ខេត្តស្វាយរៀងៈ នៅវេលាម៉ោង ៩និង៤៥ យប់ថ្ងៃទី ៣១ ខែមីនា ឆ្នាំ ២០២០ ក្រោយពីទទួលបានព័ត៌មានពីកម្លាំងផ្តល់ព័ត៌មាន ពាក់ព័ន្ធនឹងការបង្ខាំងមនុស្សខុសច្បាប់ និងជួញដូរ រក្សាទុកគ្រឿងញៀន និងកែច្នៃ សារធាតុគីមីផ្សំខុសច្បាប់នៅចំណុចផ្ទះជួលភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង។
សមត្ថកិច្ចបានឱ្យដឹងថាៈ កម្លាំងសមត្ថកិច្ចនៃអធិការដ្ឋាននគរបាលក្រុងបាវិត សហការជាមួយកម្លាំងការិយាល័យប្រឆាំងគ្រឿងញៀនដោយមានការសម្របសម្រួលដឹកនាំដោយលោក ខាំ សុផារី ព្រះរាជអាជ្ញាអមសាលាដំបូងខេត្តស្វាយរៀង និងគណៈបញ្ជាការឯកភាពក្រុងបាវិត បានចុះដល់ទីតាំងផ្ទះជូលខាងលើ ធ្វើការត្រួតពិនិត្យនិងឆែកឆេររកឃើញ ជាជនជាតិវៀតណាមចំនួន ១៥ នាក់ ស្រី ៣ នាក់ (អ្នកមើលការខុសត្រូវចំនួន ១ នាក់)ត្រូវបានបង្ខាំងទុកនៅក្នុងបន្ទប់ជួល ខាងលើ ។បន្ទាប់មកដោយមានការសង្ស័យសមត្ថកិច្ចបានបន្តឆែកឆេរបន្ទប់ជួលលេខ ០៦ និងលេខ ០២ ដែលគ្មានមនុស្សនៅ ហើយចាក់សោទ្វា រកឃើញ ក្នុងបន្ទប់លេខ ០៦ មានថ្នាំញៀនមេតំហ្វេតាមីនចំនួន ០២ កញ្ចប់ ឧបករណ៍សម្រាប់ជក់ស៊ីហ្សាចំនួន ០១ និងថ្នាំគ្រាប់ជក់ស៊ីហ្សាចំនួន ០៥ដុំ និង ០៩ គ្រាប់ ព្រមទាំងសម្ភារៈសម្រាប់ប្រើប្រាស់មួយចំនួនទៀត ។ ក្នុងបន្ទប់លេខ ០២ មានថ្នាំមេតំហ្វេតាមីនចំនួន០១កញ្ចប់តូច។
ប្រភពដដែលបានបន្តថាៈ ក្រោយធ្វើការសាកសួរជនជាតិ វៀតណាមឈ្មោះ ង្វៀង យាំងឌាំង ភេទប្រុស អាយុ ៣៥ ឆ្នាំ (អ្នកមើលការខុសត្រូវបន្ទប់ជួលខាងលើ) បានឆ្លើយបញ្ជាក់ប្រាប់ថាបន្ទប់លេខ ០៦គឺមានជនជាតិ វៀតណាមជានារី មិនស្គាល់អត្តសញ្ញាណ(មានរក្សាទុកគ្រឿងញៀន និងឧបករណ៍ជក់គ្រឿងញៀនច្រើន) ហើយនាងធ្វើការនៅក្លឹបព្រះអាទិត្យ និងមានបន្ទប់ជួលនៅជាន់ទី៣ សណ្ឋាគារសុបិន្តពិសេស ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង ។ ក្រោយពីទទួលបានចម្លើយសារភាពខាងលើគណៈកម្មការចម្រុះ បានធ្វើការបន្តចុះឆែកឆេរបន្ទប់នៅជាន់ទី3 សណ្ឋាគារសុបិន្តពិសេស(តែជនសង្ស័យបានគេចខ្លួនមុន) សមត្ថកិច្ចបានរកឃើញ ថ្នាំញៀនម្សៅក្រាមពណ៌សថ្លាជាមេតំហ្វេតាមីនចំនួន ៣ កញ្ចប់ (ធំ២កញ្ចប់) ម្សៅម៉ដ្ឋពណ៌សមួយថង់ធំ ម្សៅក្រាមពណ៌ផ្កាឈូក១ថង់ ម្សៅក្រាមពណ៌ប្រផេះ១ថង់ ថ្នាំគ្រាប់ពណ៌ទឹកក្រូច១ថង់ -ម្សៅម៉ដ្ឋពណ៌ស ១ កញ្ចប់តូច -ថ្នាំគ្រាប់អ៊ិចស្តាស៊ី ៤គ្រាប់ ម្សៅម៉ដ្ឋពណ៌សចំនួន៧ ដប -ជញ្ជីងថ្លឹងថ្នាំញៀនចំនួន ២ គ្រឿង ទឹកថ្នាំដប ១០ ដប ឧបករណ៍សម្រាប់ជក់ស៊ីហ្សាចំនួនប្រាំដើមធំ សារធាតុគីមីផ្សំ ២ ថូកុំព្យូទ័រlaptop ចំនួន៣ គ្រឿង -ipad ១ គ្រឿង ទូរស័ព្ទដៃ ៣ គ្រឿង ប្រាក់រៀល ៥៤ម៉ឺនរៀល ម្សៅក្រាមពណ៌ប្រផេះចំនួន ១ កញ្ចប់ ឯកសារ និងសម្ភារៈពាក់ព័ន្ធឧបករណ៍ប្រើប្រាស់គ្រឿងញៀនមួយចំនួន ។
សរុបដកហូតវត្ថុតាងទាំងពីរគោលដៅរួមមាន ÷ ម្សៅក្រាមពណ៌សថ្លាចំនួន ៦ កញ្ចប់(ធំ៣)មានទម្ងន់ ៦២,៤៧ក្រាម ថ្នាំគ្រាប់ចំនួន 205 គ្រាប់ទម្ងន់ ៤១,៥៩ក្រាម ជាប្រភេទអ៊ិចស្តាស៊ី ម្សៅក្រាមពណ៌ផ្កាឈូក១ កញ្ចប់ ទម្ងន់១២៩,១៦ ក្រាមជាប្រភេទអ៊ិចស្តាស៊ី ម្សៅក្រាមពណ៌លឿងប្រភេទអ៊ិចស្តាស៊ី ១កញ្ចប់ទម្ងន់ ៧៣,០៨ ក្រាម ម្សៅម៉ដ្ឋពណ៌ស ១ កញ្ចប់ធំជាមេតំហ្វេតាមីន ទម្ងន់ ២០៦,៥៤ ក្រាម ម្សៅម៉ដ្ឋពណ៌ស ១កញ្ចប់ជាមេតំហ្វេតាមីនទម្ងន់ ២,៦៤ក្រាម ម្សៅម៉ដ្ឋពណ៌ប្រផេះ ១ កញ្ចប់ ជាប្រភេទអ៊ិចស្តាស៊ីទម្ងន់ ៨,៤៦ ក្រាម ថ្នាំគ្រាប់ចំនួន ៤ គ្រាប់ពណ៌បៃតង ៣គ្រាប់ ពណ៌ផ្កាឈូក ១ គ្រាប់ ទម្ងន់ ១,០៩ ក្រាម ជាប្រភេទអិុចស្តាសីុ ថ្នាំគ្រាប់ពណ៌ខ្មៅចំនួន៥ ដុំនិង ៩ គ្រាប់ទម្ងន់ ៣៥០,៨៥ ក្រាម ជាប្រភេទអិុចស្តាស៊ី សារធាតុគីមីផ្សំ(រាវ) ពណ៌ ត្នោតចំនួន ១០ ដប ទម្ងន់ ៣៦៦,៥១ ក្រាម សារធាតុគីមីផ្សំ(ម៉ដ្ឋ) ពណ៌ សចំនួន ៧ ដប ទម្ងន់ ១១៦,៨៤ ក្រាម សារធាតុគីមីផ្សំ ជាម្សៅរាវពណ៌ផ្កាឈូកទម្ងន់ ១១៨៩,២០ ក្រាម ជាមេតំហ្វេតាមីន សារធាតុគីមីផ្សំ ជាម្សៅរាវពណ៌សទម្ងន់ ៨២០,៥៨ ក្រាម ជាមេតំហ្វេតាមីន ។សរុបទម្ងន់រួមគ្រឿងញៀននិងសារធាតុគីមីផ្សំ ៣៣៦៩,០១ ក្រាម គិតទាំងសម្បកវេចខ្ចប់ និងដប)។
សមត្ថកិច្ចបានឱ្យដឹងបន្តទៀតថាៈ ក្នុងករណីនេះក្រុមជនសង្ស័យបានគេចខ្លួនបាត់ សមត្ថកិច្ចជំនាញកំពុងធ្វើការស្រាវជ្រាវ។
បច្ចុប្បន្នវត្ថុតាងពាក់ព័ន្ធត្រូវបានកម្លាំងជំនាញធ្វើការរឹបអូសនិងវេចខ្ចប់បញ្ជូនមកកាន់ស្នងការដ្ឋាននគរបាលខេត្ត ធ្វើការកសាងសំណុំរឿងចាត់ការបន្តតាមនីតិវិធី រីឯបន្ទប់ជួលទាំងពីទីតាំងខាងលើត្រូវបានក្រុមការងារចម្រុះ សម្រេចបិទឃ្លុំបេជាបណ្តោះអាសន្ន៕ដោយ៖ វ៉ៃកូ