ភ្នំពេញ៖ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអនុញាតិឲ្យឯកឧត្តម Dmitry Tsvetkov ឯកអគ្គរដ្ឋទូតវិសាមញ្ញ និងពេញសមត្ថភាពសហព័ន្ធរុស្ស៊ី ប្រចាំនៅព្រះរាជាណាចក្រកម្ពុជា ចូលជួបសំដែងការគួរសម និងជម្រាបលា ក្នុងឱកាសដែល ឯកឧត្តម ឯកអគ្គរដ្ឋទូតរូបនោះបានបញ្ចប់អាណត្តិការទូតរបស់ខ្លួននៅកម្ពុជា កាលពីរសៀលថ្ងៃទី០២ ខែមេសា ឆ្នាំ២០២០នេះ នៅបន្ទប់សវនាការសម្ដេចពិជ័យសេនា នាអាគារមិត្តភាព ទីស្ដីការគណៈរដ្ឋមន្ត្រី ក្នុងទីក្រុងភ្នំពេញ។
ឯកឧត្តម Dmitry Tsvetkov បានសម្ដែងនូវអំណរគុណចំពោះ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ព្រមទាំងថ្នាក់ដឹកនាំគ្រប់លំដាប់ថ្នាក់ក្នុងក្រសួងការពារជាតិ អគ្គមេបញ្ជាការ នៃកងយោធពលខេមរភូមិន្ទ នឹងគ្រប់បណ្ដាស្ថាប័នដែលពាក់ព័ន្ធ ដែលក្នុងរយៈពេលនៃការបំពេញបេសកកម្មការទូតរបស់ឯកឧត្តម នៅកម្ពុជា កងយោធពលខេមរភូមិន្ទ បានរួមសហប្រតិបត្តិការ បង្កគ្រប់លក្ខណសម្បត្តិ ងាយស្រួលគ្រប់បែបយ៉ាងដល់រូបឯកឧត្តម រួមនឹងសហការី ក្នុងការបំពេញបេសកកម្មការទូត ក្នុងការរឹតចំណងសាមគ្គីភាព មិត្តភាព និងកិច្ចសហប្រតិបត្តិការទំនាក់ទំនងល្អ រវាងរដ្ឋាភិបាលសហព័ន្ធរុស្ស៊ី និងរាជរដ្ឋាភិបាលកម្ពុជា ពិសេសកងយោធពលខេមរភូមិន្ទ នៅកម្ពុជា រហូតទទួលបានជោគជ័យក្រោយពេលបញ្ចប់អាណត្តិការទូតនេះ។
ឯកឧត្តមអគ្គរដ្ឋទូតសហព័ន្ធរុស្ស៊ី បានលើកឡើងអំពីកង្វល់របស់ប្រជាជន នៅទូទាំងពិភពលោក អំពីការរីករាយ នៃជំងឺផ្លូវដង្ហើម វីរុសកូរ៉ូណា (Covid 19) ដែលបាននិងកំពុងរីករាលដាលយ៉ាងខ្លាំង នៅគ្រប់បណ្តាប្រទេស ក្នុងតំបន់អាស៊ី អឺរ៉ុប អាហ្វ្រិច អាមេរិច និងតំបន់មួយចំនួននៅលើពិភពលោក ដែលមានអ្នកឆ្លង និងអ្នកស្លាប់ កើនឡើងជារៀងរាល់ថ្ងៃ។
សម្ដេចពិជ័យសេនា ទៀ បាញ់ បានបញ្ជាក់ថា៖ សម្តេចសូមចូលរួមអបអរសាទរចំពោះភាពជោគជ័យ នៃការបំពេញការងារ ការទូតរបស់ ឯកឧត្តម Dmitry Tsvetkov នៅកម្ពុជា និងស្វាគមន៍ជានិច្ច ចំពោះគ្រប់បេសកកម្មការទូត របស់បណ្ដាប្រទេសជាមិត្តមកកាន់ប្រទេសកម្ពុជា។
សម្ដេចពិជ័យសេនា បញ្ជាក់ទៀតថា៖ កន្លងមក រដ្ឋាភិបាល កងទ័ពប្រទេសយើងទាំងពីរ កម្ពុជា សហព័ន្ធរុស្ស៊ី តែងតែរួមគ្នាបង្កើននូវកិច្ចសហប្រតិបត្តិការ ជាមួយគ្នា បានយ៉ាងល្អប្រសើរ ចាប់តាំងពីថ្នាក់ដឹកនាំកំពូល រហូតដល់ថ្នាក់ក្រោម។
