់ភាគីចិន ក្នុងក្រអៅបេះដូង នឹងសហការទំនាក់ទំនង ជាមួយភាគីចិនយ៉ាងស្អិតល្មួត ដើម្បីយកជម្នះលើកិច្ចប្រយុទ្ធប្រឆាំងនឹងជំងឺវីរុសក្នុងពេលឆាប់ៗនេះ។
លោក Wang Dexin ប្រធានផ្នែកនយោបាយនៃស្ថានទូតចិនប្រចាំកម្ពុជា និងមន្ត្រីទូតផ្សេងទៀតអញ្ជើញមានវត្តមានក្នុងពិធីនេះ៕ដោយ៖កូឡាប