ភ្នំពេញ៖ ថ្លែងនៅក្នុងសន្និសីទ តាមវីដេអូផ្សាយបន្តផ្ទាល់ពីក្រុងប៉ារីស (videos conferance call) រវាង ប្រទេសជាសមាជិក សមាគមន៍ អន្តរជាតិ អភិបាលក្រុងប្រើប្រាស់ភាសាបានរាំង (AIMF) ចំនួន១៥ទីក្រុង នៅល្ងាចថ្ងៃទី៣ ខែមេសានេះ ដែលរៀបចំដោយ លោកជំទាវ អាន អ៊ីដាហ្គោ ប្រធានសមាគមន៍ AIMF និងជាអភិបាលរដ្ឋធានីប៉ារីស ។
លោកជំទាវ បានបន្តថា កិច្ចប្រជុំនេះ ធ្វើឡើងដើម្បីផ្តល់យន្តការនានា ដែលបានអនុវត្តនៅតាមប្រទេសនានា ទទួលបានជោគជ័យ មកចែករំលែកជួយដល់ទីក្រុងមួយចំនួន ដែលកំពុងរងការរាតត្បាតពីជំងឺ កូវីដ ១៩ នេះ។
ជាមួយគ្នានោះ លោកវេជ្ជបណ្ឌិត ហ្វីលីព ខ្លែន ដែលបានចូលរួមព្យាបាលនៅទីក្រុង វូហាន ប្រទេសចិន បានលើកឡើងថា វិធានការល្អបំផុត គឺអាជ្ញាធរ ត្រូវហាមឃាត់ជាដាច់ខាត មិនឲ្យប្រជាជនជួបជុំគ្នា នៅតាមទីប្រជុំជន ទីសាធារណៈ ឡានក្រុង និង សាលារៀន ជាដើម។ បន្ថែមពីនេះ ក្រសួងសុខាភិបាលសហការ ជាមួយភាគីពាក់ព័ន្ធ ត្រូវតែយកចិត្ត ទុកដាក់ផ្សព្វផ្សាយ ដលប្រជាជន អោយមានការយល់ដឹងពីវិធីសាស្ត្រក្នុងការការពារ ប្រឆាំងកូវីដ១៩ដោយខ្លួនឯង ដូចជា មិនចេញក្រៅ ពាក់ម៉ាស លាងដៃនិងសាប៊ូឲ្យបានញឹកញាប់ អនុវត្តអនាម័យជាប្រចាំ។ បើរកឃើញថា មានអ្នកផ្ទុកមេរោគកូវីដ ត្រូវឃាត់ទុកនិងយកទៅដាក់ដោយឡែកពីគេ ដើម្បី ទទួលការព្យាបាល ដើម្បីកុំឲ្យឆ្លងទៅអ្នកដទៃ។
ក្នុងនោះឯកឧត្តម ឃួង ស្រេង អភិបាលរាជធានីភ្នំពេញ បានមានប្រសាសន៍នៅក្នុងកិច្ចប្រជុំនេះថា ចំពោះមុខឯកឧត្តម សូមសម្ដែងនូវការសោកស្ដាយ ចំពោះជនរងគ្រោះ ដែលរងគ្រោះដោយជំងឺកូវីដ១៩ នេះ។
ឯកឧត្តមបានគូសបញ្ជាក់ នៅក្នុងកិច្ចប្រជុំនេះថា គិតមកដល់ពេលនេះ ប្រទេសកម្ពុជាមានអ្នកជំងឺកូវីដ១៩ គិតត្រឹមថ្ងៃទី ៣ ខែមេសា ឆ្នាំ ២០២០ មានចំនួនសរុប១១៤ នាក់ក្នុងនោះមានជនបរទេសចំនួន ៦៤នាក់ ហើយបានជាសះស្បើយចំនួន៣៥ នាក់។ សម្រាប់រាជធានីភ្នំពេញ មានអ្នកជំងឺកូវីដ១៩ ចំនួន២០នាក់ ហើយបានជាសះស្បើយចំនួន ៨ នាក់។
