ភ្នំពេញ៖ ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងថា ជុំវិញការផ្ទុះឡើងនៃជំងឺរលាកផ្លូវដង្ហើមកូវីដ-១៩ ថ្វីត្បិតមិនទាន់មានការបាត់បង់ជីវិតមនុស្សនៅឡើយ តែជំងឺនេះ បាននិងកំពុងបន្តគំរាមកំហែងដល់សង្គមកម្ពុជា និងផលប៉ះពាល់ដល់ផ្នែកសេដ្ឋកិច្ច ហើយបានកំពុងលេចរូបរាងកាន់តែច្បាស់ និងមានសភាពកាន់តែធ្ងន់ធ្ងរបន្តិចម្តងៗ ជាពិសេសលើវិស័យទ្រទ្រង់កំណើនធំៗពីររួមមាន វិស័យកាត់ដេរ និងទេសចរជាដើម។
ឯកឧត្តមបានលើកឡើងដូចនេះ នៅក្នុងពិធីផ្ទេរ និងប្រគល់តំណែងរដ្ឋមន្ត្រីក្រសួងប្រៃសណីយ៍ និងទូរគមនាគមន៍ នាថ្ងៃទី២ ខែមេសា ឆ្នាំ២០២០។
ឯកឧត្តមឧបនាយករដ្ឋមន្ត្រី បានបន្តថា ស្ថិតក្នុងគោលការកាត់បន្ថយផលប៉ះពាល់ជំងឺកូវីដ-១៩ នេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញនូវវិធានការបន្ទាន់ចំនួន២ជុំរួចមកហើយ ក្នុងនោះជុំទី១ ចាប់ផ្តើមកាលពីថ្ងៃទី២៤ ខែកុម្ភៈ និងជុំទី២ ចាប់ផ្តើមនៅថ្ងៃទី៣១ ខែមីនា ឆ្នាំ២០២០ ថ្មីៗនេះ ដើម្បីជួយឲ្យធុរកិច្ចអាចបន្តអាជីវកម្មបាន និងជួយសម្រួលដល់កម្មករនិយោជិតផងដែរ ។
ឯកឧត្តម បានបញ្ជាក់ថា ពាក់ព័ន្ធនឹងជំងឺរាតត្បាតរលាកផ្លូវដង្ហើមកូវីដ-១៩ នេះ បច្ចុប្បន្នបានកំពុងរាតត្បាតនៅក្នុងប្រទេស និងដែនដីជាង១៩០ ទូទាំងពិភពលោក ខណៈសហគមន៍អឺរ៉ុប និងសហរដ្ឋអាមេរិក កំពុងក្លាយជាមជ្ឈមណ្ឌល នៃការរាតត្បាតជំងឺនេះ, ចំណែកនៅក្នុងតំបន់ផ្សេងៗទៀតមានជាអាទិ៍ តំបន់អាស៊ាន រួមមាន កម្ពុជា និងប្រទេសសមាជិកដទៃទៀត មិនអាចគិចផុតពីការគំរាមកំហែងនេះបានទេ៕ដោយ៖សម្ផស្ស