ខេត្តស្វាយរៀងៈ លោក ម៉ែន វិបុល អភិបាលខេត្ត និងជាប្រធានគណៈកម្មការប្រយុទ្ធប្រឆាំងនឹងជំងឺកូវីដ-១៩ ខេត្តស្វាយរៀង នាព្រឹកថ្ងៃទី២ ខែមេសា ឆ្នាំ២០២០នេះ បានដឹកនាំក្រុមការងារដោយមានការចូលរួមពីលោកអភិបាលរងខេត្ត លោកប្រធានមន្ទីរ-អង្គភាពពាក់ព័ន្ធ លោកអភិបាលស្រុកស្វាយជ្រំ និងក្រុមគ្រូពេទ្យខេត្ត ចុះពិនិត្យមើលពីវឌ្ឍនភាព នៃការរៀបទីតាំង បន្ទប់ស្នាក់នៅ សម្ភារ និងគ្រឿងបរិក្ខាពេទ្យនៅមន្ទីរពេទ្យបង្អែកស្រុកស្វាយជ្រំ ដែលជាទីតាំងមួយត្រៀមបម្រុងទុក សម្រាប់ទទួលព្យាបាល ក្នុងករណីមានអ្នកកើតជំងឺកូវីដ-១៩ នៅក្នុងខេត្តស្វាយរៀង ។
ក្នុងឱកាសនោះ លោកអភិបាលខេត្ត បានថ្លែងនូវការអរគុណចំពោះមន្ត្រីជំនាញ បុគ្គលិកពេទ្យ និងអ្នកពាក់ព័ន្ធទាំងអស់ ដែលបានចូលរួមសហការ រៀបចំទីតាំងត្រៀមបម្រុងទុកនៅមន្ទីរពេទ្យបង្អែកស្រុកស្វាយជ្រំនេះ ដែលពិតជាបានបង្ហាញ ឲ្យឃើញនូវការយកចិត្តទុកដាក់ និងឆន្ទៈមោះមុតរួមចំណែកជាមួយរដ្ឋបាលខេត្ត និងរាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ក្នុងការប្រយុទ្ធប្រឆាំងនឹងជំងឺកូវីដ-១៩ ។
អភិបាលខេត្ត ក៏បានបញ្ជាក់សាជាថ្មីម្ដងទៀតថា នាពេលបច្ចុប្បន្នខេត្តស្វាយរៀង មិនទាន់មានប្រជាពលរដ្ឋណាម្នាក់ ផ្ទុកនូវជំងឺកូវីដ-១៩ នៅឡើយទេ ប៉ុន្តែដោយសារតែស្ថានភាពនៃការវិវឌ្ឍរបស់ ជំងឺនេះនៅកម្ពុជារបស់យើង នៅតែមិនទាន់បង្ហាញសញ្ញា នៃការថមថយណាមួយនោះ ឯកឧត្ដម ស្នើដល់គ្រប់អង្គភាព និងមន្ត្រីពាក់ព័ន្ធទាំងអស់ ត្រូវរៀបចំទីតាំងត្រៀមបម្រុងទុកនេះ ឲ្យបានរួចរាល់តាមផែនការ ដែលបានគ្រោងទុកនៅទីកន្លែង ដែលមិនទាន់បានរៀបចំរួចរាល់ ដោយមានបំពាក់ឧបករណ៍បរិក្ខារពេទ្យ រៀបចំគ្រែ បន្ទប់ទឹក ប្រព័ន្ធទឹក បំពាក់ម៉ាស៊ីនត្រជាក់ នៅតាមបន្ទប់ និងសម្ភារពាក់ព័ន្ធផ្សេងៗទៀត ស្របតាមបទដ្ឋានបច្ចេកទេសសុខាភិបាល ។
លោកអភិបាលខេត្ត ក៏បានណែនាំដល់អាជ្ញាធរស្រុក និងអង្គភាពពាក់ព័ន្ធទាំងអស់ ត្រូវបន្ត និងបង្កើនការចុះផ្សព្វផ្សាយ អប់រំ ណែនាំប្រជាពលរដ្ឋ នៅមូលដ្ឋានអំពីវិធានការនានា ដែលក្រសួងសុខាភិបាលបានរៀបចំនាពេលកន្លងមក ជាពិសេសត្រូវបន្តយកចិត្តទុកដាក់ ចំពោះបងប្អូនពលករ ដែលទើបត្រឡប់មកពីប្រទេសថៃ ដោយធានាថា ពួកគាត់ត្រូវបានស្នាក់នៅដាច់ដោយឡែក ពីគេ ក្នុងរយៈពេល១៤ថ្ងៃ ហើយក្នុងករណីមានការសង្ស័យ ត្រូវចាត់ក្រុមគ្រូពេទ្យចុះពិនិត្យ និងបញ្ជូនគាត់ទៅសម្រាកនៅមន្ទីរពេទ្យ ឬមណ្ឌលសុខភាព ដែលនៅជិតបំផុត និងត្រូវរាយការណ៍ជាបន្ទាន់ មកគណៈកម្មការប្រយុទ្ធប្រឆាំងនឹងជំងឺកូវីដ-១៩ខេត្ត ។
សូមបញ្ជាក់ថា ឆ្លើយតបនឹងសភាពការណ៍បច្ចុប្បន្ន ដែលសកលលោក ក៏ដូចជាប្រទេសកម្ពុជាយើង កំពុងរងនូវការវាយលុកពីជំងឺកូវីដ-១៩ រដ្ឋបាលខេត្តស្វាយរៀង បានត្រៀមនូវទីតាំងបម្រុងទុក សម្រាប់ដាក់ឲ្យនៅដាច់ដោយឡែក ចំពោះអ្នកដែលមានការសង្ស័យ និងអ្នកផ្ទុកនូវជំងឺកូវីដ-១៩នេះ នៅតាមទីតាំងមួយចំនួន ទាំងនៅតាមបណ្ដាមន្ទីរពេទ្យខេត្ត ក្រុង ស្រុក សណ្ឋាគារ និងផ្ទះសំណាក់ ដោយសរុបមានចំនួន ១១១បន្ទប់ ស្មើនឹង ២១១គ្រែ ៕ ដោយ៖វ៉ៃកូ
