ភ្នំពេញ៖ កងកម្លាំងសមត្ថកិច្ច បានឃាត់ខ្លួនស្ត្រីម្នាក់ ជាប់ពាក់ព័ន្ធនឹងការបង្ហោះលក់ឧបករណ៍ធ្វើតេស្តរកវីរុស Covid-19តាមប្រព័ន្ធអនឡាញ ។ ស្ត្រីរូបនោះ ឈ្មោះ វ៉ា វួចគៀង បាន ប្រើប្រាស់ page facebook មានឈ្មោះ Rama Brand Shop បង្ហោះផ្សព្វផ្សាយលក់ឧបករណ៍ធ្វើតេស្តរកវីរុស Covid-19 ហើយ បានរៀបរាប់ ថា គ្រាន់តែជួយបង្ហោះផ្សព្វផ្សាយពាណិជ្ជកម្មដើម្បីលក់ឧបករណ៍ខាងលើនេះ ឲ្យឈ្មោះ ម៉ូនីតា សុខ រស់នៅសហរដ្ឋអាមេរិក តែប្រសិនបើ មានអ្នកកុម្មង់ទិញ ខ្លួននឹង chat ដើម្បីទទួលឥវ៉ាន់យកមកលក់បន្ត។
ដោយទទួលបានបទបញ្ជាពី លោក ជា ពិសី ប្រធានគណៈបញ្ជាការឯកភាពខណ្ឌ និងជាអភិបាលខណ្ឌប្ញស្សីកែវ ថ្ងៃអាទិត្យ ទី២៩ ខែមីនា ឆ្នាំ២០២០ វេលាម៉ោង ១៨ និង ០០ នាទី គណៈបញ្ជាការឯកភាព ខណ្ឌប្ញស្សីកែវ ដឹកនាំដោយ លោកស្រី សួស សូលីដា អភិបាលរងខណ្ឌ ដោយមានការការចូលរួមសម្របសម្រួលពី លោក ស៊ិត វណ្ណៈ ព្រះរាជអាជ្ញារងអមសាលាដំបូងរាជធានីភ្នំពេញ ព្រមទាំងមានការចូលរួមពី លោក ស៊ូ សារ៉ាត់ នាយករងរដ្ឋបាលខណ្ឌ លោក ហ៊ាង ថារ៉េត អធិការនគរបាលខណ្ឌ អធិការរងខណ្ឌ មន្ត្រីនគរបាលខណ្ឌ-សង្កាត់ និងតំណាងអាជ្ញាធរសង្កាត់ គីឡូម៉ែត្រលេខ៦ បានចុះទៅដល់ទីតាំងមួយកន្លែង ដែលជាប់ពាក់ព័ន្ធនឹងការបង្ហោះ លក់ឧបករណ៍ធ្វើតេស្តរកវីរុស Covid-19 នៅចំណុចផ្ទះជួលលេខ៥ ក្រុមទី៦ ភូមិបឹងឈូក សង្កាត់ គីឡូម៉ែត្រលេខ៦ ខណ្ឌប្ញស្សីកែវ រាជធានីភ្នំពេញ ដោយមានឈ្មោះ វ៉ា វួចគៀង ភេទស្រី អាយុ ២៦ ឆ្នាំ មុខរបរលក់ឥវ៉ាន់តាមប្រព័ន្ធអនឡាញ ជាម្ចាស់ផ្ទះជួល។ ឈ្មោះ វ៉ា វួចគៀង បាន ប្រើប្រាស់ page facebook មានឈ្មោះ Rama Brand Shop បង្ហោះផ្សព្វផ្សាយលក់ឧបករណ៍ធ្វើតេស្តរកវីរុស Covid-19 ដោយគ្មានច្បាប់អនុញ្ញាតពីក្រសួងសុខាភិបាល។
អភិបាលខណ្ឌឫស្សីកែវ បានថ្លែងថា ជាលទ្ធផល គណៈបញ្ជាការឯកភាពខណ្ឌ រកឃើញថា ឈ្មោះ វ៉ា វួចគៀង បានរៀបរាប់ថា ខ្លួនគ្រាន់តែជួយបង្ហោះផ្សព្វផ្សាយពាណិជ្ជកម្ម ដើម្បីលក់ឧបករណ៍ខាងលើនេះ ឲ្យឈ្មោះ ម៉ូនីតា សុខ ប៉ុណ្ណោះ ដែលកំពុងរស់នៅសហរដ្ឋអាមេរិក តែប្រសិនបើ មានអ្នកកុម្មង់ទិញ ខ្លួននឹង chat ទៅ Facebook មានឈ្មោះ Monita Sok ដើម្បីទទួលឥវ៉ាន់យកមកលក់បន្ត។ ប៉ុន្តែជាក់ស្ដែង ឈ្មោះ វ៉ា វួចគៀងនេះ ពុំទាន់ទទួលបានឧបករណ៍នោះនៅឡើយទេ។
បច្ចុប្បន្ននេះ អធិការដ្ឋាននគរបាលខណ្ឌ បាននាំខ្លួន អ្នកលក់តាមប្រព័ន្ធអនឡាញរូបនេះ ទៅកាន់អធិការដ្ឋាន ដើម្បីសួរនាំបន្តទៀត និងកសាងសំណុំរឿងតាមនីតិវិធី។
សូមបញ្ជាក់ថា នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានដាក់បទបញ្ជាឲ្យកម្លាំងនគរបាល នៃស្នងការរាធានី-ខេត្តទូទាំងប្រទេស ស្រាវជ្រាវ និងចាប់ឃាត់ខ្លួន និងឱសថស្ថានណា ដែលលក់ឧបករណ៍ធ្វើធ្វើតេស្តិ៍រកជំងឺ Covid-19 ។
