ប្រធានាធិបតីអាមេរិច ដូណាល់ ត្រាំ បានបង្ហាញការសង្ស័យចំពោះភាពត្រឹមត្រូវនៃតួលេខផ្លូវការរបស់ចិនជុំវិញការផ្ទុះវីរុសកូរ៉ូណា ក្រោយពេលសមាជិកសភាអាមេរិច បានចោទប្រកាន់ទីក្រុងប៉េកាំងថាលាក់ពត៌មានពិត។
“តើយើងដឹងដោយវិធីណា ប្រសិនជាតួលេខនោះត្រឹមត្រូវ។ តួលេខរបស់ពួកគេ (ចិន)ហាក់មានតិចតួច”។ នេះជាអ្វីដែលលោកត្រាំ
បានលើកឡើងក្នុងសន្និសិទសារពត៌មាន។
លោក ត្រាំបានលើកឡើងថា “ទំនាក់ទំនងជាមួយចិនគឺល្អ” ហើយលោកនៅតែមានភាពជិតស្និទ្ធជាមួយនឹងប្រធានាធិបតី ស៊ី ជីនពីង។
សូមបញ្ជាក់ថា តួលេខនៃអ្នកស្លាប់ និងអ្នកឆ្លងវីរុសកូរ៉ូណានៅចិន ត្រូវបានមន្ត្រីចារកម្មមួយចំនួនបានចាត់ទុកថាជាតួលេខក្លែងក្លាយ។
ចិនបានប្រកាសជាសាធារណៈថា មានការឆ្លងវីរុសកូរ៉ូណាចំនួន ៨២.៣៦១ករណី និងមានអ្នកស្លាប់ ៣.៣១៦ នាក់ គិតរហូតមកដល់ថ្ងៃពុធ ម្សិលមិញនេះ។
តួលេខនោះហាក់តិចជាងទ្វេដង ប្រសិនជាប្រៀបធៀបជាមួយអាមេរិច ដែលមានអ្នកឆ្លងជាង ២០០.០០០នាក់ និងស្លាប់ជាង ៤.៥០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
