បន្ទាយមានជ័យ៖ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានដឹកនាំប្រតិភូកងកម្លាំងអាជ្ញាធរមានសមត្ថកិច្ច ក្នុងភូមិសាស្ត្រខេត្ត និងបន្ទាត់ព្រំដែនកម្ពុជា~ថៃ ជួបប្រជុំពិភាក្សា ដោះស្រាយការងារបន្ទាន់មួយចំនួន ជាមួយអភិបាលខេត្តស្រះកែវ ព្រះរាជាណាចក្រថៃ ឯកឧត្តម វរ៉ាផាន់ សុវាណុន Mr.WORAPHAN SUWANNUS នៅស្នាក់ការគយថៃ ច្រកទ្វារព្រំដែនអន្តរជាតិប៉ោយប៉ែត ក្លងឡឹក ស្រុកអារញ្ញប្រាថេត ខេត្តស្រះកែវ ប្រទេសថៃ។
កិច្ចប្រជុំពិភាក្សានោះ ក្នុងគោលបំណង ដើម្បីរកដំណោះស្រាយជូនពលរដ្ឋ រវាងប្រទេសទាំងពីរ ដែលចេញ-ចូល មិនទាន់តាមកាលបរិច្ឆេទ នៃការបិទច្រកទ្វារព្រំដែនអន្តរជាតិប៉ោយប៉ែត-ខ្លងលឹក និងការនាំចេញដំណាំកសិផល របស់ប្រជាពលរដ្ឋ ។
ក្នុងកិច្ចប្រជុំនេះដែរ ភាគីកម្ពុជាដឹកនាំដោយ ឯកឧត្ដម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ, លោក គាត ហ៊ុល អភិបាល នៃគណៈអភិបាលក្រុង ដោយមានការចូលរួមពី លោកឧត្តមសេនីយ៍, វរសេនីយ៍ ប្រធាន-អនុប្រធានមន្ទីរ, អង្គភាពពាក់ព័ន្ធមួយចំនួន រីឯភាគីថៃដឹកនាំដោយ ឯកឧត្តម វ៉នផាន់ សុវណ្ណនុស អភិបាសខេត្តស្រះកែវ រួមទាំងស្ថាប័នពាក់ព័ន្ធ។
ក្នុងកិច្ចប្រជុំឯកឧត្តមអភិបាលខេត្តបន្ទាយមានជ័យ ព្រះរាជាណាចក្រកម្ពុជា បានស្នើសុំជាគោលការណ៍រួមទៅ ២ចំណុច ដល់ឯកឧត្តមអភិបាលខេត្តស្រះកែវ : ១.ស្នើសុំជួយសម្រួលដល់បងប្អូនពលករខ្មែរ ដែលត្រូវបានអាជ្ញាធរថៃ បញ្ជូនមករាល់ថ្ងៃ សូមមានកិច្ចសហការ និងកំណត់យកទីតាំងច្រក ណាមួយសមរម្យ ដូចជាច្រកបឹងត្រកួន ជាអាទ៍ ដើម្បីងាយស្រួលក្នុងការត្រួតពិនិត្យ ការពារជំងឺកូវីត១៩ តែកន្លងមកបញ្ជូនមកតែតាមច្រករបៀង ចំការគរ ។ ២.ស្នើឲ្យមានការជួយសម្រួលការចេញចូលដឹកដំឡូងមីរបស់ប្រជាកសិករ ដើម្បីជំរុញសេដ្ឋកិច្ចនៃប្រទេសទាំងពីរ ដូចជា នៅច្រកបឹងត្រកួន ច្រកម៉ាឡៃ និងច្រកប៉ោយប៉ែត ជាដើម។
ក្រោយពីការជជែកពិភាក្សាយ៉ាងយកចិត្តទុកដាក់រវាង ភាគីទាំងពីរ តាមសំណើសុំរបស់ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ ដើម្បីសហការ សម្របសម្រួលជួយដល់ពលករខ្មែរ និងដើម្បីរួមសហការគ្នាទប់ស្កាត់ និងប្រយុទ្ធនឹងជំងឺកូវីត១៩ ។
ឯកឧត្តម វរ៉ាផាន់ សុវាណុន Mr.WORAPHAN SUWANNUS អភិបាលខេត្តស្រះកែវ និងកងកម្លាំងបូពា៍ថៃ បានឯកភាពជាគោលការណ៍រួម: ១.កំណត់យកទីតាំងច្រកអូរបីជាន់ គោកធ្យូង ជាកន្លែងតែមួយគត់ដើម្បីសម្របសម្រួលដល់ពលករ ដែលអាជ្ញាធរបញ្ជូនមកដើម្បីងាយស្រួលទាំងខាងថៃ និងកម្ពុជា ដើម្បីរួមគ្នាពិនិត្យសុខភាព មុនអនុញ្ញាតឲ្យចេញ ។ ជាមួយនោះ បន្តសហការទប់ស្កាត់ការលួចចេញតាមច្រករបៀងផ្សេងទៀត។ ២.តាមសំណើសុំរបស់ ឯកឧត្តមអភិបាលខេត្តបន្ទាយមានជ័យ សម្រួលចេញដំឡូវមី ទំនិញ ចេញតាមច្រកតំបន់ផ្លូវការណាមួយនោះ រដ្ឋបាលខេត្តស្រះកែវនឹងធ្វើរបាយការណ៍ សុំគោលការណ៍ក្រសួងពាណិជ្ជកម្មថៃ ដើម្បីសម្រួលជូន និងផ្តល់ដំណឹងជម្រាបជូនតាមក្រោយ។
ភាគីទាំងពីរបានព្រមព្រៀងគ្នា លើការប្រើប្រាស់ច្រកអូរបីជាន់ សម្រាប់ពលករខ្មែរចេញពីប្រទេសថៃ ចូលមកព្រះរាជាណាចក្រកម្ពុជា៕ដោយ៖បញ្ញាស័ក្តិ
