ភ្នំពេញ៖ បើយោងតាមរបាយការណ៍របស់ក្រសួងកសិកម្ម គិតត្រឹម ៣ខែ ដើមឆ្នាំ២០២០នេះ ការនាំចេញផលិតផលកសិកម្មរបស់កម្ពុជា ទៅកាន់ទីផ្សារក្រៅប្រទេស មានកំណើនមិនដល់ ៣លានតោន ខណៈទីផ្សារបញ្ជាទិញ នៅប្រទេសមួយចំនួន ត្រូវបានប្រកាសផ្អាកនាំចូល ដោយសារជំងឺឆ្លងកូវីដ១៩ ។
កម្ពុជា បានធ្វើការនាំចេញផលិតផលកសិកម្មទៅទីផ្សារក្រៅប្រទេស រួមមាន ស្រូវ អង្ករ ដំឡូងមី គ្រាប់ស្វាយចន្ទី ជ័រកៅស៊ូ សណ្តែកសៀង ផ្លែស្វាយកែវរមៀត ផ្លែចេកស្រស់ ពោត ម្រេច រួមនឹងផលិតកសិកម្ម បន្ទាប់បន្សំមួយចំនួនទៀត។
ក្នុងចំណោមផលិតផលកសិកម្មជិត ៣លានតោន ដែលត្រូវបាននាំចេញ នៅក្នុងរយៈពេលត្រីមាសទី១នេះ ផលិតផលអង្ករនៅតែមានចំណែកធំជាងគេ ដែលបាននាំចេញចំនួនជាង ២៣ ម៉ឺនតោន។ ពោលគឺក្នុងត្រីមាសទី១ នៃដើមឆ្នាំ២០២០នេះ កម្ពុជាសម្រេចបានការនាំចេញអង្ករជាផ្លូវការ ប្រមាណ ២៣០ ៩៤៨ តោន ដែលមានកំណើនជាង ៣៥ ភាគរយ ក្នុងនោះ ទិសដៅនាំចេញមានទៅកាន់ ប្រទេសចិន ៤៤ ភាគរយ ស្មើនឹង ១០១ ៣៤៥ តោន សហគមន៍អឺរ៉ុប ជាង ៣០ភាគរយ ស្មើនឹង ៧០ ០៤០ តោន ប្រទេសនៅក្នុងតំបន់អាស៊ាន ជាង ១២ ភាគរយ ស្មើនឹង ២៨ ៧៩៩ តោន ហើយនិងនៅតាមបណ្តាប្រទេសផ្សេងទៀតបាននាំចេញជិត ១៤ភាគរយ ស្មើនឹង ៣០៧៦៤ តោន។
ក្រៅពីការនាំចេញអង្ករ គ្រាប់ស្វាយចន្ទីក៏នាំចេញច្រើនដែរ ដែលមានជាង ១២ម៉ឺនតោន, ផ្លែចេកស្រស់ មាន ជាង ៧,៦ ម៉ឺនតោន, ផ្លែស្វាយជាង ២,៦ ម៉ឺនតោន ពោតជាង ២,៥ ម៉ឺនតោន និងមានផលិតផលផ្សេងៗជាច្រើនមុខទៀត។
គួរបញ្ជាក់ថា ការនាំចេញផលិតផលកសិកមក្មកម្ពុជា នៅត្រីមាសទី២ ត្រូវបានអ្នកជំនាញព្យាករណ៍ថា អាចនឹងមានថមថយ ដោយសាររដ្ឋាភិបាល បានសម្រេចផ្អាកនាំចេញអង្ករស (លើកលែងតែអង្ករក្រអូប) ទៅកាន់ទីផ្សារអន្តរជាតិ ក្នុងរយៈពេលខ្លី ខណៈពេល មានការរាតត្បាតនៃជំងឺឆ្លង Covid-19 ដែលពិភពលោកកំពុងប្រឈម។ ការបិទនេះ គឺក្នុងគោលដៅរក្សាទុកស្បៀងនៅក្នុងស្រុក ស្របពេលពិភពលោក រួមទាំងកម្ពុជាផងដែរនោះ កំពុងរងផលប៉ះពាល់ដោយបញ្ហា Covid-19៕ដោយ៖សម្ផស្ស