ភ្នំពេញ៖ គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម (គ.ប.ផ.ក.) នៅថ្ងៃទី៣ខែមេសាឆ្នាំ២០២០ បានចេញសេចក្តីជូនដំណឹង ស្តីពីការទប់ស្កាត់ការចរាចរឱសថ ឧបករណ៍បរិក្ខារពេទ្យ និងសារធាតុសម្លាប់មេរោគខុសច្បាប់។
គ.ប.ផ.ក.សូមជូនដំណឹងដល់សាធារណជនជ្រាបថា ៖ ខណៈពេលដែលសកលលោក ក៏ដូចជាប្រទេសកម្ពុជា កំពុងមានករណីជំងឺកូវីដ១៩ កើនទ្បើងជាបន្តបន្ទាប់ ដែលជាកត្តាធ្វើឲ្យប្រជាជនយើងមានតម្រូវការឱសថ ឧបករណ៍បរិក្ខារពេទ្យ និងសារធាតុសម្លាប់មេរោគជាចាំបាច់ ដើម្បីប្រើប្រាស់ក្នុងការបង្ការ និងទប់ស្កាត់ការចម្លងវីរុសកូវីដ១៩ ហើយទន្ទឹមនេះ គណៈកម្មាធិការ បានតាមដាន និងសង្កេតឃើញតាមបណ្តាញសង្គមហ្វេសប៊ុក (Facebook) មានគណនីជាច្រើនកំពុងឆ្លៀតឱកាសផ្សព្វផ្សាយលក់ ឱសថ ឧបករណ៍បរិក្ខារពេទ្យ និងសារធាតុសម្លាប់មេរោគ យ៉ាងអនាធិបតេយ្យ ដូចជា ម៉ាស់ ឧបករណ៍សម្លាប់មេរោគ អាល់កុល ជែល និងសារធាតុសម្លាប់មេរោគជាច្រើនប្រភេទទៀត ពុំមានការអនុញ្ញាតច្បាប់ពីក្រសួងមានសមត្ថកិច្ចទ្បើយ ។
គូសបញ្ជាក់ផងដែរ ក្នុងសន្និសីទសារព័ត៌មាន ជុំវិញការវិវត្តថ្មីៗ នៃសង្គមជាតិ ដែលបានធ្វើទ្បើងនៅវិមានសភាជាតិ កាលពីថ្ងៃទី៣០ ខែមីនា ឆ្នាំ២០២០ ដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសដាក់បទបញ្ជាយ៉ាងម៉ឺងម៉ាត់ ឲ្យអាជ្ញាធរមានសមត្ថកិច្ច ចុះប្រតិបត្តិការរឹបអូសនូវឱសថព្យាបាល និងឧបករណ៍សម្រាប់ធ្វើតេស្តវីរុសកូវីដ១៩ យកមកធ្វើការកម្ទេចចោល ។ ដោយយោងតាមសេចក្តីជូនព័ត៌មាន ចុះថ្ងៃទី៣១ ខែ មីនា ឆ្នាំ២០២០ របស់ក្រសួងសុខាភិបាល ស្តីពីការហាមលក់ឱសថ ឧបករណ៍បរិក្ខារពេទ្យ និងសារធាតុសម្លាប់មេរោគគ្មានលេខបញ្ជិកា ឬលេខប្រវេទន៍ពីក្រសួងសុខាភិបាល និងដើម្បីចូលរួមចំណែកជាមួយរាជរដ្ឋាភិបាល ក្នុងការបង្ការ និងទប់ស្កាត់ការចរាចរឱសថ ឧបករណ៍បរិក្ខារពេទ្យ និងសារធាតុសម្លាប់មេរោគខុសច្បាប់ ក៏ដូចជាអនុវត្តតាមប្រកាសរួម និងផែនការអនុវត្តន៍រួម រវាងក្រសួងមហាផ្ទៃ និងក្រសួងសុខាភិបាល ស្តីពីការគ្រប់គ្រងគុណភាព សេវាកម្ម និងវិធានការលុបបំបាត់ផលិតផលសុខាភិបាលខុសច្បាប់ និងសេវាសុខាភិបាលឯកជនខុសច្បាប់ ដើម្បីសុខភាព និងសុវត្ថិភាពសង្គម ដែលមាន គណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក.) ជាសេនាធិការឲ្យក្រសួងមហាផ្ទៃ ដើម្បីចុះអនុវត្តនីតិវិធី ។
ដូចនេះគណៈកម្មាធិការប្រយុទ្ធប្រឆាំងផលិតផលក្លែងក្លាយ សូមអំពាវនាវដល់សាធារណជន មេត្តាចូលរួម និងសហការផ្តល់ព័ត៌មាន អំពីទីតាំងផលិត ឬទីតាំងចែកចាយ និងជនដែលផលិត ឬជនដែលចែកចាយផលិតផលដូចបានរៀបរាប់ខាងលើ ដែលក្រសួងសុខាភិបាលហាមខាត់ សូមផ្តល់ព័ត៌មានមក គណៈកម្មាធិការ យើងខ្ញុំ ដើម្បីមានលទ្ធភាពចុះពិនិត្យ តាមដាន ស៊ើបអង្កេត និងឈានដល់ការបង្ក្រាបតាមនីតិវិធី នៃច្បាប់ ដោយសហការជាមួយសមត្ថកិច្ច នៃក្រសួង ស្ថាប័នពាក់ព័ន្ធ ដើម្បីរួមចំណែកលើកកម្ពស់សុខភាពប្រជាពលរដ្ឋ និងទប់ស្កាត់ការចម្លងវីរុសកូវីដ១៩ ឲ្យមានប្រសិទ្ធភាពខ្ពស់។
សូមសាធារណជនទំនាក់ទំនងផ្តល់ព័ត៌មានមកយើងខ្ញុំ តាមរយៈ លេខទូរស័ព្ទ ០៨១ ៩៩៩ ៨០៨ ឬ តាមបណ្តាញសង្គមហ្វេសប៊ុក(Facebook Page) “ គណៈកម្មាធិការប្រយុទ្ធប្រឆាំងផលិតផលក្លែងក្លាយ-Counter Counterfeit Committee ” ឬ មកកាន់ គ.ប.ផ.ក. ដែលមានទីតាំងនៅអគារ H ក្នុងក្រសួងមហាផ្ទៃ ។ រាល់ព័ត៌មាន របស់សាធារណជនទាំងអស់ ដែលបានបញ្ជូនមក គណៈកម្មាធិការ យើងខ្ញុំ គឺនឹងត្រូវ រក្សាការសម្ងាត់ និងតាមសំណូមពររបស់សាមីខ្លួន ៕ដោយ៖កូឡាប