ភ្នំពេញ៖ តាមរយៈការផ្តល់ជំនួយបរិក្ខារសុខាភិបាល ការបង្ហាត់បង្រៀន ការប្រើប្រាស់ ប្រព័ន្ធបច្ចេកទេសទំនើប និងវិទ្យាសាស្ត្រប្រកបដោយវិជ្ជាជីវៈរបស់ក្រុមគ្រូពេទ្យចិន ដែលមានបទពិសោធន៍ក្នុងការប្រយុទ្ធប្រឆាំងនឹងវីរុស Covid-19 នោះ នឹងជួយលើកកម្ពស់ការយល់ដឹងដល់ស្ថាប័នសុខាភិបាល ក្នុងកងយោធពលខេមរភូមិន្ទ ឲ្យកាន់តែមានសមត្ថភាពផ្នែកបង្ការ ទប់ស្កាត់ ការពារជំងឺឆ្លងនានា។
នៅក្នុងឱកាសទទួលជំនួយបរិក្ខារពេទ្យពីមិត្តចិននោះ នាយឧត្តមសេនីយ៍ ស៊ុំ សំណាង អគ្គនាយក អគ្គនាយកដ្ឋានភស្តុភារ និងហិរញ្ញវត្ថុ ក្រសួងការពារជាតិ បានសម្តែងអំណរគុណយ៉ាងជ្រាលជ្រៅ ចំពោះក្រសួងការពារប្រទេស កងទ័ព និងប្រជាជនចិន ដែលបានផ្តល់ជំនួយឧបត្ថម្ភនូវសម្ភារបរិក្ខារពេទ្យ ប្រមាណ ២តោន មកដល់ក្រសួងការពារជាតិកម្ពុជា នាពេលនេះ ដើម្បីបង្ការ ការពារ ទប់ស្កាត់ការរីករាយដាលពីមេរោគជំងឺផ្លូវដង្ហើម ដែលបង្កឡើងដោយវីរុសកូវីដ-១៩ ស្របតាមទិសស្លោក “សហគមន៍វាសនារួម ដកដង្ហើមរួមគ្នា រួមសុខទុក្ខជាមួយគ្នា”។ ជាមួយគ្នានេះដែរ នាយឧត្តមសេនីយ៍ ស៊ុំ សំណាង ក៏បានចាត់ទុកថា សាធារណរដ្ឋប្រជាមានិតចិន ជាមិត្តរបស់កម្ពុជា ជាមិត្តដែកថែប មិត្តអមតៈ មិត្តដែលរួមសុខរួមទុក្ខ ស្រឡាញ់គ្នាក្នុងគ្រាក្រ ស្គាល់មិត្តល្អក្នុងគ្រាលំបាក។
ទន្ទឹមនឹងនេះដែរ នាយឧត្តមសេនីយ៍ ស៊ុំ សំណាង មានជំនឿយ៉ាងមុតមាំថា តាមរយៈការផ្តល់ជំនួយបរិក្ខារសុខាភិបាល ការបង្ហាត់បង្រៀន ការប្រើប្រាស់ ប្រព័ន្ធបច្ចេកទេសទំនើប និងវិទ្យាសាស្ត្រប្រកបដោយវិជ្ជាជីវៈរបស់ក្រុមគ្រូពេទ្យចិន ដែលមានបទពិសោធន៍ក្នុងការប្រយុទ្ធប្រឆាំងនឹងវីរុស Covid-19 នោះនឹងជួយលើកកម្ពស់ការយល់ដឹងដល់ស្ថាប័នសុខាភិបាល ក្នុងកងយោធពលខេមរភូមិន្ទ ឲ្យកាន់តែមានសមត្ថភាពផ្នែកបង្ការ ទប់ស្កាត់ ការពារជំងឺឆ្លងនានា ព្រមទាំងកសាងបាននូវយន្តការគ្រប់គ្រង ការពាររយៈពេលយូរអង្វែង ទាំងផ្នែករឹង និងផ្នែកទន់ ឈានឆ្ពោះទៅយកជ័យជម្នះលើសមរភូមិប្រយុទ្ធប្រឆាំងនឹងទប់ស្កាត់ការឆ្លងរាលដាល នៃជំងឺ Covid-19 នៅកម្ពុជា។
