អ្នកជំនាញជំងឺឆ្លងជាន់ខ្ពស់របស់រដ្ឋាភិបាលអាមេរិច នៅថ្ងៃអាទិត្យ បានធ្វើការព្រមានថា ចំនួនអ្នកស្លាប់ដោយសារវីរុសកូរ៉ូណា អាចកើនដល់ ២០០.០០០នាក់ និងមានអ្នកឆ្លងរាប់លាននាក់។
ស្ថានភាពឆ្លងរាតត្បាតនៅអាមេរិច កាន់តែធ្ងន់ធ្ងរខ្លាំងឡើងៗក្នុងរយៈពេល ប៉ុន្មានសប្តាហ៍ចុងក្រោយនេះ ខណៈដែលទីក្រុង New York, New Orleans និងទីក្រុងសំខាន់ៗផ្សេងៗទៀត បានព្រមានថា ពួកគេនឹងអស់បរិក្ខារពេទ្យក្នុងពេលឆាប់ៗនេះ។
លោកវេជ្ជបណ្ឌិត Anthony Fauci នាយកវិទ្យាស្ថានជាតិអាឡែរហ្សី និងជំងឺឆ្លង បានធ្វើការព្យាករណ៍ ក្នុងកិច្ចសម្ភាសន៍ជាមួយនឹង CNN ថាការរាតត្បាតវីរុស អាចនឹងឆក់យកជីវិតមនុស្សចន្លោះ ១០០.០០០ ទៅ ២០០.០០០នាក់នៅអាមេរិច។
បច្ចុប្បន្ន អាមេរិចមានអ្នកឆ្លងវីរុសសរុបជាង ១២៣.០០០នាក់ ដែលជាប្រទេសមានអ្នកឆ្លងច្រើនបំផុតក្នុងលោក ខណៈដែលអ្នកស្លាប់កើនលើស ២.៤០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia