ភ្នំពេញ៖ មានសារសំឡេងដែលកំពុងចែកចាយតាម Messenger និងគ្រុប Social Media មួយចំនួនទៀតក្នុងរយៈពេលប៉ុន្មានម៉ោងចុងក្រោយនេះថា នឹងមានការបិទក្រុងភ្នំពេញ។ ពាក់ព័ន្ធនឹងករណីអ្នកនាំពាក្យរដ្ឋបាលរាជធានីភ្នំពេញ បានថ្លែងប្រាប់អ្នកសារព័ត៌មានតាមរយៈបណ្តាញសង្គមតេឡេក្រាម នៅថ្ងៃអាទិត្យ ទី២៩ខែមីនាឆ្នាំ២០២០នេះថា រហូតមកដល់រសៀលថ្ងៃអាទិត្យ មិនមានការបិទក្រុងភ្នំពេញនោះទេ គឺជាការប្រឌិតព័ត៌មានក្លែងក្លាយ ក្នុងចេតនាបង្កចលាចលវឹកវរក្នុងសង្គម និងក៏ជាចេតនាធ្វើឲ្យមានការសម្រុកទិញទំនិញ មកស្តុកបម្រុងទុក ដែលនាំឲ្យជនឆ្លៀតឱកាសឡើងតម្លៃថ្លៃ។
លោកម៉េត មាសភក្តី ក្នុងនាមអ្នកនាំពាក្យរដ្ឋបាលរាជធានីភ្នំពេញ “ខ្ញុំសូមជម្រាបជូនបងប្អូនប្រជាពលរដ្ឋ ក៏ដូចជាអ្នកសារព័ត៌មានទាំងអស់មេត្តាជ្រាបថា សារសំឡេងដែលកំពុងចែកចាយតាម Messenger និងគ្រុប Social Media មួយចំនួនទៀត ក្នុងរយៈពេលប៉ុន្មានម៉ោងចុងក្រោយនេះថា នឹងមានការបិទក្រុងនោះ ជាការប្រឌិតព័ត៌មានក្លែងក្លាយ ក្នុងចេតនាបង្កចលាចលវឹកវរក្នុងសង្គមតែប៉ុណ្ណោះ និងក៏ជាចេតនាធ្វើឲ្យមានការសម្រុកទិញទំនិញ មកស្តុកបម្រុងទុក ដែលនាំឲ្យជនឆ្លៀតឱកាសឡើងតម្លៃថ្លៃផងដែរ”។
រដ្ឋបាលរាជធានីភ្នំពេញ សូមច្រានចោលព័ត៌មានក្លែងក្លាយនេះទាំងស្រុង និងសូមអំពាវនាវជនរួមជាតិទាំងអស់មេត្តាកុំជឿ និងកុំបន្តចែកចាយ នាំមានការយល់ច្រឡំដល់ប្រជាពលរដ្ឋដទៃទៀត ហើយចូលរួមទប់ស្កាត់ ការចរាចរព័ត៌មានអកុសលទាំងនេះ ដោយសហការផ្តល់អត្តសញ្ញាណជនល្មើស ឈានដល់ការឃាត់ខ្លួនមកផ្តន្ទាទោសតាមច្បាប់៕ដោយ៖កូឡាប