ភ្នំពេញ ៖ ស្ថិតនៅក្នុងស្ថានភាព ដែលប្រជាពលរដ្ឋកម្ពុជាមានការព្រួយបារម្ភចំពោះការឆ្លងរីករាលដាលនៃជំងឺកូវីដ-១៩ នៅលើពិភពលោក ក៏ដូចជានៅកម្ពុជា ឯកឧត្តមបណ្ឌិត ថោង ខុន ប្រធានគណៈកម្មាធិការជាតិអូឡាំពិកកម្ពុជា បានអំពាវនាវដល់ប្រជាពលរដ្ឋ ក៏ដូចជសកីឡាករកីឡាការិនីទូទាំងប្រទេស សូមមានការប្រុងប្រយ័ត្នខ្ពស់បំផុត ដោយរក្សានូវអនាម័យគ្រប់ពេលវេលា គឺលាងសម្អាតដៃជាប្រចាំ ពាក់ម៉ាស់ ដើម្បីការពារការឆ្លងរីករាលដាល នៅក្នុងមូលដ្ឋាន។ ការអំពាវនាវរបស់ប្រធានគណៈកម្មាធិការជាតិអូឡាំពិកកម្ពុជា បានធ្វើឡើងក្នុងពេលដែលឯកឧត្តមបណ្ឌិតចូលរួមលេងកីឡាវាយកូនគោល នៅទីលានហ្គ្រែនភ្នំពេញ។
ឯកឧត្តមបណ្ឌិត ថោង ខុន មានប្រសាសន៍ថា ការរក្សាអនាម័យខ្ពស់តាមការអំពាវនាវរបស់ក្រសួងសុខាភិបាល វានឹងជួយឲ្យយើងអាចការពារបានក្នុងកម្រិតខ្ពស់បំផុតពីការឆ្លងរាលដាលនៃជំងឺកូវីដ-១៩ ហើយអ្វីដែលពិសេសទៅទៀតនោះ គឺធ្វើលំហាត់ប្រាណ លេងកីឡាជាប្រចាំ ដើម្បីថាមពលកម្លាំងកាន់តែរឹងមាំ និងធ្វើឲ្យសុខភាពយើងល្អ អាចទប់ស្កាត់ការកើតជំងឺមួយចំនួនផងដែរ។ ទន្ទឹមជាមួយគ្នានេះ ប្រធានអូឡាំពិកកម្ពុជាក៏បានអំពាវនាវយ៉ាងទទូច ចំពោះបងប្អូនពលករ ដែលទើបត្រឡប់មកពីបម្រើការងារនៅក្រៅប្រទេស សូមស្តាប់តាមការណែនាំរបស់ក្រសួងសុខាភិបាល ត្រូវនៅដាច់ដោយឡែកពីក្រុមគ្រួសាររយៈពេល១៤ថ្ងៃ តាមដានជំងឺកូវីដ-១៩ ដើម្បីការពារកុំឲ្យមានករណីឆ្លង។
ជាមួយគ្នានេះ ឯកឧត្តមបានផ្តាំផ្ញើដល់កីឡាករ កីឡាការិនី ដែលរំសាយពីក្រុមជម្រើសជាតិបណ្តោះអាសន្ន ទៅកាន់គេហដ្ឋានរៀងៗខ្លួន តាមសេចក្តីប្រកាសរបស់ក្រសួងអប់រំ យុវជន និងកីឡា សូមរក្សាសុខភាពឲ្យបានល្អ ពិសេសអនុវត្តការការពារអនាម័យលាងដៃនឹងសាប៊ូ ឬអាកុល និងហ្វឹកហាត់កីឡានៅតាមផ្ទះរៀងៗខ្លួនជាប្រចាំ ដើម្បីបង្កើនសិទ្ធផលកុំឲ្យធ្លាក់ចុះខ្លាំងពេក នៅក្នុងឱកាសសម្រាក អំឡុងកកើតឡើងនូវជំងឺកូវីដ-១៩។
គួរបញ្ជាក់ថា ដោយសារតែបញ្ហាជំងឺកូវីដ-១៩ សាលារៀនគ្រប់កម្រិតទូទាំងប្រទេសត្រូវបានក្រសួងអប់រំប្រកាសផ្អាកជាបណ្តោះអាសន្ន ពិសេសកម្មវិធីជួបជុំធំៗ ក្នុងស្ថាប័នរដ្ឋ និងឯកជន បានប្រកាសលុបចោលដោយសារខ្លាចឆ្លងជំងឺកូវីដ-១៩នេះ ។
រហូតម៉ោង ៨:២០នាទីព្រឹក ថ្ងៃទី ២៩ មីនា ២០២០ រកឃេីញអ្នកជំងឺ COVID-19 ១នាក់ទៀត (ភេទស្រីជនជាតិខ្មែរប៉ះពាល់ផ្ទាល់ជាមួយអ្នកជំងឺវិជ្ជមាន COVID-19)សរុបទាំងអស់ប្រទេសយេីងមានចំនួន ១០៣ ករណី និង យេីងបានព្យាបាលជាសះស្បេីយចំនួន ៨នាក់ទៀត សរុប ២១នាក់ ស្លាប់គ្មាន ។ យេីងពុំទាន់រកឃេីញភ័ស្តុតាងបញ្ជាក់ថាមានការឆ្លងក្នុងសហគមន៍នៅឡេីយទេ តែលទ្ធភាពនឹងអាចកេីតមានឡេីង ៕ដោយ៖កូឡាប
គណៈកម្មាធិការជាតិអូឡាំពិកកម្ពុជា (NOCC) ចេញសេចក្តីជូនដំណឹង ស្តីពីដំបូន្មាន ក្នុងដំណាក់កាលផ្អាកសកម្មភាពហ្វឹកហាត់ សម្រាប់កីឡាករ កីឡាការិនីជម្រើសជាតិ ដែលមានខ្លឹមសារទាំងស្រុងដូចខាងក្រោម៖
