ភ្នំពេញ៖ នៅព្រឹកថ្ងៃសុក្រ ទី៣ ខែមេសា ឆ្នាំ២០២០ ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានដឹកនាំកិច្ចប្រជុំ ស្តីពី ការរឹតបន្តឹងសន្តិសុខ សុវត្ថិភាព ទ្វេរដង ជូនប្រជាពលរដ្ឋ ក៏ដូចជាការចូលរួមឲ្យបានកាន់តែសកម្មបន្ថែមទៀត ក្នុងការជួយផ្សព្វផ្សាយ អំពីការបង្ការ និងការពារទប់ស្កាត់ការឆ្លងវីរុសកូវីដ១៩ ។
ឯកឧត្តម បានធ្វើការសង្កត់ធ្ងន់ឲ្យក្រុមការងារព័ត៌មាន និងប្រតិកម្មរហ័ស សមត្ថកិច្ចតាមការិយាល័យជំនាញ អធិការដ្ឋាននគរបាលខណ្ឌទាំង១៤ និងប៉ុស្តិ៍នគរបាលរដ្ឋបាល ត្រូវយកចិត្តទុកដាក់ខ្ពស់ លើការបង្ក្រាបករណីផ្សព្វផ្សាយព័ត៌មានមិនពិត ដូចជាការផ្សព្វផ្សាយលក់ឧបករណ៍ធ្វើតេស្តកូវីដ ការលក់ថ្នាំព្យាបាល លក់យ័ន្តការពារ ដែលខុសច្បាប់ ជាពិសេសគឺផ្ទុយពីការណែនាំរបស់ក្រសួងសុខាភិបាល ។ ល ។
ក្នុងឱកាសនោះដែរ ឯកឧត្តមស្នងការបានធ្វើការណែនាំដល់គ្រប់អង្គភាពទាំងអស់ ចំណុះស្នងការដ្ឋាននគរបាលរាជធានីភ្នំពេញ ត្រូវតែត្រួតពិនិត្យកម្លាំង តាមបណ្តាអង្គភាពឲ្យបានច្បាស់លាស់ ដើម្បីបំពេញភារកិច្ច ជូនប្រទេសជាតិប្រសិនបើមានការចាំបាច់ណាមួយ ។
បន្ថែមពីលើនេះទៀត ឯកឧត្តមស្នងការ បានធ្វើការកោតសរសើរដល់ក្រុមព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ ដែលបានតាមដានខំមិន និងដោះស្រាយជូនប្រជាពលរដ្ឋ បានយ៉ាងឆាប់រហ័ស ដោយមានការសហការគ្នាបានយ៉ាងល្អ ជាមួយអធិការដ្ឋាននគរបាលទាំង១៤ ក៏ដូចជាប៉ុស្តិ៍នគរបាលរដ្ឋបាលទាំងអស់ ជាពិសេសចំពោះវិធានការយ៉ាងឆាប់រហ័សនេះ ត្រូវបានប្រជាពលរដ្ឋសាទរ ធ្វើការកោតសរសើរ និងអរគុណយ៉ាងខ្លាំង ដល់សមត្ថកិច្ចដែលបានចុះ ដល់គោលដៅភ្លាមៗ ដើម្បីធ្វើការណែនាំ អប់រំ និងបញ្ឈប់សកម្មភាពផឹកស៊ី ចាក់ធុងបាស់ ឡូឡា បង្កសំឡេងរំខានដល់ការសម្រាករបស់អ្នកជិតខាង ។
ជាកិច្ចបញ្ចប់ឯកឧត្តមស្នងការ ក៏បានធ្វើការសរសើរដល់កងកម្លាំងទាំងអស់ ដែលបានខិតខំបម្រើប្រជាពលរដ្ឋ និងចូលរួមយ៉ាងសកម្ម ក្នុងការចុះផ្សព្វផ្សាយ ដល់ប្រជាពលរដ្ឋករណីបង្ការ និងទប់ស្កាត់ការឆ្លងវីរុសកូវីដ១៩ តាមការណែនាំរបស់ក្រសួងសុខាភិបាល ។
ឯកឧត្តមស្នងការ បានបញ្ជាក់ដល់លោកអធិការខណ្ឌទាំង១៤ និងប៉ុស្តិ៍ទាំងអស់ ត្រូវមានកម្លាំងប្រចាំការ ២៤ម៉ោងលើ២៤ម៉ោង ។
ក្នុងកិច្ចប្រជុំនេះមានការចូលរួមពីលោក លោកស្រីស្នងការរង និងលោកអធិការខណ្ឌទាំង១៤ ៕ដោយ៖កូឡាប