កំពង់ស្ពឺ ៖ ស្នងការដ្ឋាននគរបាលខេត្តកំពង់ស្ពឺ នៅថ្ងៃទី២៨ខែមីនានេះ បានចេញប្រកាសព័ត៌មានថា ជនសង្ស័យម្នាក់បាត់អាជីពដោយសារកម្លាំងនគរបាលអធិការដ្ឋានស្រុកឧដុង្គ ស្រាវជ្រាវបង្ក្រាប ភ្លាមៗធ្វើឱ្យដាច់ម៉ូយដែលតែងតែមករកកន្លែងប្រើប្រាស់គ្រឿងញៀន។
សូមបញ្ជាក់ថា កាលពីវេលាម៉ោង១៥ថ្ងៃទី២៧ ខែមីនា ឆ្នាំ២០២០ ទទួលបានសេចក្ដីរាយការណ៍ពីប្រជាពលរដ្ឋថា នៅចំណុចផ្ទះរបស់ឈ្មោះ ទ្រី ឡិន ភេទប្រុស អាយុ៣០ឆ្នាំ រស់នៅភូមិក្រាំងទំនប់ ឃុំចាន់សែន ស្រុកឧដុង្គ ខេត្តកំពង់ស្ពឺ តែងតែឃើញក្រុមក្មេងចេញ ចូល ដោយមានការសង្ស័យថាជាទីតាំងប្រើប្រាស់និងជួញដូរគ្រឿងញៀន ដោយមានការចង្អុលណែនាំពីរលោកឧត្ដមសេនីយ៍ទោ សម សាមួន ស្នងការនគរបាលខេត្ត កម្លាំងអធិការដ្ឋាននគរបាលស្រុកឧដុង្គ បានបើកប្រតិបត្ដិការស្រាវជ្រាវ និងឈានទៅបង្ក្រាបឃាត់បានមុខសញ្ញាសង្ស័យចំនួន ១នាក់១.ឈ្មោះ ទ្រី ឡិន ជាម្ចាស់ទីតាំង និងបានស្នើសុំគោលការណ៍ឆែកឆេរបន្ដ រកឃើញម្សៅក្រាមពណ៌សសង្ស័យជាគ្រឿងញៀនចំនួន ៤កញ្ចប់ (១មធ្យម ៣តូច) ច្រកថង់ផ្លាស្ទិច ថង់សម្រាប់ច្រកគ្រឿងញៀនដាវចំនួន ៧ដើម កាំបិតផ្គាក់ ១០ដើម កាំភ្លើងកែច្នៃប្រើខ្យល់ចំនួន២ដើម ទូរស័ព្ទដៃ១គ្រឿង និងឧបករណ៍កែច្នៃសម្រាប់ប្រើប្រាស់គ្រឿងញៀនមួយចំនួនទៀត ។
យោងតាមចម្លើយបឋមជនសង្ស័យបានសារភាព និងទទួលថា វត្ថុតាងនេះ គឺជារបស់ខ្លួននិងជាឧបករណ៍ទុកប្រើប្រាស់លក់ឲ្យអ្នកដែលមករកការទិញទុកប្រើប្រាស់ “គ្រឿងញៀន ” ច្រកកញ្ចប់តូចៗ កាំបិត ទាវ ទុកលក់ជូន ។
បច្ចុប្បន្នជនសង្ស័យ រួមជាមួយវត្ថុតាង ផ្នែកគ្រឿងញៀន អធិការដ្ឋាននគរបាលស្រុក បានកសាងសំណុំរឿងបញ្ជូនទៅកាន់ជំនាញស្នងការនគរបាលខេត្ត ដើម្បីចំណាត់ការតាមនីតិវិធីគឺច្បាប់៕ដោយ៖បញ្ញាស័ក្តិ