ក្រចេះ៖ រថយន្តស៊េរីទំនើប ផ្ទុកឈើប្រណីតប្រភេទគ្រញូងពេញ ត្រូវកងរាជអាវុធហត្ថក្រុងក្រចេះ ស្ទាក់ចាប់បាន កាលពីវេលាម៉ោង២៣និង៣០នាទី ថ្ងៃទី២៨ ខែមីនា ឆ្នាំ២០២០ នៅចំណុច រង្វង់មូលខ្លាស្ទុះ ដែលស្ថិតនៅចំណុចក្នុងភូមិ កាប៉ូ សង្កាត់ អូរឬស្សី ក្រុងក្រចេះ ខេត្តក្រចេះ ខណៈក្រុមឈ្មួញបម្រុងដឹកលោតឆត្រឆ្លងកាត់ព្រំដែនខេត្តក្រចេះ ទៅវៀតណាម ទោះបីជាអាជ្ញាធរកម្ពុជានិងវៀតណាម បិទច្រកព្រំដែន ទប់ស្កាត់ការរីករាលជំងឺកូរ៉ូណាក៏ដោយ។
លោកវរសេនីយ៍ត្រី ផាត សុភ័ក្ត្រវាសនា មេបញ្ជាការអាវុធហត្ថក្រុងក្រចេះ ដែលដឹកនាំប្រតិបត្តិការនេះ បានឲ្យដឹងថា ដោយយោងតាមបទបញ្ជារបស់លោកឧត្តមសេនីយ៍ត្រី សាន្ត ប៊ុនថាន មេបញ្ជាការខេត្ត កម្លាំងកងរាជអាវុធហត្ថក្រុង បានអនុវត្តយ៉ាងម៉ឺងម៉ាត់ ក្នុងកិច្ចការងារស្រាវជ្រាវ និងបង្ក្រាប បទល្មើសព្រៃឈើ ជាបន្តប ទទួលបានជោគជ័យ និងមានប្រសិទ្ធភាព។ រថយន្តទាំង២គ្រឿងនោះ ម៉ាក HIGHLANDER ពណ៌ខ្មៅ ពាក់ផ្លាកលេខ ភ្នំពេញ 2N 4146 និងរថយន្តម៉ាក CAMRY បាឡែន ពណ៌ទឹកប្រាក់ ពាក់ផ្លាកលេខ ភ្នំពេញ 2H 5407 ។
បច្ចុប្បន្ន វត្ថុតាងរក្សាទុក នៅមូលដ្ឋានកងរាជអាវុធហត្ថក្រុងក្រចេះដើម្បីបន្តនីតិវិធី ដោយពុំទាន់ធ្វើការវាស់វែងឈើ រកចំនួនប៉ុន្មានម៉ែត្រគូបនៅឡើយទេ។
ប៉ុន្តែទោះយ៉ាងណា សមត្ថកិច្ចពុំដែលចាប់បាន ឈ្មួញឈើ ឬតៃកុងរថយន្តដឹកឈើនោះទេ គឺពួកគេ បានរត់គេចបាត់ មុនសមត្ថកិច្ចទៅដល់៕ដោយ :កូឡាប
