ភ្នំពេញ៖ មានមន្ត្រីខិលខូចមួយចំនួន និងអ្នកមានអំណាចមួយចំនួន កំពុងតែរីករាយ និងឆ្លៀតឱកាសបំពានដីធ្លីរបស់រដ្ឋ និងពលរដ្ឋរួមទាំងធ្វើទុក្ខបុកម្នេញអ្នកទន់ខ្សោយ ក្នុងពេលដែលស្ថានភាពកូវីត១៩ កំពុងតែបង្ករភាពមមាញឹកដល់គ្រប់ស្ថាប័ន នៃប្រទេសកម្ពុជាជាពិសេសក៏មានក្រុមពាណិជ្ជករ ខ្វះមនសិការ ខ្លះក៏កំពុងឆ្លៀតឱកាស កេងប្រយោជន៍ផងដែរ ក្នុងពេលនេះ។
នេះបើតាមការបញ្ជាក់របស់ឯកឧត្តមវិល្លាម ប្រធានគណបក្សខ្មែរក្រោក និងជាសមាជិកឧត្តមក្រុមប្រឹក្សានិងពិគ្រោះយោបល់បានចេញសារនៅថ្ងៃទី៣០ខែមីនាឆ្នាំ២០២០។
ឯកឧត្តម បានថ្លែងថា តែកុំសង្ឃឹមថារួចខ្លួនឲ្យសោះ ព្រោះស្ថានភាពចាប់ផ្ដើមល្អប្រសើរម្ដងបន្តិចហើយ ដោយថ្ងៃនេះតួលេខនៃកំណើនអ្នកឆ្លង គឺមានតិច ឯតួលេខនៃកំណើនអ្នកជាសះស្បើយពីជំងឺកូវីដ១៩ មានចំនួនច្រើន ។
ឯកឧត្តម បានលើកឡើងថា “ដោយឡែកកន្លងមកនេះ ខ្ញុំសង្កេតឃើញមានភាពអវិជ្ជមាន និងភាពអសកម្មខ្លះៗ របស់មន្ត្រីពាក់ព័ន្ធនានាមួយចំនួនតូច ក្នុងការអនុវត្តន៍បេសកម្មប្រយុទ្ធប្រឆាំងនឹងជំងឺកូវីដ១៩ តែជាសីលធម៌នយោបាយ ខ្ញុំមិនទាន់ធ្វើការរិះគន់នាពេលនេះទេដោយមានតែលើកទឹកចិត្តចូលរួមគ្នា ដោះស្រាយបញ្ហាចំពោះមុខជាមុនសិន តែក្រោយស្ថានការប្ដូរមកជាល្អវិញគ្រប់យ៉ាងក៏នឹងត្រូវលាតត្រដាងដដែល “៕ដោយ៖បញ្ញាស័ក្តិ