ឯកឧត្តមឃួង ស្រេង បានគូសបញ្ជាក់ប្រាប់កិច្ចប្រជុំ តាមរយៈវីដេអូផ្សាយផ្ទាល់នេះថា សម្រាប់ព្រះរាជាណាចក្រកម្ពុជាទាំងមូល គឺបានទទួលព្យាបាលអ្នកឆ្លងជំងឺកូវីដ ទាំងប្រជាពលរដ្ឋខ្លួនឯងផ្ទាល់ និងទាំងជនបរទេសផ្សេងទៀតផងដែរ ខណៈប្រទេសខ្លះ មិនទទួលព្យាបាលជនបរទេសនោះ។ ឯកឧត្តម បានបន្តថា រាជរដ្ឋាភិបាលកម្ពុជា បានដាក់ចេញនូវវិធានការជាបន្តបន្ទាប់ នៅពេលដែលមានករណីផ្ទុះឡើង នូវជំងឺកូវីដ១៩ នេះសម្រាប់ អាជ្ញាធរបានទទួលការពន្យល់យ៉ាងលម្អិត ពីក្រសួងសុខាភិបាល ហើយក៏បានធ្វើការផ្សព្វផ្សាយ ទៅដល់ប្រជាពលរដ្ឋ អំពីវិធីបង្ការ និងទប់ស្កាត់ សម្រាប់អ្នកជំងឺ គឺត្រូវបានព្យាបាលយ៉ាងយកចិត្តទុកដាក់បំផុត ក្នុងនោះអាជ្ញាធរ និងផ្នែកសុខាភិបាល នៅកម្ពុជា បានរួមគ្នាស្រាវជ្រាវ ស្វែងរកអ្នកប៉ះពាល់ដោយផ្ទាល់ និងប្រយោលជាមួយអ្នកជំងឺកូវីដ១៩ នេះគ្រប់មូលដ្ឋានទាំងអស់ ទូទាំងប្រទេសកម្ពុជា ដើម្បីយកពួកគាត់ ទៅដាក់ដាច់ដោយឡែក គឺដើម្បីសុវត្ថិភាពដល់ប្រជាពលរដ្ឋដទៃទៀត និងក៏ជាការបង្ការប្រកបដោយ ប្រសិទ្ធភាពមួយទៀត ដែលមិនឲ្យជំងឺកូវីដ១៩ នេះរីករាលដាលបានយ៉ាងឆាប់រហ័ស។
ឯកឧត្តម អភិបាល បានបន្តថា បទពិសោធដ៏សំខាន់មួយ សម្រាប់រាជរដ្ឋាភិបាលកម្ពុជា បាននិងកំពុងអនុវត្តនោះ គឺការត្រៀមបម្រុងរួចជាស្រេច នូវទីតាំងអគារផ្សេងៗ ក្នុងការទទួលព្យាបាលអ្នកជំងឺ នៅពេលដែលមានសភាពការណ៍បន្ទាន់ ជាមួយគ្នានេះការបម្រុងទុក នូវស្បៀងអាហារ ស្រូវ អង្ករជាដើម ក្នុងនោះរាជរដ្ឋាភិបាលកម្ពុជា បាននិងកំពុងអនុវត្ត បានយ៉ាងល្អក្នុងការមិនបញ្ចេញស្រូវ អង្ករ ទៅកាន់បរទេស និងការបម្រុងថវិកា សម្រាប់ធ្វើកិច្ចការងារនេះបន្ថែម លើសពីនេះមន្ត្រីរាជការរបស់រដ្ឋាភិបាល និងសប្បុរសជនទូទាំងប្រទេស បានរួមគ្នាបរិច្ចាគថវិកា ដើម្បីទ្រទ្រង់សកម្មភាពគ្រប់បែបយ៉ាង ដើម្បីប្រយុទ្ធប្រឆាំងនឹងការរីករាលដាល នៃជំងឺកូវីដ១៩នេះ៕ដោយ៖កូឡាប