សម្ដេចពិជ័យសេនា ទៀ បាញ់ បានសំដែងនូវក្តីសង្ឃឹមយ៉ាងមុតមាំ នៅពេលដែលឯកឧត្តម ឯកអគ្គរដ្ឋទូតវិសាមញ្ញ និងពេញសមត្ថភាពសហព័ន្ធរុស្ស៊ី បានបញ្ចប់អាណត្តិរបស់ខ្លួននៅកម្ពុជា ហើយរដ្ឋាភិបាលសហព័ន្ធរុស្ស៊ី នឹងដាក់ជំនួស នៅឯងអគ្គរដ្ឋទូតថ្មី សម្រាប់ប្រចាំនៅព្រះរាជាណាចក្រកម្ពុជា នឹងបន្តការងារដែលនៅសេសសល់ និងបំពេញការងារថ្មីៗថែមទៀតកាន់តែល្អប្រសើរ ក្នុងការពង្រឹងពង្រីកចំណងទាក់ទង ការរឹតចំណងសាមគ្គីភាព មិត្តភាព កិច្ចសហប្រតិបត្តិការទំនាក់ទំនងកាន់តែល្អថែមទៀត ជាមួយរាជរដ្ឋាភិបាលកម្ពុជា និងកងយោធពលខេមរភូមិន្ទ។
ជំនួសមុខឱ្យប្រមុខរាជរដ្ឋាភិបាលកម្ពុជា ពិសេសថ្នាក់ដឹកនាំកងយោធពលខេមរភូមិន្ទ សម្ដេចពិជ័យសេនា ទៀ បាញ់ ក៏បានសម្ដែងនូវអំណរគុណចំពោះរដ្ឋាភិបាល កងទ័ព និងប្រជាជន នៃសហព័ន្ធរុស្ស៊ី ដែលជានិច្ចកាលតែងតែបានផ្ដល់នូវការគាំទ្រ ក្នុងការជួយអភិវឌ្ឍប្រទេសកម្ពុជា ពិសេសជួយដល់ការបណ្ដុះបណ្ដាលធនធានមនុស្សលើគ្រប់ជំនាញ ដល់កងយោធពលខេមរភូមិន្ទ ឲ្យមានធនធានមនុស្សពិតប្រាកដក្នុងការចូលរួមពង្រឹងវិស័យការពារជាតិ របស់កម្ពុជាឱ្យកាន់ប្រសើរ។
ពាក់ព័ន្ធដល់វិធានការទប់ស្កាត់ការរីករាលដាលមេរោគផ្លូវដង្ហើម(COVID-19) សម្ដេចពិជ័យសេនា ទៀ បាញ់ បានគូសបញ្ជាក់ពីតួនាទីរបស់កងយោធពលខេមរភូមិន្ទ ដែលជាកម្លាំងស្រួច បានត្រៀមខ្លួនជាស្រេច ក្នុងការអន្តរាគមន៍ជួយសង្គ្រោះតាមសេចក្តីណែនាំរបស់ប្រមុខរាជរដ្ឋាភិបាល ពិសេសក្រសួងសុខាភិបាល នៃព្រះរាជាណាចក្រកម្ពុជា។
សម្ដេចសង្ឃឹមយ៉ាងមុតមាំថា៖ ក្រោយពីឯកឧត្តម ឯកអគ្គរដ្ឋទូតចាស់បញ្ចប់អាណត្តិ ហើយឯកអគ្គរដ្ឋទូតថ្មី របស់សហព័ន្ធរុស្ស៊ី នឹងបន្តខិតខំប្រឹងប្រែងពង្រឹងពង្រីកកិច្ចសហប្រតិបត្តិការ ទំនាក់ទំនង នៃការរឹតចំណងសាមគ្គីភាព មិត្តភាព រវាងប្រទេសយើងទាំងពីរ កម្ពុជា សហព័ន្ធរុស្សី ឲ្យកាន់តែល្អថែមទៀត។
ឯកឧត្តម Dmitry Tsvetkov ក៏បានជម្រាបជូន សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ដែរថា ៖ ថ្វីត្បិតតែឯកឧត្តម បញ្ចប់អាណត្តិការទូតនៅកម្ពុជា ក៏ពិតមែន ប៉ុន្តែរដ្ឋាភិបាលសហព័ន្ធរុស្សី ក៏នឹងចាប់បញ្ជូនឯកអគ្គរដ្ឋទូតថ្មី ដើម្បីបន្តការពង្រឹងពង្រីកកិច្ចសហប្រតិបត្តិការទំនាក់ទំនង នៃការរឹតចំណងសាមគ្គីភាព មិត្តភាព រវាងប្រទេសយើងទាំងពីរ បន្ទាប់ពីឯកឧត្តមបញ្ចប់បេសកកម្មកាទូតនៅកម្ពុជា ហើយធ្វើមាតុភូមិនិវត្តន៍ទៅកាន់សហព័ន្ធរុស្ស៊ី ដើម្បីបន្តការងារថ្មី។
ក្នុងការមកបំពេញបេសកកម្មកាទូតបន្ត របស់ឯកអគ្គរដ្ឋទូតថ្មីនៅកម្ពុជា បន្តពីរូបឯកឧត្តម សហព័ន្ធរូស្សី នៅមានកម្មវិធីជាច្រើនដែលនឹងត្រូវអញ្ជើញដល់ថ្នាក់ដឹកនាំរបស់កងយោធពលខេមរភូមិន្ទ ដើម្បីទៅចូលរួមក្នុងកម្មវិធីទាំងនោះ។ សម្តេចពិជ័យសេនា បានទទួលយកនូវសំណើរបស់ឯកឧត្តម ឯកអគ្គរដ្ឋទូតសហព័ន្ធរុស្សី ដើម្បីពិចារណា និងរកនៅពេលវេលាសមគួរណាមួយដើម្បីចូលរួម ៕ ដោយ ៖ កូឡាប