ភ្នំពេញ៖ ក្រសួងសុខាភិបាល បានចេញសេចក្តីអំពាវនាវដល់ប្រជាពលរដ្ឋគ្រប់រូបកុំឱ្យប្រើឧបករណ៍ តេស្តរកជំងឺកូវីដ១៩ ដោយខ្លួនឯង និងសុំឱ្យសមត្ថកិច្ចចាត់វិធានការច្បាប់ ចំពោះអ្នកផ្សព្វផ្សាយប្រើឧបករណ៍តេស្តរហ័សនេះ ។
ក្រសួងជំនាញ បានចេញប្រកាសបែបនេះ បន្ទាប់ពីលោកឧកញ៉ា ហេង ឡុង បានទិញឧបករណ៍តេស្តរកជំងឺកូវីដ១៩ មកធ្វើតេស្តដោយខ្លួនឯង ហើយលោកឧកញ៉ា បានបញ្ជាក់ថា បានឆែករកជំងឺកូវីដ១៩ ដោយខ្លួនឯង គឺលទ្ធផលអវិជ្ជមាន។
ក្រសួងសុខាភិបាលនៅព្រឹកថ្ងៃទី២៩ខែមីនាឆ្នាំ២០២០នេះ បានបញ្ជាក់ថា “មិនត្រូវប្រើប្រាស់ឧបករណ៍ធ្វើតេស្តរកវីរុសកូវីដ ( Rapid Test) ដោយខ្លួនឯង”។
ក្រសួងសុខាភិបាល សូមអំពាវនាវដល់បងប្អូនប្រជាពលរដ្ឋ សូមកុំប្រើប្រាស់ឧបករណ៍ធ្វើតេសត្តរហ័សរក វីរុសកូវីដ ១៩ (Rapid Test) ជាមធ្យោបាយក្នុងការរកវីរុសកូវីដ១៩ ដោយខ្លួនឯងឲ្យសោះ។ បច្ចុប្បន្ន មានការផលិតឧបករណ៍ធ្វើតេស្តរហ័សច្រើន តែរហូតដល់ពេលនេះ នៅមិនទាន់មានឧបករណ៍ធ្វើតេស្តរហ័សរកមេរោគកូវីដ១៩ ប្រភេទណាមួយ ដែលមានការបញ្ជាក់ទទួលស្គាល់ ពីអង្គការសុខភាពពិភពលោក នូវភាពត្រឹមត្រូវ និងប្រសិទ្ធភាពនៃការធ្វើតេសត្តរហ័យរកវីរុសកូវីដ១៩នេះនៅឡើយទេ ជាពិសេស ប្រសិទ្ធភាពនៃការធ្វើតេស្តរហ័សបែបនេះ គឺនៅទាបណាស់ ហើយក៏មានការចេញលទ្ធផលមក មិនច្បាស់លាស់ច្រើនណាស់ដែរ (អ្នកដែលមិនមានមេរោគ បែរទៅជាមានលទ្ធផលវិជ្ជមាន រីឯអ្នកមានមេរោគ បែរទៅជាមានលទ្ធផលមិនមានវីរុសកូវីដ១៩)។ម្យ៉ាងវិញទៀត ឧបករណ៍សម្រាប់ធ្វើតេស្តរហ័សបែបនេះ មិនទាន់មានការទទួស្គាល់ពីក្រសួងសុខាភិបាល ហើយជនណាដែលប្រើឧបករណ៍សម្រាប់តេស្តរហ័សរកមេរោគកូវីដ១៩ មកផ្សព្វផ្សាយជាសាធារណៈ ដោយគ្មានការអនុញ្ញាត ពីក្រសួងសុខាភិបាល នឹងត្រូវផ្តន្ទាទោសតាមផ្លូវច្បាប់ជាធរមាន។
ក្រសួងសុខាភិបាល សូមអំពាវនាវសូមបងប្អូនប្រជាពរដ្ឋ កុំប្រើប្រាស់ឧបករណ៍ ឬការផ្សព្វផ្សាយខុសច្បាប់ មួយចំនួនបែបអនាធិបតេយ្យ។ ក្រសួងសូមបញ្ជាក់ជូនសារជាថ្មីថា មានតែវិទ្យាស្ថានជាតិស្រាវជ្រាវសាធារណៈ និងវិទ្យាស្ថានប៉ាស្ទ័រកម្ពុជា ដែលកំពុងប្រតិបត្តិការ តាមបច្ចេកទេស និងគោលការណ៍ប្រតិបត្តិស្តង់ដារ របស់អង្គការសុខាភាពពិភពលោក ដែលមានការចេញលទ្ធផលទទួលស្គាល់ត្រឹមត្រូវ។
ក្រសួងក៏សូមធ្វើការអំពាវនាវ ដល់អាជ្ញាធរពាក់ព័ន្ធ ចូលរួមចាត់វិធានការតាមផ្លូវច្បាប់ជាធរមាន យ៉ាងម៉ឺងម៉ាត់ជាទីបំផុត ចំពោះបុគ្គល ឬក្រុមហ៊ុនណា ដែលផ្សព្វផ្សាយឧបករណ៍ ធ្វើតេស្តរហ័សរកមេរោគកូវីដ១៩ ដោយមិនមានការអនុញ្ញាតពីក្រសួងសុខាភិបាល។
សូមបញ្ជាក់ថា កាលពីថ្ងៃទី២៨ ខែមីនា ឆ្នាំ២០២០ លោកឧកញ៉ា ហេង ឡុង បានសរសេរសារលើហ្វេសប៊ុកថា “ខ្ញុំបានឆែករកជំងឺកូវីដ១៩ ដោយខ្លួនឯង ។ លទ្ធផលចេញមកអវិជ្ជមាន ។ យប់នេះនឹងបង្ខំចន ច័ន្ទលក្ខិណា ឆែកដែរហើយ ។ បងប្អូនមើលរង្វង់ខៀវ បើសិនជា២ឆ្នូត នោះនឹងមានផ្ទុកកូវីដ១៩ហើយ ។ ជូនពរឲ្យបងប្អូនទាំងអស់គ្នា គេចផុតពីជំងឺដ៏កាចសាហាវមួយនេះ ( ពិនិត្យខ្លួនឯងក្រៅផ្លូវការ មិនទាន់ទទួលស្គាល់ ដោយក្រសួងសុខាភិបាលឡើយ”។
សូមបញ្ជាក់ថា គិតត្រឹមព្រឹកថ្ងៃទី២៩ ខែមីនា ឆ្នាំ២០២០នេះ អ្នកឆ្លងជំងឺកូវីដ១៩ នៅកម្ពុជា មានចំនួនសរុប ១០៣នាក់ ក្នុងនោះព្យាបាលជា ២១នាក់ហើយ៕ដោយ៖កូឡាប