ភ្នំពេញ៖ ក្នុងអាណត្តិការទូតរបស់លោកសេនានុព័ន្ធយោធាថៃ នៅកម្ពុជា បានបង្កគ្រប់លក្ខណៈសម្បត្តិ ជំរុញឲ្យបេសកកម្មទទួលបានជោគជ័យ ទាំងក្នុងកិច្ចពង្រឹងពង្រីកចំណងសាមគ្គីភាព មិត្តភាព និង កិច្ចសហប្រតិបត្តិការរវាងកងទ័ពប្រទេសទាំងពីរ ថៃ-កម្ពុជា កាន់តែល្អប្រសើរ។
លោក វរសេនីយ៍ឯក ភីសានុ សារ៉ាធី សេនានុព័ន្ធយោធាថៃប្រចាំនៅកម្ពុជា នាព្រឹកថ្ងៃទី០២ ខែមេសា ឆ្នាំ២០២០នេះ បានដឹកនាំប្រតិភូមកជូនពរ ឯកឧត្តមនាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ និងថ្នាក់ដឹកនាំ នាយទាហាន នាយទាហានរង និងពលទាហាន នៅក្នុងឱកាសទទួលអំណរបុណ្យចូលឆ្នាំថ្មីប្រពៃណីជាតិខ្មែរ ឆ្នាំជូត ទោស័ក ព.ស ២៥៦៤ ដែលនឹងឈានចូលមកដល់នៅ ថៃ្ងទី ១៣-១៤-១៥ខែមេសានេះ។
ជាកិច្ចឆ្លើយតប នាយឧត្ដមសេនីយ៍ វង្ស ពិសេន បានរំលេចពីកិច្ចទំនាក់ទំនងមិត្តភាព កិច្ចសហប្រតិបត្តិការរវាងប្រទេសទាំងពីរ (កម្ពុជា-ថៃ) ក្នុងនាមប្រទេសភូមិផងរបងជាមួយ ពីមួយថ្ងៃទៅមួយថ្ងៃត្រូវបានលើកកម្ពស់ជានិច្ច។
លោក វរសេនីយ៍ឯក ភីសានុ សារ៉ាធី បានសម្ដែងនូវការជូនពរសព្វសាធុការពរជ័យ សេរីមង្គល បវមហាប្រសើរ ជូនដល់នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ ក្នុងឱកាសដែលថ្នាក់ដឹកនាំរាជរដ្ឋាភិបាល កងទ័ព និងប្រជាជនកម្ពុជា នៅទូទាំងប្រទេសកំពុងត្រៀមទទួលអំណរឆ្នាំថ្មីប្រពៃណីខ្មែរ។
ពាក់ព័ន្ធដល់វិធានការទប់ស្កាត់ការរីករាលដាលមេរោគផ្លូវដង្ហើម(COVID-19) ឯកឧត្តមនាយឧត្ដមសេនីយ៍អគ្គមេបញ្ជាការ បានគូសបញ្ជាក់ពីតួនាទី របស់កងយោធពលខេមរភូមិន្ទ ដែលជាកម្លាំងស្រួចបានត្រៀមខ្លួនជាស្រេច ក្នុងការអន្តរាគមន៍ជួយសង្គ្រោះ តាមសេចក្តីណែនាំរបស់ក្រសួងសុខាភិបាល៕ដោយ៖បញ្ញាស័ក្តិ