ការចេញបទបញ្ជានេះធ្វើឡើងបន្ទាប់ពីទទួលបានបទបញ្ជាពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានគណៈកម្មការជាតិ ប្រយុទ្ធប្រឆាំងការរីករាលដាលជំងឺ Covid-19 នៅរសៀលថ្ងៃទី២៩ ខែមីនា ឆ្នាំ២០២០។
នាយឧត្តមសេនីយ៍ នេត សាវឿន បានប្រសាសន៍ថានាយកដ្ឋានជំនាញ សហការជាមួយស្នងការរាជធានី-ខេត្តទាំង២៥ អនុវត្តបន្ទាន់ កន្លែងណាដែលមានលក់ឧបករណ៍ធ្វើតេស្តិ៍ខូវីដ១៩ សុំឃាត់មនុស្ស ហើយដកហូតសម្ភារៈបន្ទាន់ ហើយរាយការណ៍ឡើងមកលើ។ ចាត់ការបន្ទាន់ភ្លាមសហការជាមួយព្រះរាជអាជ្ញាសហការជាមួយកម្លាំងពាក់ព័ន្ធនៅខេត្តនោះផ្ទាល់។
លោកជំទាវវេជ្ជបណ្ឌិត ឱ វណ្ណឌីន អ្នកនាំពាក្យ និងជារដ្ឋលេខាធិការ ក្រសួងសុខាភិបាល បានថ្លែងសារប្រាប់អ្នកសារព័ត៌មានតាមបណ្តាញសង្គមតេឡេក្រាម នៅថ្ងៃអាទិត្យនេះថា ចំពោះការលើកឡើងពីការប្រើប្រាស់ rapid test លើបុគ្គលនីមួយៗដោយខ្លួនឯងនោះ គឺក្រសួងសុខាភិបាលមិនទាន់អនុញ្ញាតនៅឡើយទេ ដោយយើងមិនទាន់ មានការបញ្ជាក់ណាមួយនៅឡើយពីអង្គការសុខភាពពិភពលោក ក្នុងការអនុញ្ញាតឲ្យប្រើ rapid test នេះ។
លោកជំទាវវេជ្ជបណ្ឌិត បានមានប្រសាសន៍ថា “គេកំពុងតែបង្កើនល្បឿនក្នុងការធ្វើ validation សង្ឃឹមថានឹងទទួលបានការបញ្ជាក់នាពេលដ៏ខ្លីខាងមុខ។ ជាការពិត បើអាចប្រើបានជាការល្អណាស់តែយើងត្រូវតែមានការប្រុងប្រយ័ត្នខ្ពស់ ក្នុងការចម្លងចូលទៅក្នុងសហគមន៍ ចំពោះភាពមិនទាន់ច្បាស់លាស់នៃតេស្តនេះដែរ”។
លោកជំទាវ បានលើកឡើងថា ប្រទេសនីមួយៗ បានខិតខំផលិតតេស្តបែបនេះច្រើនហើយសុទ្ធតែស្ថិតនៅលើការសាកល្បងទាំងអស់។
យើងបានគិតគូរពីបញ្ហានេះ មុននឹងតេស្តទាំងនេះ លេចមុខមកម្លេះ តែដើម្បីកុំឲ្យមានការថ្លោះធ្លោយ ដោយជាយថាហេតុយើងតែងតែពិភាក្សាជាមួយអង្គការសុខភាពពិភពលោក។ ប្រសិនបើបុគ្គលម្នាក់ ដែលមានវីរុសកូវីដ១៩តែដល់ធ្វើតេស្តរហ័សនេះទៅ បែរជាឃើញមិនមានវីរុសកូវីដ១៩ទៅវិញ អ្នកដែលមានវីរុសនេះនឹងមានការចម្លងទៅសហគមន៍ដែលពិបាកនឹងគ្រប់គ្រងណាស់។ អរគុណនូវរាល់ការផ្តល់យោបល់លើបញ្ហានេះខ្ញុំក៏ចង់ជម្រាបជូនថា ក្រសួងសុខាភិបាល នឹងយកចិត្តទុកដាក់ជាទីបំផុត លើវិធានការនិងមធ្យោបាយនានាដើម្បីទប់ស្កាត់ការរាលដាលវីរុសកូវីដ១៩នេះ ក្នុងនោះក៏មានរបៀបនៃការធ្វើតេស្តបែបរហ័សនេះដែរ ហើយយើងសង្ឃឹមថានឹងមានការណែនាំឆាប់ៗនេះ នូវតេស្តប្រភេទណា បែបណា ដែលយើងអាចយកមកប្រើប្រាស់បាន ប៉ុន្តែមិនមែនសម្រាប់ការផ្សាយលក់ដូរបែបអនាធិបតេយ្យ ដោយគ្មានច្បាប់អនុញ្ញាត ពីក្រសូងសុខាភិបាលនោះដែរ៕ ដោយ៖កូឡាប