នាយឧត្តមសេនីយ៍ ស៊ុំ សំណាង បញ្ជាក់ច្បាស់ថា៖ បើទោះបីស្ថិតក្នុងស្ថានភាពយ៉ាងណាក៏ដោយ ក៏ប្រមុខរាជរដ្ឋាភិបាលកម្ពុជា ក៏ដូចជាប្រជាជនកម្ពុជាទាំងមូល នៅតែមានគោលជំហរមិនងាករេ ក្នុងកិច្ចសហប្រតិបត្តិការរឹងមាំ ដើម្បីរួមសុខរួមទុក្ខជាមួយរដ្ឋាភិបាល និងប្រជាជនចិន ដោយពុំមានការរើសអើង ហើយសង្ឃឹមថា៖ ជំងឺដ៏កាចសាហាវមួយនេះ នឹងត្រូវបានបញ្ចប់នៅក្នុងពេលដ៏ឆាប់ខាងមុខនេះ ពីពិភពលោកទាំងមូល។
សូមបញ្ជាក់ថា នាព្រឹកថ្ងៃទី១ ខែមេសា ឆ្នាំ២០២០នេះ ក្រសួងការពារប្រទេសចិន បានផ្តល់ជំនួយឧបត្ថម្ភនូវសម្ភារ ឧបករណ៍បរិក្ខារពេទ្យ ប្រមាណ ២តោន មកដល់ក្រសួងការពារជាតិកម្ពុជា ដើម្បីបង្ការ ការពារ ទប់ស្កាត់ការរីករាយដាលពីមេរោគជំងឺផ្លូវដង្ហើម ដែលបង្កឡើងដោយវីរុសកូវីដ-១៩ តាមជើងយន្តហោះពិសេស នៃកងទ័ពអាកាសរំដោះប្រជាជនចិន នៅចំណតអាកាសយានដ្ឋានភ្នំពេញ។
គួររំលឹកថា៖ ក្រសួងការពារប្រទេសចិន កាលពីថ្ងៃទី២៤ មីនា ឆ្នាំ២០២០បានបញ្ជូនគ្រូពេទ្យ និងអ្នកជំនាញវេជ្ជសាស្ត្រប្រយុទ្ធប្រឆាំងវីរ៉ុសកូវីដ១៩ របស់កងទ័ពរំដោះប្រជាជនចិន ចំនួន៤រូប រួមជាមួយឧបករណ៍សម្ភារមួយចំនួនមកកម្ពុជា ដើម្បីបង្ហាត់បង្រៀនពីវិធានការទប់ស្កាត់ និងការព្យាបាលដល់ក្រុមគ្រូពេទ្យបង្គោល នៃកងយោធពលខេមរភូមិន្ទ ក្នុងគោលដៅប្រយុទ្ធបង្ការ ទប់ស្កាត់ ការរីករាលដាល នៃជំងឺរលាកផ្លូវដង្ហើម ដោយសារវីរ៉ុសកូវីដ១៩ ឲ្យមានប្រសិទ្ធភាពនៅកម្ពុជា។
គួរបញ្ជាក់ថា៖ ក្រៅពីគ្រូពេទ្យ និងអ្នកជំនាញវេជ្ជសាស្ត្ររបស់កងទ័ពរំដោះប្រជាជនចិន ទាំង៤រូប ប្រទេសចិន ក៏បានបញ្ជូនក្រុមគ្រូពេទ្យជំនាញចំនួន៧នាក់ផ្សេងទៀត និងសម្ភារបរិក្ខារពេទ្យការពារជំងឺកូវីដ១៩ មកកម្ពុជា កាលពីថ្ងៃទី២៣ ខែមីនា ឆ្នាំ២០២០។ ក្រុមគ្រូពេទ្យដែលមកដល់កម្ពុជានេះ មានបេសកកម្មចែករំលែកបទពិសោធន៍ និងបច្ចេកទេស ជោគជ័យនានា ដែលធ្លាប់ប្រើសម្រាប់ទប់ស្កាត់ការរីករាលដាលវិរុសកូវីដ-១៩ នៅប្រទេសចិននោះ មកដល់ក្រុមគ្រូពេទ្យ និងមន្ត្រីជំនាញរបស់កម្ពុជា ៕ដោយ៖កូឡាប