ខេត្តស្វាយរៀងៈ បុរសវ័យជំទង់ចំនួន២នាក់ត្រូវបានកម្លាំងសមត្ថកិច្ចប៉ុស្ដិ៍នគរបាលសង្កាត់ច្រកម្ទេសបាន សហការជាមួយកម្លាំងប៉ុស្ដិ៍នគរបាលរដ្ឋបាលសង្កាត់ព្រៃអង្គុញ ដោយមានកិច្ចសហការពីម្ចាស់ទីតាំងផ្ទះជួលបានធ្វើការបង្ក្រាបមុខសញ្ញា រក្សាទុក និងប្រើប្រាស់គ្រឿងញៀនដែលហេតុការណ៍នេះបានកើតឡើងកាលពីវេលាម៉ោង១១និង៣០នាទី ថ្ងៃទី៣០ ខែមីនា ឆ្នាំ២០២០ នៅបន្ទប់លេខ០៨ ផ្ទះជួល ស្ថិតក្នុងភូមិថ្នល់ជាតិ សង្កាត់ច្រកម្ទេស ក្រុងបាវិត ខេត្តស្វាយរៀង ។
សមត្ថកិច្ចបានឱ្យដឹងថាៈ ជនសង្ស័យទាំង២នាក់នោះមាន ទី ១ ឈ្មោះ រ៉ាប់ សារ៉ូត អាយុ១៩ឆ្នាំ មានមុខរបរជាងដែក មានទីលំនៅភូមិរាមជោ ឃុំស្វាយតាយាន ស្រុកកំពង់រោទិ៍ ខេត្តស្វាយរៀង លទ្ធផលតេស្តទឹកម៉ូតបង្ហាញវិជ្ជមាននិង ទី ២ ឈ្មោះ ហួត ករុណា អាយុ១៨ឆ្នាំ មុខរបរមិនពិតប្រាកដ មានទីលំនៅភូមិសេកជ្រុំ ឃុំស្វាយតាយាន ស្រុកកំពង់រោទិ៍ ខេត្តស្វាយរៀង លទ្ធផលតេស្តទឹកម៉ូតបង្ហាញវិជ្ជមាន។
ប្រភពដដែលបានបន្តថា ៖ វត្ថុតាងដកហូតបានរួមមាន ម្សៅក្រាមពណ៌ស ថ្លា សង្ស័យថ្នាំញៀន ប្រភេទមេតំហ្វេតាមីន ចំនួន០៣ កញ្ចប់តូច ទូរស័ព្ឌដៃ ចំនួន០១ គ្រឿង និងឧបករណ៍ប្រើប្រាស់ថ្នាំញៀនមួយចំនួនទៀត ។
ជនសង្ស័យទាំង០២នាក់ ត្រូវសមត្ថកិច្ចបានធ្វើការឃាត់ខ្លួននៅ អធិការដ្ឋាននគរបាលក្រុងបាវិត ដើម្បីកសាងសំណុំរឿងបញ្ជូនទៅការិយាល័យជំនាញចាត់ការបន្ត ៕ ដោយ៖វ៉ៃកូ
