មន្ត្រីរបស់ប្រទេសហូឡង់ បានប្រកាសឲ្យយកម៉ាស់រាប់ម៉ឺនដែលបានចែកចាយទៅកាន់មន្ទីរពេទ្យត្រឡប់មកវិញ ដោយសារតែមិនមានស្តង់ដារគុណភាព។ ម៉ាស់ទាំងអស់នោះបាននាំចូលពីប្រទេសចិន។ នេះបើតាមការបញ្ជាក់របស់ក្រសួងសុខាភិបាលកាលពីថ្ងៃសៅរ៍។
ពួកគេបានទទួលម៉ាស់ជាច្រើនមកពីក្រុមហ៊ុនចិនមួយកាលពីថ្ងៃទី ២១ ខែមីនានេះ។
ពួកគេទទួលបានការបញ្ជាក់ដំបូងថា ម៉ាស់ទាំងនោះមិនត្រូវតាមស្តង់ដារគុណទេ នៅពេលមានការត្រួតពិនិត្យ។
បើតាមសេចក្តីប្រកាស បានឲ្យដឹងថា ការដឹកជញ្ជូនម៉ាស់មួយចំនួនបានមកដល់ និងត្រូវបានចែកចាយទៅកាន់អ្នកជំនាញសុខភាព ប៉ុន្តែការដឹកជញ្ជូនម៉ាស់មួយចំនួនទៀតត្រូវបានផ្អាក។
“ការធ្វើតេស្តលើម៉ាស់ជាលើកទី ២ក៏បានបង្ហាញថា វាមិនត្រូវតាមស្តង់ដារសុខភាព។ ឥឡូវនេះ គេបានសម្រេចចិត្តមិនប្រើប្រាស់ម៉ាស់ទាំងនោះឡើយ”។
មានការព្រួយបារម្ភថា អាចនឹងមានម៉ាស់ជិត ១,៣លានដែលគ្មានគុណភាព។
បញ្ហានៃម៉ាស់នោះគឺថា វាមិនអាចបិទលើផ្ទៃមុខបានត្រឹមត្រូវ ឬក៏ប្រើប្រាស់ស្រទាប់ចំរោះមិនត្រឹមត្រូវ។
សូមបញ្ជាក់ថា រដ្ឋមន្ត្រីក្រសួងសុខាភិបាលបារាំង ឈ្មោះ Olivier Veran បានប្រកាសថា គាត់បានកម្មង់ម៉ាស់ជាង ១ពាន់លាន មកពីចិន ដើម្បីប្រយុទ្ធប្រឆាំងនឹងវីរុសកូរ៉ូណា៕
អត្ថបទប្រែសម្រួលដោយ៖ សុភ័ក្រ
ប្រភព៖ Straitstimes