ក្រចេះ៖ នគរបាលចរាចរណ៍ខេត្តក្រចេះ បានចាប់ផ្តើមហ្វឹកហ្វឺនហាត់រៀនជំនាញក្បាច់គុនចាប់ចងបន្ថែមលើជំនាញដែលចេះស្រាប់ ដើម្បីការពារខ្លួន ក៏ដូចជាបង្ក្រាបបទល្មើសចរាចរណ៍ផ្លូវគោក ។
ស្នងការដ្ឋាននគរបាលខេត្តក្រចេះ បានឲ្យដឹងថា តំណាងនិងជំនួសឲ្យលោកឧត្តមសេនីយ៍ទោ លន់ សុផាត ស្នងការនគរបាលខេត្ត នៅរសៀលថ្ងៃទី៣ ខែមេសា លោកឧត្ដមសេនីយ៍ត្រី ហន ប៉ូច ស្នងការរងទទួលកិច្ចការងារសណ្តាប់ធ្នាប់ បានអញ្ជើញចូលរួមពិធីបិទវគ្គហ្វឹកហ្វឺនជំនាញលំហាត់របៀបជាច្រើនវិញ្ញាសា រួមទាំងវិញ្ញាសាក្បាច់គុន ដែលត្រូវបានហាត់រៀន មានរយៈពេល៤ថ្ងៃកន្លងទៅ ចាប់ពីថ្ងៃទី៣១ ខែមីនា ដល់ថ្ងៃទី៣ ខែមេសា ។
សិក្ខាកាមដែលទទួលបានវគ្គហ្វឹកហ្វឺនជំនាញបន្ថែម គឺសុទ្ធសឹងជានគរបាលជំនាញចរាចរណ៍ មកពីស្នងការដ្ឋាន អធិការក្រុង-ស្រុក ចំនួន ៦១នាក់ ស្រី៤នាក់ ។
ថ្លែងក្នុងឱកាសនោះ លោកឧត្តមសេនីយ៍ត្រី ហន ប៉ូច បានសម្តែងការលើកទឹកចិត្ត ដល់សិក្ខាកាមទាំងអស់ ដែលបានយកចិត្តទុកដាក់ក្នុងការហាត់រៀន ហើយនឹងរំពឹងថា នគរបាល នឹងយកជំនាញ ដែលទទួលបានពីការហ្វឹកហ្វឺននេះ ទៅអនុវត្តឲ្យបានខ្ជាប់ខ្ជួន៕ ដោយ ៖ កូឡាប