ចាប់តាំងពីការអនុវត្តវិធានការទប់ស្កាត់វីរុសកូវីដ១៩មក គេសង្កេតឃើញថា តាមបណ្តាដងផ្លូវនៅក្នុងប្រទេសម៉ាឡេស៊ី មានសភាពស្ងប់ស្ងាត់គួរឱ្យកត់សម្គាល់ ដោយមានមនុស្សតិចណាស់ចាកចេញពីផ្ទះរបស់ពួកគេ ដើម្បីការពារមេរោគ។ ឃើញបែបនេះ បុគ្គលមួយចំនួនបានចាត់ទុកភាពស្ងៀមស្ងាត់នេះថា ជាឱកាសដើម្បីទាញយកប្រយោជន៍ពីស្ថានការណ៍ ដើម្បីផលប្រយោជន៍ផ្ទាល់ខ្លួន។
ជាក់ស្តែង នៅក្នុងវីដេអូ CCTV ចែករំលែកទៅកាន់ Sin Chew Daily កាលពីថ្ងៃអាទិត្យ (៣០ មីនា) បុរសម្នាក់ត្រូវបានកាមេរ៉ាចាប់បាន ឈប់ម៉ូតូ រួចឡើងលើជញ្ជាំងផ្ទះមួយនៅ Rawang ដើម្បីលួចធុងហ្គាសទាំងកណ្តាលថ្ងៃតែម្តង។
ចោររូបនេះត្រូវបានគេរាយការណ៍ថា បានជិះម៉ូតូទៅផ្លូវខាងក្រោយនៃច្រកផ្លូវស្ថិតក្នុងតំបន់ Rawang Garden រួចចុះពីម៉ូតូឡើងលើជញ្ជាំង ចាប់ច្បាមធុងហ្គាសពណ៌លឿងយ៉ាងលឿន។ ហើយអ្វីដែលហួសចិត្តនោះ គឺនៅពេលដែលចោររូបនេះ កំពុងគេចខ្លួនសម្រូតចុះយ៉ាងលឿន ស្រាប់តែធុងហ្គាសបានធ្លាក់ចូលក្នុងគម្របលូរបស់ម្ចាស់ផ្ទះ គួរឲ្យស្រៀវសាច់ជំនួសតែម្តង។
ទោះយ៉ាងណា បុរសនោះអាចត្រូវបានគេឃើញ កំពុងត្រឡប់ទៅកាន់ប្រឡាយលូ ដើម្បីទៅយកធុងហ្គាសនោះលើកឡើងម៉ូតូ មុនពេលបើកចេញពីកន្លែងកើតហេតុ។
ទន្ទឹមនេះផងដែរ អ្នកលេងអ៊ីនធឺណិតជាច្រើន បានបញ្ចេញមតិស្រដៀងៗគ្នាថា “សំណាងហើយ អាវ៉ា ដែលធុងហ្គាសនោះពុំផ្ទុកហ្គាសពេញ ពុំនោះសោត ម្ល៉េះសមនឹង….” ៕
ប្រែសម្រួល៖ លឹម ហុង (ប្រភព៖ worldofbuzz)
