បាត់ដំបង៖ ជនសង្ស័យម្នាក់ ពាក់ព័ន្ធករណីលួចមានស្ថានទម្ងន់ទោស (ឆក់កាបូប) ត្រូវបានសមត្ថកិច្ចចាប់ខ្លួន និងរៀបចំសំណុំរឿងបញ្ជូនមកការិយាល័យជំនាញ ដើម្បីរៀបចំបញ្ជូនបន្តទៅសាលាដំបូងខេត្តបាត់ដំបង ចាត់ការតាមផ្លូវច្បាប់។ បុរសនោះធ្លាប់ជាប់ពន្ធនាគារក្នុងឆ្នាំ២០០៨ ពីបទ(ប្លន់) ក្រោយចេញពីពន្ធនាគារ មិនកែខ្លួនរកស៊ីត្រឹមត្រូវនិងជាមនុស្សល្អក្នុងសង្គមនោះទេបែរជាមកប្រព្រឹត្តបទល្មើសទៀត។
បើតាមរបាយការណ៍របស់ស្នងការនគរបាលខេត្តបាត់ដំបង នៅព្រឹកថ្ងៃពុធទី១ខែមេសាឆ្នាំ២០២០វេលាម៉ោង៧និង៤០នាទីនៅចំណុចក្រុមទី២៣ ភូមិគ្រួស ឃុំជ្រៃ ស្រុកថ្មគោល ខេត្តបាត់ដំបង មានករណីលួចមានស្ថានទម្ងន់ទោស (ឆក់កាបូប) មួយកើតឡើងបង្កដោយជនមិនស្គាល់អត្តសញ្ញាណចំនួន១នាក់ ស្លៀកពាក់ខោអាវប៉ារ៉ាជិះម៉ូតូ១គ្រឿង ម៉ាកហុងដាសេ១២៥ស៊េរី២០១៩ពណ៌ខ្មៅពាក់ផ្លាកលេខបាត់ដំបង 1AH 4465 ធ្វើសកម្មភាពឆក់កាបូប របស់ជនរងគ្រោះឈ្មោះ ញ៉ ជ្រី ភេទស្រី អាយុ៧២ឆ្នាំ រស់នៅភូមិក្បាលខ្មោច ឃុំជ្រៃ ស្រុកថ្មគោល ខេត្តបាត់ដំបង ដែលនៅក្នុងកាបូបនោះ មានទ្រព្យសម្បត្តិរួមមាន៖ ប្រាក់រៀលចំនួន៣.៣០០.០០០រៀល (បីលានសាមសិបម៉ឺនរៀល) ទូរស័ព្ទដៃ១គ្រឿងម៉ាកទ្រូពណ៌ខ្មៅ មានស៊ីមលេខ0979879193 អត្តសញ្ញាណប័ណ្ណសញ្ជាតិខ្មែរចំនួន១សន្លឹក។
នៅពេលកើតហេតុភ្លាមៗ តាមបទបញ្ជារបស់ឯកឧត្តម ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង និងមតិដឹកនាំរបស់លោកឧត្តមសេនីយ៍ត្រី ជេត វណ្ណនី ស្នងការរងផែនការងារព្រហ្មទណ្ឌ បានដឹកនាំមន្ត្រីក្នុងផែនជំនាញចូលរួមជាមួយកម្លាំងនគរបាលស្រុកថ្មគោល និងកម្លាំង នគរបាលស្រុកសង្កែ ធ្វើការស្រាវជ្រាវលើករណីនេះ។
ឆ្លងតាមរយៈនៃការស្រាវជ្រាវ រហូតដល់ម៉ោង១០និង៤០នាទី បានធ្វើការឃាត់ខ្លួនជនសង្ស័យចំនួន១នាក់ឈ្មោះ សាន់ លី ភេទប្រុសអាយុ៥៣ឆ្នាំ រស់នៅភូមិកំពង់អំពិល ឃុំវត្តតាមឹម ស្រុកសង្កែ ខេត្តបាត់ដំបង និងបានដកហូតសម្ភារភស្តុតាងរួមមាន៖ ម៉ូតូ១គ្រឿងម៉ាកហុងដាពាក់ផ្លាកលេខបាត់ដំបង1AH 4465 ប្រាក់រៀលចំនួន៣.១០០.០០០រៀល(បីលានដប់ម៉ឺនរៀល) ខោអាវប៉ារ៉ា១កំប្លេ មួកសុវត្ថិភាពណ៌ស១ កាបូបស្ពាយពណ៌ខ្មៅចំនួន១ ទូរស័ព្ទដៃម៉ាកទ្រូ១គ្រឿង(គ្មានស៊ីម) អត្តសញ្ញាណប័ណ្ណសញ្ជាតិខ្មែរចំនួន១សន្លឹក។
សូមបញ្ជាក់ជូនថា ជនសង្ស័យឈ្មោះ សាន់ លី ធ្លាប់ជាប់ពន្ធនាគារក្នុងឆ្នាំ២០០៨ ពីបទ(ប្លន់) នៅសង្កាត់វត្តគរ ក្រុងបាត់ដំបង ហើយត្រូវបានដោះលែងចេញពីពន្ធនាគារកាលពីខែមិថុនា ឆ្នាំ២០១៨ លុះដល់ថ្ងៃទី១ ខែ មេសា ឆ្នាំ២០២០ បានធ្វើសកម្មភាពដូចខាងលើ និងត្រូវបង្ក្រាបចាប់ខ្លួនបាន៕ ដោយ៖កូឡាប