ប្រទេសថៃ៖ ប្រជាជនថៃជាង ១៧,២ លាននាក់ បានសម្រុកចុះឈ្មោះដើម្បីទទួលបានជំនួយឧបត្ថម្ភ ៥ពាន់បាត ដែលរដ្ឋាភិបាលបានផ្តល់ឲ្យ ដើម្បីបន្ធូរបន្ថយផលប៉ះពាល់ដោយសារវីរុសកូវីដ-១៩ ។ នេះបើយោងតាមលោក Lavaron Saengsanit ប្រធានការិយាល័យគោលនយោបាយសារពើពន្ធ ។
នេះជាតួលេខដែលត្រូវបានបញ្ជាក់នៅវេលាម៉ោង ៦ ល្ងាចម្សិលមិញ (២៩ ខែមីនា ឆ្នាំ២០២០) នៅពេលដែលប្រជាជនបានចុះឈ្មោះនៅលើគេហទំព័រផ្លូវការ www.เราไม่ทิ้งกัน.com ដែលចាប់ផ្តើមទទួលពាក្យសុំនៅម៉ោង ៦ ល្ងាចថ្ងៃសៅរ៍ (២៨ មីនា) ។
លោក Lavaron បានបន្ថែមថា ការចុះឈ្មោះបានឈានដល់កម្រិតខ្ពស់បំផុតចំនួន ២ លានក្នុងមួយម៉ោង នៅម៉ោង ១០ យប់ថ្ងៃសៅរ៍ ដែលជាបរិមាណមិននឹកស្មានដល់ ដែលអាចជាចំនួនកម្មករសរុបក្រៅផ្លូវការដែលរងផលប៉ះពាល់ដោយ Covid-19 ត្រូវបានគេជឿថាមានប្រហែល ១០ លាននាក់។
បែបនេះ លោកថា វាទំនងជាថាមនុស្សជាច្រើនទាំងនោះដែលមិនមានសិទ្ធិទទួលបានជំនួយ បានឆ្លៀតឱកាសនេះ ហើយនាំគ្នាចុះឈ្មោះ។ ហេតុនេះ ក្រុមរបស់លោកអាចត្រូវដំណើរការប្រព័ន្ធជាមួយមនុស្សរហូតដល់ ២០ លានពាក្យស្នើសុំឯណោះ ។
លោកក៏បានបញ្ជាក់ឲ្យដឹងដែរថា រដ្ឋាភិបាលបានដាក់ចេញកញ្ចប់ថវិកានេះជាបន្តបន្ទាប់ ដើម្បីបន្ធូរបន្ថយផលប៉ះពាល់ដោយសារ Covid-19 ទៅលើកម្មករប៉ុណ្ណោះ។ ក្នុងចំណោមនោះគឺជាថវិការបស់រដ្ឋាភិបាលចំនួន ៥០ ពាន់លានបាត នឹងត្រូវផ្តល់ជូនពលករថៃដែលគ្មានការងារធ្វើដោយសារ Covid ក្នុងនោះនិយោជិក អ្នកធ្វើការក្រៅម៉ោង និងបុគ្គលិកក្រៅម៉ោង នឹងទទួលបានក្នុងម្នាក់ៗ ៥.០០០ បាត (ស្នើ ១៥០ ដុល្លារ) ក្នុងរយៈពេល ៣ ខែ៕
ប្រែសម្រួល៖ លឹម ហុង (ប្រភព៖ bangkokpost)