ខេត្តស្វាយរៀងៈ បុរសម្នាក់ជិះកង់បានស្លាប់នៅក្នុងករណីគ្រោះថ្នាក់ចរាចរណ៍ដោយសារជិះកង់ មិនគោរពសិទ្ធិអាទិភាពត្រូវរថយន្តបុកបណ្តាលឱ្យស្លាប់ក្រោយពេលបញ្ជូនយកទៅព្យាបាលនៅមន្ទីរពេទ្យខេត្តស្វាយរៀង ដែលហេតុការណ៍ខាងលើនេះបានកើតឡើងកាពីវេលាម៉ោង ១៧និង៤៥ នាទី ល្ងាចថ្ងៃទី១ខែមេសា
ឆ្នាំ២០២០ រវាង រថយន្ដ ដឹកកម្មកររោងចក្រ និង កង់ ( ទិសដៅផ្ទុយគ្នា ) លើផ្លូវបំបែកលេខ ១១៤ ស្ថិតក្នុងភូមិរោងបន្លែ សង្កាត់ ស្វាយរៀង ក្រុងស្វាយរៀង ។
សមត្ថកិច្ចបានឱ្យដឹងថាៈ រថយន្ដដឹកអ្នកដំណើរ ពណ៌ បៃតង ពាក់ផ្លាកលេខ ភ្នំពេញ ៣B ៤១៥៣ បើកបរដោយឈ្មោះ ព្រាបសារឹម ភេទប្រុស អាយុ ៥៤ មុខរបរ បើកបរ រស់នៅភូមិចំបក់គុយ ឃុំចំឡង ស្រុកស្វាយជ្រំ ខេត្តស្វាយរៀង បើកបរពីកើតទៅលិច (អ្នកបើកបររត់គេចពីកន្លែងកើតហេតុបន្សល់ទុករថយន្ដ) រថយន្ដខូចខាតស្រាល ។ ចំណែកអ្នកជិះកង់ឈ្មោះ សួស សុខម៉ែន អាយុ ៣៥ ឆ្នាំ មុខរបរ គ្មាន រស់នៅភូមិមេភ្លើង សង្កាត់ស្វាយរៀង ក្រុង ស្វាយរៀង ខេត្តស្វាយរៀង ជិះកង់ពីត្បូងទៅជើង រងរបួសធ្ងន់ហើយបានស្លាប់ក្រោយពេលយកទៅព្យាបាលនៅមន្ទីរពេទ្យខេត្តស្វាយរៀង ។ មធ្យោបាយរក្សាទុកនៅអធិការក្រុងស្វាយរៀង ។ សមត្ថកិច្ចបានបញ្ជាក់ពី មូលហេតុថា អ្នកជិះកង់ មិនគោរពសិទ្ធិអាទិភាព ទើបបង្កឲ្យមានអន្តរាយរហូតបាត់បង់ជីវិត៕ដោយ៖ វ៉ៃកូ