ភ្នំពេញ៖ បន្ទាប់ពីសារភាពទទួលកំហុស នឹងត្រូវបានសមត្ថកិច្ចធ្វើការណែនាំ អប់រំ ធ្វើកិច្ចសន្យា និងថតជាវីដេអូសុំទោសរួចមក គណៈអភិបាលខណ្ឌទួលគោក រួមជាមួយកម្លាំងនៃអធិការដ្ឋាននគរបាលខណ្ឌទួលគោក បានចុះបិទអាជីវកម្មទាំងស្រុងរបស់អគ្គីនេត្រ កាលពីរសៀលថ្ងៃទី២ខែមេសាឆ្នាំ២០២០។
ស្នងការដ្ឋាននគរបាលរាជធានីភ្នំពេញ បានស្នើដល់ពលរដ្ឋទាំងអស់ រួមគ្នាដើម្បីទប់ស្កាត់ព័ត៌មានមិនពិតទាក់ទងទៅនឹងវីរុសកូវីដ១៩។
សូមចូលរួមគោរពតាមការណែនាំរបស់ក្រសួងសុខាភិបាល ដើម្បីបង្ការ និងទប់ស្កាត់ការឆ្លងរីករាលដាលជំងឺកូវីដ១៩ ។
សូមកុំផុសផ្សព្វផ្សាយអ្វីដែលមិនមែនជាការពិត ទាក់ទងទៅនឹងវីរុសកូវីដ១៩ ។ បើមិនស្តាប់តាមការណែនាំរបស់ក្រសួងសុខាភិបាលនោះទេ សមត្ថកិច្ចនឹងចាត់វិធានការណ៍តាមផ្លូវច្បាប់ ។
សូមបញ្ជាក់ថា ឈ្មោះ វ៉ាន់ សុខសីហា ហៅអគ្គីនេត្រ ដែលបានបង្ហោះព័ត៌មានមិនពិតថា យ័ន្តអាចការពារកូវីដ១៩បាននោះ ដែលផ្ទុយទាំងស្រុងពីការណែនាំរបស់ក្រសួងសុខាភិបាល ត្រូវបានកម្លាំងការិយាល័យប្រឆាំងបទល្មើសបច្ចេកវិទ្យាផែនសន្តិសុខ នៃស្នងការដ្ឋាននគរបាលរាជធានីភ្នំពេញ ធ្វើការសហការជាមួយអធិការខណ្ឌទួលគោក បាននាំខ្លួនមកអធិការដ្ឋាននគរបាលខណ្ឌ ដើម្បីធ្វើការសួរចម្លើយលើករណីនេះ អគ្គីនេត្រ ក៏បានសារភាព និងយល់ព្រមទទួលកំហុស ដែលខ្លួនបានចុះផ្សាយព័ត៌មានមិនពិតនេះ ដែលធ្វើឲ្យមហាជនមានការយល់ច្រឡំ ។ ហើយក៏បានធ្វើកិច្ចសន្យាបញ្ឈប់រាល់សកម្មភាពទាំងនេះ ជាមួយនឹងការថតវីដេអូដើម្បីធ្វើការសុំទោសជាសាធារណៈផងដែរ ។
ក្រោយពីធ្វើកិច្ចសន្យា ណែនាំ អប់រំ និងថតវីដេអូសុំទោសរួច សមត្ថកិច្ចនឹងអនុញ្ញាតឲ្យគាត់ត្រឡប់ទៅផ្ទះវិញ៕ដោយ៖កូឡាប